Mauaina o le Mana o le Atua e ala i Feagaiga
O Nai Vaega
A o lei foafoaina le lalolagi, sa faatuina e le Atua ia feagaiga e avea o se auala e mafai ai e i tatou, o Lana fanau, ona soofaatasi atu i tatou lava ia te Ia. …
… Ua na o le taimi lava tatou te faamoemoe ai e tuuto atu i tatou lava i se tulaga ese e faataunuuina ai, tatou te osia ai se feagaiga. E avea i tatou o fanau o le feagaiga a le Atua ma suli o Lona malo, aemaise pe a tatou taumafai malosi e avea a tatou feagaiga o se vaega tutotonu o lo tatou faasinomaga.
O le faaupuga ala o feagaiga e faasino i se soloa’iga o feagaiga, lea tatou te o mai ai ia Keriso ma faamalolosia lo tatou sootaga ma Ia. E ala i lenei noataga i feagaiga, tatou te maua ai Lona mana faavavau. E amata le ala i le faatuatua ia Iesu Keriso ma le salamo, sosoo ai ma le papatisoga ma le mauaina o le Agaga Paia. …
O le ala o feagaiga e tau atu i sauniga o le malumalu, e pei o le faaeega paia i le malumalu. O le faaeega paia o le meaalofa lea a le Atua o feagaiga paia ia e faafesootai atoatoa atu ai i tatou ia te Ia. …
O le tausia o feagaiga na osia i vai o le papatisoga ma i malumalu e aumaia ai foi ia i tatou le malosiaga e tatalia ai tofotofoga ma lototiga o le olaga nei. …
A o outou savavali i le ala o feagaiga, mai le papatisoga i le malumalu i o outou olaga atoa, ou te folafola atu ia te outou le mana e faasagatau atu ai i tafega masani faalelalolagi—le mana e aoao mai ai, le mana e salamo ai ma ia faapaiaina, ma le mana e maua ai le faamoemoe, mafanafana, ma le olioli a o outou feagai ma luitau o le olaga. Ou te folafola atu ia te oe ma lou aiga le puipuiga mai tosinaga a le fili, aemaise ai pe a avea le malumalu o se taula’iga tele i lou olaga.