« Nāhea vau e riro ai ’ei hi’ora’a maita’i nō te mau melo o tō’u ’utuāfare e tāfifi nei i te ora i te mau ha’api’ira’a a Iesu Mesia ? » Nō te pūai o te feiā ’āpī, Tiurai 2023.
Mau uiraʼa ’e Mau pāhonoraʼa
« Nāhea vau e riro ai ’ei hi’ora’a maita’i nō te mau melo o tō’u ’utuāfare e tāfifi nei i te ora i te mau ha’api’ira’a a Iesu Mesia ? »
Fa’a’ite, tāvini ’e hōro’a
« ’A fa’a’ite i tō ’outou ’utuāfare nāhea te orara’a i te ’evanelia e fa’atupu ai i te ’oa’oa nō ’oe iho. E nehenehe ’oe e tāvini ia rātou ’e e hōro’a i tō ’oe mau ’itera’a pae vārua. E nehenehe ato’a ’oe e ani i te mau misiōnare ’ia fa’atupu i te hō’ē purera’a pō ’utuāfare i roto i tō ’oe ’utuāfare. »
Luciana M., 18 matahiti, Mendoza, Rāparata
’A ’imi ’ia māramarama
« ’Ua rave te tahi o te mau melo o tō’u ’utuāfare i te tahi mau mea ’aita i roto i te reni ’e te mau fa’aturera’a a te Atua. ’A tāmata na ’ia māramarama mai i te tumu rātou ’a nā reira ai. Te aura’a, ’aita ’oe i tītauhia ’ia rave ato’a i te mea tā rātou e rave ra. Te mea faufa’a rā, e here ia rātou noa atu te mea tā rātou e rave ra ’e ’aore rā e parau nei. »
Melody E., 13 matahiti, Texas, Marite
Pe’e i te Fa’aora
« ’Ua tāmata noa vau i te riro ’ei hi’ora’a nō tō’u ’utuāfare nā roto i te paraparaura’a nō ni’a i te mau ha’api’ira’a a te ’Ēkālesia. Tē tāmata noa nei au i te hōro’a i te hōho’a o te Mesia i roto iā’u iho. ’Ua ite au ē, mai te mea e pe’e au iāna, e nehenehe ïa vau e riro ’ei hi’ora’a maita’i nō tō’u ’utuāfare ’e ’ia tauturu i te ’āfa’ira’a mai i te māramarama o te Mesia i roto i tō rātou orara’a. »
Adalia C., 19 matahiti, Rio Grande do Sul, Peretīria
Ha’uti i te pehe fa’a’ana’anatae i te vārua ta’ata
« E ha’ati nei au iā’u i te mau rāve’a ha’apurorora’a maita’i ’o tē ’āfa’i mai i te Vārua i roto i tō’u fare. E tauturu te ha’utira’a i te hō’ē hīmene i ni’a i te piāna iā’u iho ’ia ’oa’oa noa atu ē, tē fifi rā te mau melo o tō’u ’utuāfare. ’A tāmau noa i te tūru’i i ni’a i te Fa’aora, nō te ’oa’oa ’e te hau, noa atu ā ’aita te ta’ata ’ati a’e ia ’oe e nā reira. »
Lauren B., 14 matahiti, Maryland, Marite
’A here ia rātou
« E’ita tā ’oe e nehenehe e taui i te mau mā’itira’a a te mau melo o tō ’oe ’utuāfare, mai tā rātou ato’a e’ita e nehenehe e taui i tā ’oe, e nehenehe rā tā ’oe e tāmau noa i te here ia rātou. ’Ua fa’a’ite te Mesia i tōna here rahi i te mau ta’ata tei ’ore i fāri’i iāna ’e ’aore rā, i au mai iāna. E tamari’i te mau ta’ata ato’a nā te Atua, ’e nā roto i tō ’oe here, e nehenehe rātou e ’ite i te here o te Metua i te ao ra. »
Brooklyn D., 17, Utah, Marite
’Imi ’ia hi’o mai tā te Mesia e hi’o nei
« E nehenehe te here huru Mesia ’e te tāmatara’a i te hi’o i’ō atu i tō rātou mau paruparu e tauturu ia tātou ’ia hāro’aro’a i te mea tā rātou e fa’aruru nei. ’Ua māramarama maita’i roa Iesu Mesia ia tātou tāta’itahi. ’E e nehenehe tātou e ha’amata i te hi’o ’e i te tauturu ia vetahi ’ē mai tāna e nā reira nei mai te mea e ani tātou iāna ’ia arata’i ia tātou. »
John K., 17, Indiana, Marite
’Eiaha e ha’avā
« Tē ha’api’i nei au ’ia here ia rātou, ’ia hāmani maita’i ia rātou, ’e ’eiaha e ha’avā ia rātou. »
Logan C., 18, Utah, Marite