Te a’o nā ni’a i te a’o

Te tau nō te fa’aho’i-fa’ahou-ra’a mai

’A ’apo mai i te mea tā te ’āpōsetolo Petero i parau i te nūna’a nō ni’a i te fa’aho’i-fa’ahou-ra’a mai.

First Vision [’Ōrama Mātāmua], nā Walter Rane

Te ’Ohipa 3:19–21

19 ’E teienei, e tātarahapa ’outou, ’e e fāriu mai, ’ia paraihia tā ’outou mau hara, ’ia ’itea mai te ’anotau haumārū nō ’ō mai i te aro o te Fatu ra ;

20 ’E ’ia tono mai ’oia ia Iesu Mesia, ’o tei ha’apa’ohia i muta’a iho ra nō ’outou :

21 ’Ei te ra’i ā ho’i ’oia pārahi ai, ē tae noa atu i te tau e ti’a ai te mau mea ato’a nei, tā te Atua i parau mai i te vaha o te mau peropheta mo’a ato’a nōna mai te mātāmua mai ā o teie nei ao ra.

te ’anotau haumārū

’Ua fa’ahōho’a o Petero i te « ’anotau haumārū » i te taime e ho’i fa’ahou mai ai Iesu Mesia. I muri a’e i te tae-piti-ra’a mai, « e fa’a’āpīhia ho’i te fenua nei ’e e fāri’i ’oia i tōna hanahana pāradaiso » (Te mau Hīro’a Fa’aro’o 1:10).

te tau nō te fa’aho’i-fa’ahou-ra’a mai i te mau mea ato’a

« Te tau e ti’a ai te mau mea ato’a nei », ’o te fa’aho’ira’ahia mai ïa te ’evanelia. Tei roto i taua taime ra, te mau mahana hope’a nei (tō tātou mau mahana !) ’e te tau e ho’i fa’ahou mai ai Iesu Mesia.

Te aura’a o te parau Fa’aho’i-fa’ahou-ra’a mai, ’oia ho’i e fa’aho’i mai i tei hōro’ahia nā mua atu. ’Ua ha’amata te Fa’aho’i-fa’ahou-ra’a mai o te ’evanelia i te tau fa’atupura’a rā’au nō te matahiti 1820, i te fāra’a mai te Metua i te ao ra ’e ’o Iesu Mesia i te peropheta ra ia Iosepha Semita. I reira te mau mea e rave rahi i te fa’aho’i-fa’ahou-hia mai i ni’a i te fenua nei, ’e tae noa atu te mau parau mau ateate a Iesu Mesia, te ha’amanara’a nō te autahu’ara’a, ’e te ’Ēkālesia.

tāna mau peropheta mo’a ato’a mai te ha’amatara’a mai ā o te ao nei

Mai tahito mai ā, ’ua tohu te mau peropheta ē e haere mai te Tamaiti a te Atua, ’o Iesu Mesia i ni’a i te fenua nei ’e e riro mai ’ei Fa’aora nō tātou. ’Ua tohu ato’a rātou ē, e tae fa’ahou mai Iesu Mesia nō te pitira’a o te taime.

’E ’ua tohu ato’a te mau peropheta ē, hou te Fa’aora e ho’i fa’ahou mai ai, e fa’aho’i fa’ahou mai ’oia i tāna ’evanelia ’e tāna ’Ēkālesia i ni’a i te fenua nei. Tē tupu nei te Fa’aho’i-fa’ahou-ra’a mai i tō tātou nei ’anotau, mai tā te mau peropheta i tohu.