« ’A fa’a’ite i te mea tā ’outou i here », Nō te pūai o te feiā ’āpī, Tiurai 2023.
’A fa’a’ite i te mea tā ’outou i here
Tō ’outou here nō te ’evanelia, nō vetahi ’ē, ’e nō te Fatu, e ha’apūa’i ïa ia ’outou ’ia fa’a’ite i te ’evanelia.
Nō teie ’ōpuara’a, nā Yongsung Kim, Havenlight.com
’Ua tere mātāmua vau i te Ribble ’ānāvai i Preston (Peretāne) ’a tāvini ai au ’ei misiōnare ’āpī i roto i te misiōni nō Peretāne. I reira, ’ua bāpetizo te āpōsetolo ’e te misiōnare Heber C. Kimball i te feiā fa’afāriu mātāmua o te ’Ēkālesia a Iesu Mesia tei fa’aho’i-fa’ahou-hia mai, i rāpae’au ia Marite Apato’erau i te ’āva’e Tiurai 1837.
’A ti’a noa ai au i ni’a i te ’ē’a turu ma te hi’o atu i te ’ānāvai ’e ’a feruri noa ai au i te mea i tupu i reira, ’ua fāri’i au i te hō’ē ’itera’a pāpū hau atu te pūai nō Iesu Mesia ’e nō tāna ’evanelia tei fa’aho’ihia mai.
’Ua riro tā’u misiōni ’ei ’itera’a fa’ahiahia roa ’e te faufa’a rahi i roto i tō’u orara’a. I teie mahana, pinepine au i te feruri i te ’oa’oa ’o tā’u i fāri’i ’a hōro’a ai au i te hō’ē tuha’a rahira’a o tō’u orara’a, nō te fa’a’ite i te ’evanelia a Iesu Mesia. ’Aita e ti’a iā’u ia feruri i te tahi mea faufa’a roa a’e.
Te tītaura’a ’ia fa’a’ite i te ’evanelia
’A feruri na, i riro nā ’outou ’ei pipi nā Iesu Mesia i te tau nō tōna ti’afa’ahoura’a. E ’ere ānei i te mea fa’ahiahia ’ia hi’o atu iāna ’e ’ia fa’aro’o i tāna poro’i ?
Te parau poro’i teimaha a te Fatu tei ti’afa’ahou ’o te ani-manihini-ra’a ïa ’e te fa’auera’a ’ia fa’a’ite i tāna ’evanelia. ’Ua parau ’oia, « e haere ’outou e fa’ariro i te mau fenua ato’a » (Mataio 28:19), ’e « e haere ’outou e ati noa a’e te mau fenua ato’a, e fa’a’ite haere i te ’evanelia i te ta’ata ato’a » (Mareko 16:15).
’Ua parau Russell M. Nelson ē, « ’aita te ’evanelia a Iesu Mesia i hina’aro-’ono’ono-hia a’enei hau atu i teienei mahana. E hōpoi’a mo’a nā tātou i te fa’a’itera’a atu i te mana ’e te hau o Iesu Mesia i te mau ta’ata ato’a ’o te fa’aro’o, ’e ’o te vaiiho i te Atua ’ia upo’oti’a i roto i tō rātou orara’a ».1
Tē hina’aro nei te Fatu ia ’outou i teienei
Tē ora nei ’outou i te hō’ē tau ta’a ’ē ’e te faufa’a—te tau tu’ura’a hope’a hou te tae-piti-ra’a mai o Iesu Mesia. I tohu ai te peropheta Iosepha Semita ē, hou te Fatu e ho’i fa’ahou mai ai, « e haere noa rā te parau mau a te Atua i mua, ma te mata’u ’ore, ma te hanahana ’e te ti’amā, ē tae noa atu i te taime ’ua tomo atu i roto i te mau fenua ato’a, ’ua tae atu i te mau tuha’a fenua ato’a, ’ua parare te reira i roto i te mau hau ato’a, ’e ’ua fa’aro’ohia te reira e te mau ta’ata ato’a, ē tae noa atu ’ua hope te mau ’ōpuara’a a te Atua i te fa’atupuhia ’e ’a parau mai ai ’o Iehova Rahi ē ’ua oti te ’ohipa ».2
Nā vai e haere e tauturu i te fa’atupu i te reira ? Nā ’outou !
’Aita ’outou e tītauhia ’ia riro ’ei misiōnare rave tāmau nō te ha’aparare i te ’evanelia. Tē hina’aro nei te Fatu ia ’outou i teienei ’ia riro te fa’a’itera’a i tāna ’evanelia ’oa’oa ’e te faufa’a mure ore, nā roto i te parau ’e te ’ohipa, ’ei peu iho ’a nā ’outou ’e ’ei tuha’a nō tō ’outou huru.
’A fa’atumu i ni’a i te here
Te tumu faufa’a roa a’e nō reira tātou e fa’a’ite ai i te ’evanelia ’oia ho’i, ’ua ani mai te Fatu ia tātou. I te tahi taime, e riro te reira ’ei mea fifi, tē fafau atu nei rā vau ia ’outou ē, ’ia fa’atumu ana’e ’outou i ni’a i te Fatu ia Iesu Mesia ’e i ni’a i tō ’outou here iāna ’e i tōna here ia ’outou, e arata’ihia ïa ’outou i roto i tā ’outou mau tauto’ora’a.
’Ua ti’afa’ahou ’oia, nā Greg Olsen
Nā tō ’outou here i te ’evanelia, nō vetahi ’ē, ’e hau roa atu, nā tō ’outou here i te Fatu e ha’apūai ia ’outou ’ia fari’i i tāna ’anira’a hanahana ’ia fa’a’ite i tāna ’evanelia.
’A here i te ’evanelia
’Ua parau te Fatu, « ia ha’api’ihia ’outou e au » (Te Ha’api’ira’a Tumu ’e te mau Fafaura’a 19:23 ; Mataio 11:29). Rahi noa atu tō ’outou tuatāpapara’a i te ’evanelia ’e te ha’api’ira’a mai nō ni’a ia Iesu Mesia ’e tāna misiōni mo’a ’ei Fa’aora ’e ’ei Tāra’ehara, e rahi roa ato’a atu ā tō ’outou here i te ’evanelia.
E fa’a’ite ’outou i tō ’outou here i te ’evanelia ma te orara’a i te reira. ’Ua ha’api’i mai te ’apōsetolo Paulo, « ’ei ha’apa’ora’a rā ’oe nā tei fa’aro’o ra, i te parau, i te haere’a, i te aroha, i te huru o te ’ā’au, i te fa’aro’o, i te vi’ivi’i ’ore ».(1 Timoteo 4:12). Mea pinepine te mau ta’ata i te fāri’i i te ’evanelia nō te mea ’ua fāri’i rātou i te mau ’itera’a maita’i nō ni’a i te mau melo o te ’Ēkālesia. Nō reira, ’eiaha roa e ora i roto i te pārurura’a pae vārua. « ’Ia ’ana’ana tō ’outou māramarama » (Mataio 5:16) ’e ’a fa’a’ite ia vetahi ’ē, ’ua riro te ’evanelia ’ei tuha’a faufa’a rahi nō tō ’outou huru ’e te mea tā ’outou e rave nei.
Here ia vetahi ’ē
’A feruri i tō ’outou mau hoa. Tē fa’a’ite ra ānei ’outou i te mau hōho’a teata, te pehe ’e te mā’a tā ’outou e au nei ia rātou ? Tē fa’a’ite ra ānei ’outou i tā ’outou mau tārēni ’e tā ’outou mau fa’a’ana’anataera’a ? ’Ua uiui paha ’outou ia ’outou iho, e pāhono ānei rātou i te ’evanelia mai te mea e fa’a’ite atu ’outou i te reira ia rātou. E’ita roa ’outou e ’ite maori rā ’ia tāmata ’outou. ’Ua ha’api’i mai te peresideni Nelson, « E ti’a i te mau ta’ata ato’a ’ia fāna’o i te ’itera’a i te ’evanelia a Iesu Mesia tei fa’aho’i-fa’ahou-hia mai ».3
’A toro i te rima ma te here i te mau hoa, te mau melo o te ’utuāfare, te mau ta’ata tupu, te mau hoa i te fare ha’api’ira’a ’e ia vetahi ’ē—ma te ha’amana’o ē e mau taea’e ’e e mau tuahine rātou nō tātou ’e e mau tamari’i herehia nā tō ’outou Metua i te ra’i—’e e mea ōhie a’e nō ’outou ’ia fa’a’ite i te ’evanelia ia rātou.
’A here i te Fatu
’Ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, tā tātou poro’i i tō te ao nei, ’oia ho’i tē ora nei Iesu Mesia ! ’Ua fa’ati’a ’oia ia tātou tāta’itahi ’ia fāri’i i te fa’aorara’a ’e te fa’ateiteira’a.
E ’ite ’outou i te here o te Fatu nō ’outou, ’a feruri ai ’outou i te mau mea ato’a tāna i rave nō ’outou. E ’ī tō ’outou vāerua i te here nōna ’e e ’ite ’outou ē, e’ita ’outou e nehenehe e pāto’i ia ’outou ’ia fa’a’ite i te mau parau mau fa’ahiahia tā ’outou i fāri’i nō ’ō mai iāna ra.
E ’ī ’outou i te ’oa’oa rahi
Tō’u ’itera’a pae vārua fa’auruhia i ni’a i te ’ē’aturu nō te ’ānavai nō Ribble ’ei misiōnare ’āpī, ’ua hōro’a mai iā’u i te ’oa’oa mure ’ore tei fafauhia i te feiā e fa’a’ite i te ’evanelia (hi’o Te Ha’api’ira’a Tumu ’e te mau Fafaura’a 18:15).
’Ei ’āpōsetolo nō te Fatu Iesu Mesia, ’ua pāpū roa atu ā iā’u i teie mahana ē, te fa’a’itera’a i te ’evanelia e ’oa’oa ïa ’e e fa’a’itera’a hōhonu i tō tātou here nō te ’evanelia i fa’aho’i-fa’ahou-hia mai, nō te mau tamari’i a te Atua ’e nō te Fatu.
Tē parauparau nei Elder Cook i te feiā ’āpī tei fa’aorahia mai nā te Taal Volcano i Batangas, Firipino, i te 15 nō Tēnuare 2020.
Tē fa’a’ite pāpū nei au ē, ’a fāri’i ai ’outou i te ’anira’a a te Fatu ’e te fa’a’itera’a i te mea tā ’outou i here, tē tauturu nei ’outou iāna ’ia patu i tāna ’Ēkālesia ’e ’ia fa’aineine i te ao nei nō tōna ho’ira’a mai, ’ia « fa’atere ’oia ’ei Ari’i nō te mau Ari’i ’e… Te Fatu o te mau Fatu »,4 Tē pure nei au ē ’ia pe’e ’outou iāna ’e ’ia fa’a’ite i tāna ’evanelia i te roara’a o tō ’outou orara’a.