Parau ’āfaro atu

’E mai te mea e parau mai te hō’ē ta’ata iā’u ē, tē fa’ahapa nei te ’aivāna’a i te hō’ē mea tā tātou e ti’aturi nei ?

’Ua ha’api’i te peresideni Russell M. Nelson ē : « ’O te Atua te puna nō te mau parau mau ato’a. Tē fāri’i nei Te ’Ēkālesia a Iesu Mesia i te Feiā Mo’a i te mau Mahana Hope’a nei i te parau mau ato’a tā te Atua e fa’atae mai i tāna mau tamari’i, tei ha’api’ihia mai i roto ānei i te hō’ē fare tuatāpapara’a ’ihi, ’e ’aore rā, tei fāri’ihia nā roto ānei i te heheura’a ’āfaro ti’a nō ’ō mai iāna ra » (« E aha te mea e parau mau ? » ’Āmuira’a rahi nō ’Ātopa 2022 [Liahona, Novema 2022, 30]).

Mai te mea e parau te ta’ata ē, tē fa’ahapa nei te ’aivāna’a i te hō’ē parau mau o te ’evanelia, teie te tahi mau mea e tāpe’a noa i roto i te ferurira’a :

E mea ti’a ’ia noa’a mai te parau mau. ’A ’imi e aha tā te ’aivāna’a e parau nei (’e ’aita e parau nei), ’e e aha tā te ’evanelia a Iesu Mesia i fa’aho’ihia mai e parau nei (’e ’aita e parau nei). ’A tuatāpapa nā mua roa i te mau pāpa’ira’a moa ’e te mau parau a te mau peropheta.

E ’ite pāpū te ’ite pae vārua. ’Ua riro te ihi ’ei rave’a nō te ha’api’i mai i te mau parau mau nō ni’a i te ao tahuti nei. E mau parau mau rā tā te Atua e hōro’a mai ia tātou nā roto ana’e i te heheura’a. E nehenehe ’oe e fa’atupu i te fa’aro’o nō ni’a i te Vārua Maita’i ē « tē parau ra ’oia i te huru mau o te mau mea e vai nei » (Iakoba 4:13).

E tītau te fa’aro’o i te fa’a’oroma’i. E fa’atītī’aifarohia te ’ite ’aivāna’a i te roara’a o te tau. I te tahi taime e tītau-noa-hia ’ia tīa’i i te ihi nō te fa’ananea i tō rātou ’ite ’ia tūea i tō te parau mau mure ’ore i heheuhia mai. E nehenehe tā tātou e mau māite i ni’a i te mau parau mau pae vārua rahi a’e, ’a noa’a noa mai te mau ha’amāramaramara’a hau.