’Ia ha’apēpēhia ’outou e te mau mā’itira’a a vetahi ’ē

Nā Gabrielle Shiozawa

Te mau ve’a a te ’Ēkālesia

Teie te tahi mau mea e ha’amana’o, ’ia fa’a’ohipa ana’e te tahi mau ta’ata i tō rātou ti’amāra’a nō te ha’apēpē ia ’outou.

feiā ’āpī tamāhine e fāri’i ra i te mau mana’o ’ino

Fa’ahōho’ara’a nā Shana Keegan

E rave ’outou e tane mau mā’itira’a i te mau mahana ato’a—e aha tē ’ō’omo, e aha te mā’a nō te tāmā’ara’a i te po’ipo’i, ’o vai te mau hoa e ’āmui atu. Te ti’amāra’a ’aore rā te ti’ara’a ’ia ma’iti ’e ’ia ’ohipa ’o te hō’ē ïa o te mau hōro’a rahi roa a’e tā te Atua i hōro’a ia tātou.

E fa’ahope’ara’a ato’a tō tā tātou mau mā’itira’a, ’e i te tahi taime e nehenehe te mau mā’itira’a a vetahi ’ē e ha’apēpē ia tātou. Mai te mea ’ua fa’autu’a-a’ena-hia ’outou nō te tahi ’ohipa tā tō ’outou taea’e i rave, ’ua ’ite ïa ’outou i te fifi rahi ’ia fa’a’ohipa ana’e te tahi mau ta’ata i tō rātou ti’amāra’a, ma te rāve’a e’ita roa ’outou e au !

I te tahi rā taime, tē vai ra te mau mea ’ino roa atu ā, nō te reira te ta’ata e fa’a’ohipa i tō rātou ti’amāra’a. E fa’ari’ari’a mai paha te mau tamari’i i te fare ha’api’ira’a ia ’outou, ’aore rā ’ua fa’aoti te hō’ē melo o ’utuāfare e fa’aru’e i te ’Ēkālesia. E rave rahi taime e au ra ē e mea tano ’ore te orara’a. Inaha ho’i, ’ua tāmata ’outou i te fa’a’ohipa i tō ’outou ti’amāra’a nō te rave i te mau mā’itira’a maita’i—nō te aha rā ïa e ’ere te reira i te mea tano ?

’Oia mau, e’ita ’outou e nehenehe e ha’avī ia vetahi ’ē. Te parau ’āpī maita’i rā ’oia ho’i e nehenehe ’outou e taui ia ’outou iho. Te rāve’a ’o te tauira’a ïa i te mea tā ’outou e tūtonu nei ’e ’ia rave i te mau mā’itira’a, noa atu ē ’aita verā ma e nā reira nei.

Teie te tahi mau mea e ha’amana’o nō te haere i mua ma te fa’aro’o, noa atu e fa’a’ohipa vetahi i tō rātou ti’amāra’a ma te rāve’a e ha’apēpē ia ’outou :

1. ’Ua ’imi Sātane e ha’amou i te ti’amāra’a (hi’o Mose 4:3). Noa atu e mea fifi ’ia hi’o ia vetahi ’ē ’ia rave i te mau mā’itira’a ’ino, ’ua ti’amā ato’a ’outou ’ia rave i te mau mā’itira’a maita’i nō te pe’e ia Iesu Mesia, ’e ’ia riro rahi atu ā mai iāna te huru !

2. E hope’ara’a tō tā ’outou mau ’ohipa. ’A ha’amana’o, « e ti’amāra’a tō tātou ’ia mā’iti, ’aita rā tā tātou e nehenehe e mā’iti i te mau hope’ara’a ».¹ Hi’ora’a nāhea te mau mā’itira’a a vetahi ’ē i te fa’atupu mai i ni’a ia ’outou, penei a’e e ha’amana’ora’a maita’i nō ’outou ’ia rave i te mau ma’itira’a ’o te ore e ha’afifi ia ’outou iho ’e ia vetahi ’ē.

3. E hōpoi’a nā te ta’ata tāta’itahi i tānā iho mau mā’itira’a (hi’o Te Ha’api’ira’a Tumu ’e te mau Fafaura’a 101:78). ’Eiaha e fa’ateimaha ia ’outou iho i te rirora’a ’ei ti’a’au nō te tauira’a i te tahi mau ta’ata ’aore rā i tā rātou mau mā’itira’a. Maoti ra, ’ia fa’atumu atu ’outou i ni’a i te mau fa’aotira’a maita’i ’e te pe’era’a ia Iesu Mesia.

4. E nehenehe ’outou e mā’iti ’ia hāmani maita’i. E mea ’ino paha te hō’ē ta’ata i ni’a ia ’outou, e nehenehe noa ra ’outou e hāmani maita’i iāna. E tītauhia te itoito nō te hāmani maita’i i te ta’ata ’e ’ia fa’a’ore atu i tā rātou hapa, mai te mea e mea ’ino rātou i ni’a ia ’outou, ’o terā mau te mea tā Iesu e rave (hi’o Luka 23:34).

5. E ti’a ia ’outou ’ia fa’atumu i ni’a i te mea tā ’outou e nehenehe e ha’avī. ’Ei hi’ora’a, e’ita paha ’outou e nehenehe e tāpe’a i tō ’outou nā metua ’ia ta’a, e nehenehe rā ’outou e mā’iti e fa’atumu ia ’outou ’ia fa’aea noa i ni’a i te ’ē’a nō te fafaura’a, ’ia tauturu i tō ’outou mau taea’e ’e mau tuahine, ’ia ha’api’i mai i te mau aura’a maita’i ’e ’ia ha’amau i te mau fā nō tō ’outou ’utuāfare ’ananahi. ’A mā’iti e fa’ariro i tō ’outou mau tāmatara’a ’ei rāve’a nō te tupu i te rahi ’e nō te ha’api’i mai.

6. E hīro’a ’e e ’ōpuara’a hanahana tō ’outou. ’Ia ha’amana’o ana’e ’outou i tō ’outou hīro’a ’ei tamari’i nā te Atua ’e ’ia fa’atumu noa i ni’a i tā ’outou mau fā nō te orara’a nei, e nehenehe ’outou e ’ite i te tā’āto’ara’a o te tupura’a ’ohipa. Te tūtonura’a i ni’a i tā ’outou fā ’e te ’itera’a ē e tuha’a iti noa teie mau tāmatara’a nō te ’ā’amu o tō ’outou orara’a, e tauturu te reira ia ’outou ’ia haere i mua ma te fa’aro’o.

7. Nā roto i te fa’aro’o ia Iesu Mesia, e ’ite mai ’outou te hau o te ta’ata iho, noa atu ’aita te mau mea e ha’ati ra ia ’outou e fa’atupu ra i te hau. ’Ua parau te peresideni Russell M. Nelson, « e nehenehe tātou e fari’i i te hau ’e te ’oa’oa, noa atu ē tei roto i te taime ’āhoahoa ».² E vero moana te orara’a, e mea ’ōhie ’ia tītau ē ’ia tāmarū mai te Atua i teie mau vero nō tātou. I te tahi rā taime, ’āhani i te tāmarūra’a te miti, e tāmarū ’oia ia tātou, te ihitai. ’A fāriu atu i ni’a iāna ma tō outou mau pe’ape’a, ’e e tauturu oia ia ’outou.

feiā ’āpī tamāhine

’Ua hōro’a mai te Atua ia ’outou te ti’amāra’a ’ia ti’a ia ’outou ’ia mā’iti i te pe’e iāna, ’e ’ia riro mai mai iāna te huru. ’A nā reira ai ’outou, e ha’api’i mau mai ’outou nā tā ’outou iho mau ma’itira’a ’e te mau hapehape ’e nā te mau ma’itira’a a vetahi ’ē. Noa atu e mea fifi ’ia hi’o i te ta’ata ’ia rave i te mau mā’itira’a ’o te ha’apēpē ia ’outou, e nehenehe ’outou e ha’api’i mai nā roto mai i taua mau ’itera’a, ’e ’ia haere i mua ma te ’ōpuara’a, te fa’aro’o ’e te ’oa’oa.

Noa atu ē e ti’amāra’a tō vetahi ’ē, ’eiaha e nā ’outou e fa’a’oroma’i i te hāmani-’ino-ra’a. Mai te mea tē fāri’i nei ’outou i te mau hāmani-’ino-ra’a, ’a paraparau i te hō’ē ta’ata pa’ari tā ’outou e nehenehe e ti’aturi atu.

Fa’ata’ara’a

1. Dale G. Renlund, ’āmuira’a rahi nō ’Ēperēra 2022 (Liahona, Mē 2022, 75).

2. Russell M. Nelson, « Poro’i ’īritira’a », ’āmuira’a rahi nō ’Ēperēra 2020 (Ensign ’aore rā Liahona, Mē 2020, 6).