« Hitu mahana fa’a’itera’a », Nō te pūai o te feiā ’āpī, Tiurai 2023.
Hitu mahana fa’a’itera’a
E nehenehe tā ’outou e fa’a’ite i te ’evanelia ma te ’ōhie ’e te au māite. ’Ua ineine ānei ’outou nō te tata’ura’a ?
’Ia parauparau ana’e tātou nō ni’a i te fa’a’itera’a i tō tātou ’itera’a pāpū, mea pinepine tātou i te feruri i te fa’a’ite i tō tātou ’itera’a pāpū i roto i te purera’a ’ōro’a ’e ’aore rā, i te tahi atu vāhi i fa’ata’ahia. Terā rā, ’ua fa’aitoitohia tātou i « te ’imira’a […] i te mau taime ato’a i te mau rāve’a nō te fa’a’ite i tō ’outou fa’aro’o i roto i te mau fārereira’a i te ta’ata ma te ’ōhie ’e te au māite. »1
I roto i te tītaura’a nō nā mahana e hitu i raro nei, e nehenehe ’outou e fa’a’ite i tō ’outou ’itera’a pāpū nā roto i te tahi rāve’a ta’a ’ē i te mau mahana ato’a nō te hō’ē hepetoma. Nā ’outou e mā’iti e aha tē rave nā mua, ’e ’aore rā e fa’a’ohipa i tō ’outou iho mau mana’o ! ’Ua ineine ānei ?
Fa’ahōho’ara’a nā Emily Davis
Mahana 1 : ’Ēkālesia
E nehenehe ’outou e fa’a’ite i tō ’outou ’itera’a pāpū i roto i te purera’a ha’apaera’a mā’a ’e te ’itera’a pāpū i te fare purera’a, mai te mea terā te tahi mea tē au hia e ’outou. Mai te mea ’aita, e nehenehe ïa ’outou e nā reira i te fare purera’a ma te ’āmui atu i tā ’outou mau piha ha’api’ira’a i te sābati ’e i te séminaire. E ha’amaita’i te mau mana’o tā ’outou e fa’a’ite i reira ia vetahi ’ē ’e e ha’apūai i tō rātou mau ’itera’a pāpū ’e tō ’outou iho.
Mahana 2 : Te mau hoa
E aha tā ’outou i ’apo mai i te purera’a i te Sābati ? ’Ua au ānei ’outou i te mea i parauhia i roto i te a’ora’a i te purera’a ’ōro’a ’e ’aore rā i roto i tā ’outou piha ha’api’ira’a ? Pēnei a’e ’o te hīmene mātāmua te hō’ē o te mau hīmene i au hia e ’outou. ’A parau atu i te tahi hoa nō te reira ! I muri iho, ’a ui ato’a atu nō ni’a i tā rātou hope’a hepetoma.
Mahana 3 : Rāve’a tūreiara’a tōtiare
E vāhi au maita’i te rāve’a tūreiara’a tōtiare nō te fa’a’ite i te mau mea o te pae vārua ma te ’ōhie ’e te au māite. Nō teie mahana o te tata’ura’a, ’a feruri na i te fa’a’ite atu i te hō’ē parau pia nō ni’a i te :
-
Hō’ē o tā ’outou mau ’īrava au roa a’e.
-
Hō’ē fa’ahitira’a parau fa’ahiahia nō roto mai i te ’āmuira’a rahi.
-
Hō’ē parau fa’aitoito nō te pae vārua ’e ’aore rā, te hō’ē ’ohipa pae vārua i tupu.
-
Hō’ē mea tā ’oe i au ’e ’aore rā i māuruuru nō ni’a i te Fa’aora.
-
Hō’ē rāve’a tāna i tauturu ia ’outou ’aita i maoro a’e nei ’e ’aore rā, i te hō’ē huru maita’i tā ’outou e fa’ahiahia nei i roto iāna ’e nō te aha ra.
Mahana 4 : Poro’i pāpa’i ’e ’aore rā video
Hāpono i te tahi poro’i fa’aitoito i te hō’ē hoa nā roto i te niuniu ’e ’aore rā, te video. E nehenehe ’outou e fa’a’ite i te tahi a’ora’a nō te ’āmuira’a tā ’outou e mana’o ē e au ato’a rātou, e nehenehe ’outou e parau atu ia rātou i te tahi mea tā ’outou e māuruuru nei nō rātou, ’e ’aore rā, e fa’a’ite atu i tō ’outou fa’aro’o i roto ia Iesu Mesia. ’Ei hi’ora’a, e ti’a paha ia rātou ’ia ’ite i te here o te Metua i te ao ra nō rātou. E nehenehe tā ’outou e parau ti’a atu i mua ia rātou !
Mahana 5 : Tāvinira’a
E uiui paha ’outou ē, nāhea te tāvinira’a ia vetahi ’ē e nehenehe ai e riro ’ei rāve’a nō te fa’a’ite i tō ’outou ’itera’a pāpū. ’Ua a’o te ’apōsetolo Paulo ia Timoteo : « ’Ei ha’apa’ora’a rā ’oe nā tei fa’aro’o ra, i te parau, i te haere’a, i te aroha, i te huru o te ’ā’au, i te fa’aro’o, i te vi’ivi’i ’ore » (1 Timoteo 4:12). Nō reira e nehenehe ’outou e fa’a’ite i tō ’outou ti’aturira’a nā roto i tō ’outou hi’ora’a, nā roto i te tāvinira’a ia vetahi ’ē mai tā te Fa’aora e tāvini ia rātou.
Mahana 6 : Anoihi
I te tahi taime e fa’a’ohipa te ta’ata i te anoihi ’ei rāve’a ta’a ’ē nō te fa’a’ite i tō rātou mau mana’o ’e tō rātou mau ferurira’a ’e te mau nīoa parau. E nehenehe ’outou e fa’a’ohipa i te mau hōho’a pēni, te mau nana’ora’a, te ’ōrero, te pehepehe, ’e ’aore rā te tahi atu mau huru anoihi e rave rahi nō te fa’a’ite i tō ’outou mana’o nō ni’a ia Iesu Mesia ’e tāna ’evanelia.
Mahana 7 : Te mau ’āparaura’a o te mau mahana ato’a
’Eiaha e mata’u ’ia fa’ahiti i tō ’outou mau ti’aturira’a i roto i te mau vāhi huru rau, mai tā ’outou e fa’a’ite atu i te tahi mau mana’o tā ’outou i fāri’i nō ni’a i te hō’ē tumu parau ’ē.
’Oia mau, e nehenehe ’outou e paraparau nō ni’a i te mau ’ātivite a te ’Ēkālesia ’e ’aore rā, i te tahi pāpa’ira’a mo’a tā ’outou i tai’o a’e nei, terā rā, e nehenehe ato’a e fa’a’ōhie atu i te reira. ’Ei hi’ora’a :
-
Mai te mea ē, e tae te mana’o au i te nātura, ’a fa’a’ite i tō ’outou māuruuru nō te mau poietera’a a te Atua i te tahi atu ta’ata.
-
Pēnei a’e ’aita i maoro a’e nei ’ua fāri’i ’outou i te hō’ē ’itera’a pae vārua. ’A ’āparau i te tahi hoa nō ni’a i te reira mai te mea e ti’a.
-
’A ’imi i te mau fa’ahōho’ara’a ’evanelia i roto i te tahi buka ’e ’aore rā rīpene teata tā ’outou e au, ’e ’a fa’a’ite i tō ’outou mau mana’o.
Ma te ’ōhie ’e te au māite
’A ’ite ai ’outou i te mau rāve’a rau nō te fa’a’ite i tō ’outou mau ti’aturira’a, e riro mai te reira ’ei mea au māite a’e nō ’outou ’ia nā reira. E mea huru ’ē ri’i paha i te ha’amatara’a, e toro iho ā rā ! ’A ha’amana’o ē, mea au māite a’ena tō ’outou iho ’itera’a pāpū—e tuha’a te reira nō tō ’outou iho huru. Te fa’a’itera’a i te reira e riro ïa ’ei ’ohipa au māite. Te mea noa e tītauhia, ’o te fa’a’ite-ri’i-noa-ra’a ïa i te reira i te mahana tāta’itahi.
Nāhea ’outou ’ia fa’a’ite i tō ’outou ’itera’a pāpū i teienei mahana ?