“Te u fakatokangaʻi fēfē nai ʻa e ngaahi aʻusia fakalaumālie fakaʻaho ʻi heʻeku moʻuí?” Ki Hono Fakamālohia ʻo e Toʻu Tupú, ʻEpeleli 2023
Ngaahi Fehuʻí mo e Talí
“Te u fakatokangaʻi fēfē nai ʻa e ngaahi aʻusia fakalaumālie fakaʻaho ʻi heʻeku moʻuí?”
Hiki e Ngaahi Ongó mo e Ngaahi Ueʻi Fakalaumālié
“Fekumi ki ha ngaahi ongo fakafiemālie, fiefia, mo ha ngaahi ueʻi fakalaumālie ke fai lelei. ʻOku haʻu e ngaahi meʻá ni mei he Laumālie Māʻoniʻoní. ʻI hoʻo maʻu kinautolú, hiki ia. ʻE lava ke tokoni hono toe lau e meʻa naʻá ke tohí ke ke ʻiloʻi ai e ngaahi founga ʻoku fetuʻutaki mai ai ʻa e Laumālié kiate koé. Te ne lava foki ke fai ha fakafiemālie ʻi he ngaahi taimi faingataʻá.”
Jordan P., 15, Veisinia, ʻIunaiteti Siteiti ʻo ʻAmeliká
Tokanga Taha ki he Fakamoʻuí
“ʻOku fiemaʻu ke tukutaha ʻetau tokangá ʻi he Fakamoʻuí mo fehuʻi kiate kitautolu pe ko e hā te tau lava ʻo ako mei heʻetau ngaahi aʻusiá.”
Chloe P., 14, ʻAitahō, ʻIunaiteti Siteiti ʻo ʻAmeliká
Fakalau Hoʻo Ngaahi Tāpuakí
“ʻI he taimi ʻoku tau ongoʻi ilifia, veiveiua, pe lōmekina aí, ʻe lava ke tau ongoʻi e Laumālié ʻi heʻetau fakalau hotau ngaahi tāpuakí. ʻOku lava heni ke tau maʻu ha fakamoʻoni ki he lahi ʻo e ʻofa ʻa e ʻOtuá ʻiate kitautolú, pea ʻokú ne fakahaaʻi mai kiate kitautolu ʻa e ngaahi founga ʻokú Ne tāpuekina ai kitautolú. ʻI he taimi ʻoku tau ʻiloʻi ai ʻa e ngaahi tāpuaki ko ʻení, ʻoku tau malava ange ai ke talangofua ki he ngaahi ueʻi ʻa e Laumālie Māʻoniʻoní. ʻOku tau lava ʻo sio ki he ngaahi aʻusia fakalaumālie kuo ʻomi kiate kitautolú mo e founga kuo nau fakamālohia ai kitautolu lolotonga hotau ngaahi faingataʻaʻiá.”
Bella R., 14, ʻAlesona, ʻIunaiteti Siteiti ʻo ʻAmeliká
Loto-houngaʻia pea Fakafanongo
“ʻOku ou fakatokangaʻi ʻa e ngaahi aʻusia fakalaumālie fakaʻahó ʻi heʻeku houngaʻiá, fakafanongo ki he ngaahi ueʻi ʻa e Laumālié ʻi he talangofuá, pea mo hono poupouʻi hoku fāmilí ʻi he ngaahi lotu ʻo e pongipongí mo e poʻulí.”
Richard A., 12, Naisīlia
Fekumi mo ʻAmanaki Lelei ki ha Ngaahi Mana
“Naʻe fakaafeʻi kitautolu ʻe he palōfitá ke tau fekumi mo ʻamanaki ki ha ngaahi mana. ʻI heʻetau muimui ki he faleʻi ʻa e palōfitá, te tau lava ʻo mamata ai ki he toʻukupu ʻo e ʻOtuá ʻi he meʻa kotoa pē kae ʻikai ke tau lau ʻa e ngaahi mana ʻi heʻetau moʻuí ko ha meʻa noa pē.”
Evelyn L., 20, Palāsila
ʻOku ʻAfioʻi ʻe he ʻOtuá ʻa e Meʻa ʻoku Lelei Taha kiate Kimoutolú
“Vakai ki he lelei ʻi he meʻa kotoa pē. Ko e taimi ʻe niʻihi hangē ʻoku fakafepakiʻi koe ʻe he māmaní, ka ʻoku ʻiate koe ʻa e ʻOtuá. ʻOua naʻa teitei ngalo ʻe lava ke hoko e ngaahi ʻaho kovi tahá ko e lelei taha kiate koé. ʻʻI he ʻahiʻahi ʻa hoʻomou tuí … ʻoku mahuʻinga lahi [ange ia] ʻi he kouláʼ (1 Pita 1:7).”
Broc C., 17, ʻIutā, ʻIunaiteti Siteiti ʻo ʻAmeliká