Mauaina o le Filemu Patino
O Nai Vaega
O le asō o le a ou tautala ai i mea ua ou aoaoina e uiga i le vavega o le mauaina o le filemu patino, po o le a lava o tatou tulaga o iai. …
E tusa ma le lima upumoni ua ou aoaoina mai [i] aoaoga a le Faaola.
Muamua, o le meaalofa o le filemu e tuuina mai i le mavae ai o le i ai o lo tatou faatuatua e tausi ai Ana poloaiga. …
Lona lua, o le a afio mai le Agaga Paia ma nofo faatasi ma i tatou. …
Lona tolu, ua folafola mai e le Faaola a o tatou tausia a tatou feagaiga, e mafai ona tatou lagona le alofa o le Tama ma le Alo mo le tasi ma le isi ma mo tatou. …
Lona fa, o le tausia o poloaiga a le Alii e tele atu mea e manaomia ai nai lo na o le usiusitai. E tatau ona tatou alolofa i le Atua ma o tatou loto, malosi, mafaufau, ma agaga atoa. …
Lona lima, e manino lava ua lava ma totoe le alofa o le Alii mo i tatou ua totogi ai le tau o a tatou agasala ina ia tatou mafai ai—e ala i lo tatou faatuatua ia te Ia ma lo tatou salamo, e ala atu i aafiaga o Lana Togiola—ona maua le meaalofa o le filemu lea e “silisili lava i mea uma e manatu i ai,”[Filipi 4:7], i le olaga nei ma faatasi ma Ia e faavavau. …
Ua lagona e tagata o le au paia i le Ekalesia aoao le meaalofa a le Alii o le filemu patino. Ua ia uunaia tagata uma ia fesoasoani i isi ia maua avanoa e toe o mai ai ia te Ia ma ia agavaa mo lena lava filemu mo i latou lava. Ma, o le mea e sosoo ai, o le a latou filifili e saili musumusuga ina ia iloa ai le ala e mafai ona latou tufa atu ai lena meaalofa i isi.
O lenei tupulaga faia’e o le a avea ma e e faafailele i tupulaga e mulimuli mai. O le aafiaga faateleina o le a tulai mai ai se vavega. O le a salalau ma tuputupu ae i le aluga o taimi, ma o le a tapena ma saunia le malo o le Atua i luga o le fogaeleele e faafeiloai o Ia ma alalaga o le osana. O le a i ai le filemu i le lalolagi.