“ʻOkú Ne Tokoniʻi Au ʻi he Ngaahi Taimi ʻo e Mamahí,” Ki Hono Fakamālohia ʻo e Toʻu Tupú, ʻEpeleli 2023.
ʻOku ou Faʻa Fai ʻa e Ngaahi Meʻa Kotoa pē ʻia Kalaisi
ʻOku vahevahe ʻe he toʻu tupú ʻa e founga kuo fakamālohia ai kinautolu ʻe Kalaisi ke nau fai ʻa e ngaahi meʻa ʻoku faingataʻa (vakai, Filipai 4:13).
ʻOkú Ne Tokoniʻi Au ʻi he Ngaahi Taimi ʻo e Mamahí
Naʻe ʻikai ke u fie ʻi he nofo kemi ʻa e Kau Finemuí he taʻu kuo ʻosí. Naʻe mālōlō ʻeku kui tangatá ʻi he uike ʻe tolu kimuʻá, pea naʻá ku fie nofo toko taha pē mo mamaʻo mei he tokotaha kotoa pē. ʻI he taimi ne mau aʻu atu aí, naʻá ku ongoʻi naʻe ʻikai totonu ke u haʻu.
Ka neongo ia, ʻi he ʻuluaki ʻahó, naʻe fakahoko ai ʻe homau uōtí ha fakataha lotu he ʻikai toe ngalo ʻiate au. Naʻe lea ha taha ʻo e kau finemui matuʻotuʻa angé ʻo kau ki hono maʻu ʻo e fiefiá. ʻI he kamataʻangá, naʻá ku fakahanga kehe hoku matá. Te u maʻu fēfē ʻa e fiefiá kapau naʻe ʻikai ha meʻa pehē?
Ka naʻá ne lea ʻaki ha meʻa ne teʻeki ke u fakakaukau ki ai: ʻI he taimi ʻoku tau ongoʻi ai he ʻikai ke tau maʻu ha fiefia ʻi ha toe feituʻú, te tau lava ʻo maʻu ia ʻi he Fakamoʻuí. Ko e taimi ʻe niʻihi ʻoku fonu ʻetau moʻui fakamatelié ʻi he mamahí, loto-mafasiá, ʻitá, ngaahi ʻahiʻahí, mo e ngaahi faingataʻa lahi maʻu pē. ʻOku faingataʻa he taimi ʻe niʻihi ke maʻu ʻa e fiefiá tukukehe pē ʻiate Ia.
Neongo naʻe ʻikai haohaoa e meʻa ne u aʻusia ʻe heʻeku nofo kemí, ka naʻá ku maʻu ʻa e fiefiá. Naʻá ku maʻu ia ʻi heʻeku tafoki ki he Fakamoʻuí—ʻi he folofolá, ʻi natulá, pea ʻi he ngaahi momeniti lōngonoa ne u lava ai ʻo lotu ki he Tamai Hēvaní. Talu mei ai kuo tokoniʻi au ʻe he tefitoʻi moʻoni ko ʻení ʻi ha ngaahi faingataʻa lahi. ʻOku ou houngaʻia ʻaupito ʻi he ʻilo ʻe lava ke tokoniʻi kitautolu ʻe he ʻofa haohaoa ʻa e Fakamoʻuí neongo ʻetau ongoʻi ʻoku ʻikai ha fiefiá.
Elise B., Mīsuli, ʻIunaiteti Siteiti ʻo ʻAmeliká