Ua Manaomia i Latou e Faatupuina le Filemu
O Nai Vaega
I le avea ai o ni soo o Iesu Keriso, e tatau ona avea i tatou o faaa’oa’o o le ala e fegalegalea’i ai ma isi—aemaise pe a i ai ni eseesega o o tatou manatu. O se tasi o ala aupito faigofie e faailoa ai se soo moni o Iesu Keriso o le ala e taulima ai ma le agaalofa e lena tagata isi tagata. …
… O Ona soo moni e atia’e, siitia, faamalosiau, faasufi, ma musuia—po o le a lava le faigata o le tulaga. O soo moni o Iesu Keriso o ni tagata e faatupuina le filemu. …
O le Togiola a le Faaola ua mafai ai e i tatou ona manumalo i mea leaga uma —e aofia ai finauga. …
O’u uso e ma tuafafine pele, e matuā taua lava le auala tatou te taulima ai e le tasi le isi! O le ala tatou te tautatala atu ai i isi ma e uiga i isi i le fale, i le lotu, i le galuega, ma upega tafa’ilagi e taua tele. O le asō o le a ou talosagaina ai i tatou e fegalegalea’i ma isi i se ala maualuga atu ma sili ona pa’ia. …
O le alofa mama o le vailaau lea o finauga. O le alofa mama o le meaalofa faaleagaga lea e fesoasoani ia i tatou e lafoa’i ese ai le tagata natura, o lē e manatu faapito, taupunipuni, faamaualuga, ma lotoleaga. O le alofa mama o le uiga ‘autu lea o se soo moni o Iesu Keriso. O le alofa mama e faamatalaina ai sē e faatupuina le filemu. …
… Ou te valaaulia outou ia manatua Iesu Keriso. Tatalo ia maua le lototele ma le poto e ta’u atu ai pe faia le mea semanu Na Te faia. A o tatou mulimuli i le Alii o le Filemu, o le a avea i tatou ma ē e faatupuina le filemu. …
… O le asō ou te valaaulia outou e suesue lou tulaga faaleso’o i totonu o le vaaiga i le auala e te taulimaina ai isi. Ou te faamanuia ia te oe ina ia e faia soo se fetuuna’iga e ono manaomia ina ia malualii, ma faaaloalogia lau amio, ma o se sui lava o se soo moni o Iesu Keriso.