O Le Tala Aupito Silisili o le Eseta Na Faamatalaina
O Nai Vaega
E faapefea ona tatou faataitaia le aoaoga ma le faamanatuina o le Toetu o Iesu Keriso, le tala o le Eseta, ma le paleni e tasi, le atoaga, ma le ’oa o agamasani faalelotu o le soifua mai o Iesu Keriso, le tala o le Kerisimasi? …
… E le gata i fuaiupu taua e uiga i le Eseta i le Feagaiga Fou, o i tatou o ni Au Paia o Aso e Gata Ai ua faamanuiaina i se meaalofa aupito ofoofogia o le Eseta! … O loo ou faatatau i le Tusi a Mamona ma e patino lava, i le tala ia Iesu Keriso na faaali atu i ē nonofo i le Lalolagi Fou i Lona mamalu toetu. …
… Ua matou faamoemoe e fai mataupu nei o le 3 Nifae e avea ma a matou agamasani o le Eseta e faapei foi o la matou agamasani i le Luka 2 o le Kerisimasi. O le mea moni, ua faasoa mai e le Tusi a Mamona le tala aupito silisili ua faamatalaina o le Eseta. Aua ne’i avea ma tala aupito sili o le Eseta e lei faamatalaina lava.
Ou te valaaulia outou e vaavaai i le Tusi a Mamona i se malamalama fou ma mafaufau i le molimau maoa’e o loo tuu mai ai i le moni o le Keriso toetu faapea foi le tamaoaiga ma le loloto o le aoaoga faavae a Keriso. …
O Lana asiasiga o se Faaola toetu, na folasia mai e le Atua le Tama, o se savali aupito sili ona mamalu ma manumalo o le Eseta. O le a fesoasoani i tagata o o tatou aiga e maua ai se molimau patino ia Iesu Keriso o lo tatou Faaola ma le Togiola, o lē na talaia noataga o le oti.