Pe E Te Silafia le Pogai Ua Ou Talitonu Ai o Se Kerisiano ia Keriso?
O Nai Vaega
I se tasi afiafi i le manava ai o galuega, i tausaga ua mavae, sa pu’e ai la’u pasi masani agai i New Jersey mai le Aai o Niu Ioka. Sa iloa mai e le tamaitai sa nofo i o’u autafa le mea sa ou tusia i luga o la’u komepiuta ona fesili mai lea, “E te talitonu ia … Keriso?” …
… Tamaiti ma le autalavou: faamolemole e mafai ona tou fesili i tou matua po o se taitai i se taimi mulimuli ane, “Pe aisea na tatau ai ona maliu Iesu?” …
Ia, sa ou faailoa atu i la’u uo fou e i ai so tatou agaga e faaopoopo i se tino ma o le Atua o le Tama o o tatou agaga. … Ona e alofa o Ia ia te ia ma Ana fanau uma, sa Ia faia ai se fuafuaga mo i tatou ia maua se tino i le faatusa o Lona tino faamamaluina, avea o se vaega o se aiga, ma toe foi atu i Lona afioaga alofa e olioli ai i le ola e faavavau ma o tatou aiga, faapei ona Ia faia i Lona aiga. Ae, sa ou fai atu, o le a tatou fetaiai ma faalavefau autu se lua i lenei lalolagi pa’ū: (1) o le oti faaletino—o le tuueseeseina o o tatou tino mai o tatou agaga. … Ma le lona (2) o le oti faaleagaga—o lo tatou tuueseeseina mai le Atua ona o a tatou agasala, mea sese, ma faaletonu a’o faavāvāmamaoina e le olaga faitino i tatou mai Lona afioaga paia. …
Sa ou molimau atu i la’u uo, ma ou te molimau atu foi ia te outou, o Iesu Keriso o [le] Faaola, sa o’o ina puapuagatia o Ia, maliu, ma toetu mai—Lana Togiola e le i’u—e togiola ai tagata uma mai le oti faaletino ma aumaia ai le ola faavavau faatasi ma le Atua ma o tatou aiga ia i latou uma o e mulimuli ia te Ia. …
O laasaga na faaali mai e le Atua e tatau ona tatou laasia e mulimuli ai ia Iesu ma maua le ola e faavavau, ua ta’ua o aoaoga faavae a Keriso. E aofia ai le “faatuatua ia Iesu Keriso ma Lana Togiola, salamo, papatisoga [i Le Ekalesia a Iesu Keriso o le Au Paia o Aso e Gata ai], mauaina o le meaalofa o le Agaga Paia, ma tumau e oo i le iuga.”[Tala’i La’u Talalelei (2019), 63].