“Ko e Meʻaʻofa ʻa e ʻOtuá ke Tokoniʻi Koe ke Ke Akó,” Ki Hono Fakamālohia ʻo e Toʻu Tupú, ʻEpeleli 2023.
Tokoni ʻo e Moʻuí
Ko e Meʻaʻofa ʻa e ʻOtuá ke Tokoniʻi Koe ke Ke Akó
Fakavaveʻi hoʻo akó ʻaki haʻo maʻu ha mahino ki he fatongia ʻo e Laumālie Māʻoniʻoní ʻi hono fakahoko iá.
Kuó ke fie ako nai ha lea fakafonua foʻou, ka naʻe ʻikai ke ke teitei feinga koeʻuhí naʻe ʻikai te ke fakakaukau te ke lava? Naʻá ke fie ʻahiʻahiʻi ha founga feimeʻatokoni foʻou, lelei ange ʻi he fiká, pe ako kakau? ʻOkú ke ʻilo? ʻE lava ke lelei ange hoʻo malava ke akó ʻi he tokoni ʻa e Laumālie Māʻoniʻoní, ko e mēmipa hono tolu ʻo e Toluʻi ʻOtuá!
Ko e laumālie ʻo e akó mo e ʻiló ko e taha ia ʻo e ngaahi meʻa-foaki lahi ʻo e Laumālie Māʻoniʻoní. Te Ne lava ʻo tokoniʻi koe ʻi ha ngaahi founga lahi, kau ai hoʻo akó.
Founga ʻOku Tokoniʻi Ai Koe ʻe he Laumālie Māʻoniʻoní ke Ke Akó
Tā fakatātā ʻe Emily E. Jones
1 Fakapapauʻi ʻoku moʻoni a e meʻa ʻokú ke akó
(Vakai, Molonai 10:5.)
Hangē ko ʻení: ʻOkú ke ongoʻi nonga ʻi ho lotó mo e ʻatamaí hili hoʻo ako ha meʻa ʻoku moʻoni ʻi he seminelí.
2 ʻE lava ʻo tokoni atu ke ke manatuʻi ʻa e meʻa ʻokú ke akó
(Vakai, Sione 14:26.)
Hangē ko ʻení: Lolotonga hoʻo pōtalanoa mo ha kaungāmeʻá, mahalo te ke manatuʻi ha meʻa kuo fuoloa hoʻo taʻe fakakaukau ki aí. ʻE lava ke hoko ʻa e fakakaukau ko iá ko e tali ki heʻenau fehuʻí pe te ne ʻoange ha fakafiemālie kiate kinautolu.
3 Fakamaama ho ʻatamaí mo e mahinó
(Vakai, Tokāteline mo e Ngaahi Fuakava 6:15; ʻAlamā 32:28. ʻOku ʻuhinga ʻa e fakamāmá ke mahino lelei ange ha meʻa.)
Hangē ko ʻení: Kuó ke fāifeinga ke ako ha founga fika foʻou. Hili hoʻo ako mo kole tokoní, ʻe faifai pea mahino ia kiate koe mo ʻene kaunga ki he māmaní.
4 Te Ne lava ʻo fakafonu ʻaki koe ʻa e fiefiá!
(Vakai, Tokāteline mo e Ngaahi Fuakava 11:13.) Te Ne lava ʻo fakafonu koe ʻaki ʻa e fiefiá mo tokoniʻi koe ke ke ʻiloʻi ʻokú ke fakalakalaka pea hoko ʻo hangē ange ko e ʻOtuá.
Hangē ko ʻení: ʻOku haʻu ha taha ʻokú ke ʻofa ai ke akoʻi atu ʻene founga ngaohi supo ʻiloá. ʻOkú ke ongoʻi fiefia koeʻuhí ko e taimi naʻá mo feohi aí pea koeʻuhí naʻá ke ako ha meʻa foʻou!
Ngaahi Fakakaukau ki Hono Fakaafeʻi ʻa e Laumālie Māʻoniʻoní ke ʻIate Koé.
-
Talangofua ki he ngaahi fekaú (vakai, Molonai 8:25–26). Kapau ʻokú ke fiemaʻu ʻa e Laumālie Māʻoniʻoní ke hoko ko hoʻo takaua, ʻoku fiemaʻu ke ke feinga ke muimui ki he ʻOtuá mo talangofua kiate Ia. ʻOku ʻikai fiemaʻu ia ke ke haohaoa, ka ʻe tokoni kapau te ke feinga.
-
Lotu fakamaatoato. “ʻE foaki atu ʻa e Laumālié kiate kimoutolu ʻi he lotu ʻo e tui” (Tokāteline mo e Ngaahi Fuakava 42:14). Lotua ke ʻiate koe ʻa e Laumālie Māʻoniʻoní mo tokoni ʻi he meʻa ʻokú ke akó.
-
Fakafanongo, ako, pea falala ki he ngaahi founga ʻoku lea atu ai ʻa e Laumālie Māʻoniʻoní kiate koé. Ko e laumālie ʻo e akó mo e ʻiló ko e taha ia ʻo e ngaahi meʻa-foaki ʻo e Laumālie Māʻoniʻoní. ʻOku akoʻi kitautolu ʻe he folofolá ʻoku folofola ʻa e Laumālie Māʻoniʻoní ki hotau ʻatamaí mo hotau lotó (vakai, Tokāteline mo e Ngaahi Fuakava 6:15, 22–24; 8:2; 9:7–9).
ʻE lava foki ke folofola atu ʻa e Laumālie Māʻoniʻoní kiate koe ʻi ha ngaahi founga kehe.
-
Ngāue mālohi. Kuo pehē ʻe Palesiteni Lāsolo M. Nalesoni, “ʻOku hōifua ʻa e ʻEikí ki he feingá” (ʻi he Joy D. Jones, konifelenisi lahi ʻo ʻEpeleli 2020 [Ensign pe Liahona, Mē 2020, 16]). ʻE tokoniʻi koe ʻe he ʻOtuá ʻi hoʻo ako mālohí, fai hoʻo lelei tahá, pea fakahoko e ngāue ʻoku fiemaʻu ke ke ako ha meʻá.
Ko Hono Fakaava e Ngaahi Matapā ʻo e Faingamālié
ʻE lava ke tokoniʻi koe ʻe he ako fakaʻatamaí mo e ako ʻi he kotoa hoʻo moʻuí ke ke ʻiloʻi ha ngaahi founga ke ke ʻofa mo tokoniʻi lelei ange ai e niʻihi kehé ʻo laka ange ʻi he meʻa naʻá ke fakakaukau te ke malavá. ʻI hoʻo fekumi ki he Laumālie Māʻoniʻoní lolotonga hoʻo akó, ʻe lava ke fakaleleiʻi ʻe he ʻOtuá hoʻo ngaahi feingá.