Tasi ia Keriso
O Nai Vaega
E na o Iesu Keriso lava e mafai ai ona tasi i tatou.
E tupu le tasi ia Keriso i lea tasi ma lea tasi—tatou te taitasi ma amata ia i tatou lava. O i tatou o ni tagata itūlua o le tino ma le agaga ma o nisi taimi tatou te fetaua’i ai lava i tatou i totonu. …
O Iesu foi o se tagata o le tino ma le agaga. Sa tofotofoina o Ia; e malamalama o Ia; e mafai ona fesoasoani o Ia ia i tatou e ausia le lotogatasi i totonu. …
… O le “ofuina o Keriso” e aofia moni ai lava ma le avea o Lana “poloaiga muamua ma le sili”[tagai i le Mataio 22:37–38] o la tatou foi tautinoga muamua ma le aupito sili, ma afai tatou te alolofa i le Atua, o le a tatou tausia Ana poloaiga.
O le tutu faatasi ma o tatou uso ma tuafafine i le tino o Keriso e faatupula’ia pe a tatou gauai atu i le poloaiga lona lua—e fesootai lelei i le muamua—ia alolofa atu i isi e faapei o i tatou lava. …
Pe a tatou “ofuina Keriso,” e mafai ona foia pe lafoa’i eseesega, feeseesea’iga, ma maseiga. …
O le lotogatasi e le manaomia ai le tutusa, ae e manaomia ai le ogatusa. E mafai ona lalagaina faatasi o tatou loto i le alofa, ia tasi i le faatuatua ma le aoaoga faavae, ma mafai lava ona tapuai mo ni ‘au eseese, feeseesea’i i mataupu faapolotiki, felafolafoa’i e uiga i sini ma le ala sa’o e ausia ai, ma le tele o isi mea faapena. Ae e le mafai lava ona tatou feeseesea’i pe finau ma le ita po o le inoino o le tasi i le isi. …
Ou te toe fai atu ua na o lo tatou tuuto faamaoni lava ma le alofa ia Iesu Keriso e mafai ai ona tatou faamoemoe ia tasi—tasi i totonu, tasi i le aiga, tasi i le Ekalesia, ma i’u ai ina tasi i Siona, ma e sili atu i mea uma, tasi ma le Tama ma le Alo ma le Agaga Paia.