Faamanuiaga Faapeteriaka
Ekuatoa
O Lou Faamanuiaga Faapeteriaka—Taitaiga Musuia mai le Tama Faalelagi
Sa matuai taua lava lo’u faamanuiaga faapeteriaka ia te a’u a’o ou laitiiti mo le tele o mafuaaga. Muamua, e ala atu i le mana o le Agaga Paia, sa fesoasoani lo’u faamanuiaga faapeteriaka ou te malamalama ai i lo’u faasinomaga moni e faavavau—po o ai moni lava a’u ma po o ai o le a avea ai a’u. … Sa ou iloa sa iloa ma alofaina a’u e lo’u Tama Faalelagi ma lo’u Faaola, ma sa La’ua aafia patino i lo’u olaga. Na fesoasoani lea mea ou te manao ai ia faalatalata atili atu ia i La’ua ma faateleina lo’u faatuatua ma le talitonuina o i La’ua. …
O le iloa o ai moni lava a’u sa fesoasoani ou te malamalama ai ma manao e fai le mea sa faamoemoe mai ai le Atua ia te a’u.
O lenei mea na taitaiina ai a’u e suesue i feagaiga na ou osia ma faamanuiaga folafolaina i le feagaiga a le Atua ma Aperaamo. Na tuuina mai ai ia te a’u se vaaiga e faavavau lea na musuia ai a’u ia tausia ma le atoatoa faateleina a’u feagaiga. …
Sa taua ia te a’u le maua o lo’u faamanuiaga faapeteriaka a o o’u laitiiti ma a o tuputupu a’e pea la’u molimau. …
… O le teufatuina o lo’u faamanuiaga faapeteriaka a o ou laitiiti ua faamanuiaina ai a’u i le lototele pe a ou lotovaivai, mafanafana pe a ou fefe, filemu pe a ou lagona le popolevale, faamoemoe pe a ou lagonaina le leai o se faamoemoe, ma le olioli pe a ua sili ona ou manaomia ai. O lo’u faamanuiaga faapeteriaka sa fesoasoani e faateleina lo’u faatuatua ma faalagolago i lo’u Tama Faalelagi ma lo’u Faaola. Ua faateleina ai foi lo’u alofa mo i La’ua—ma o loo faia pea.
O Afea e Tatau Ona Maua Ai Lo’u Faamanuiaga Faapeteriaka
O’u atalii talavou, tamaitai talavou, matua, ma epikopo pele, o faamanuiaga faapeteriaka ua le mo na o le tapenapena ai e auauna atu i se misiona. E mafai e tagata agavaa ua papatisoina ona maua o latou faamanuiaga faapeteriaka pe a ua tonu le taimi mo i latou. …
Uso e ma tuafafine, ou te molimau atu o loo soifua le Tama Faalelagi ma Lona Alo Pele, o le Alii o Iesu Keriso. E alolofa i La’ua ia i tatou. O faamanuiaga faapeteriaka o meaalofa paia mai ia i La’ua. A e mauaina lou faamanuiaga, o le a e iloa ai ma lagonaina lo La’ua alolofa ia te oe ma lo La’ua taulai atu ia te oe lava ia.