Ha’aputu—’Eiaha e ha’apurara

Nā David A. Edwards

Ve’a a te ’Ēkālesia

’Aita te Atua e mā’iti ’o vai te here i rotopū i te ta’ata, ’e ’aita ato’a tātou.

Tau hepetoma i muri a’e i tō’u taera’a i te fenua Helemani ’ei misiōnare, ’ua pātōtō atu māua tō’u ta’ata fa’aineine i te ’ūputa o te hō’ē vahine rū’au, tei fāri’i ’ia ha’api’i māua iāna.

I roto i tā māua ha’api’ira’a mātāmua, ’ua ani atu māua iāna ’ia tai’o pūai i te hō’ē pāpa’ira’a mo’a. Nā roto i te mau tīti’a mata me’ume’u, ’ua tai’o ’oia ma te fifi rahi, ma te maumau i ni’a i te mau ta’o. ’E tāna mau pāhonora’a i tā maua mau uira’a e mea potopoto ïa. ’Aita māua i pāpū roa i tōna māramarama nō te reira.

’Ua ani atu māua iāna ’ia tai’o i te tahi mau tuha’a i roto i te Buka a Moromona, hou mātou e fārerei fa’ahou ai. I tō māua ho’i-fa’ahou-ra’a, ’ua tai’o oia i te reira e au ra ē, ’aita ’oia i māramarama i te reira. ’Ua uiui māua e fifi paha tōna nō te ’apo mai i te ha’api’ira’a. ’Ua uiui māua e ti’a ānei ia māua e tāmau noa i te ha’api’i iāna. ’Ua tāmau noa rā māua.

I tō māua fārerei-fa’ahou-ra’a iāna i muri iho, ’ua māere māua i te paraura’a mai ’oia ē, e hina’aro ’oia ’ia bāpetizohia ’oia. Teie rā, ’a tāmau noa ai māua i te ha’api’i iāna, ’ua ’ite māua ’ua maita’i roa mai tāna tai’ora’a. E mea potopoto noa ā tāna mau pāhonora’a i tā māua mau uira’a, e mea maita’i rā ’e te pāpū ho’i.

’Aita i maoro roa, ’ua tonohia vau i roto i te tahi atu ’oire, ’ua pāpa’i mai rā tō’u ta’ata fa’aineine i muri iho nō te fa’a’ite mai ’ē, ’ua bāpetizohia teie vahine ’e ’ua pāturuhia ’oia e te mau melo o te ’āma’a. ’Ahani e ani mai ’outou ia māua tau hepetoma nā mua atu, ’o vai i roto i te mau ta’ata ato’a tā māua i fārerei, e tano maita’i ’ia bāpetizohia ’e ’ia roa’a i te hō’ē parahira’a i roto i te ’Ēkālesia, e’ita ïa ’oia e vai i ni’a roa i tā māua tāpura.

’E no reira, ’ua ha’api’i mai māua i te hō’ē ha’api’ira’a tahito—hō’ē ā ha’api’ira’a tā te ’āpōsetolo Petero i ’apo mai e mea maoro i teienei ’e ’o tā tātou tāta’itahi e ti’a ’ia tāmau noa i te ha’api’i mai : « E ’ore te Atua e ha’apa’o i te huru o te ta’ata » (Te ’Ohipa 10:34).

Hō’ē tauira’a rahi

’Ua peresideni Petero i te ’Ēkālesia i te hō’ē taime faufa’a roa. ’Ua parau te Fa’aora i tāna mau ’āpōsetolo, « e haere ’outou e ’ati noa a’e te mau fenua ato’a e fa’a’ite haere i te ’evanelia i te ta’ata ato’a » (Mareko 16:15). Terā rā tae roa mai i teienei, ’ua poro haere noa ’e ’ua bāpetizo noa rātou i rotopū ana’e i te mau ’āti Iuda.

I muri iho, ’ua tupu te tahi atu mau ’ohipa fa’ahiahia roa. Hō’ē ’āti roma o Korenelio te i’oa—e Etene ’oia, e ’ere ho’i i te ’āti Iuda, e fa’ehau tei ’ō’omo i te hō’ē ā ahu ha’ana tāma’i ’e te mau fa’ehau tei fa’asātauro ia Iesu Mesia—tei ’ite i te hō’ē melahi i roto i te hō’ē ’ōrama. ’Ua parau te melahi ia Korenelio ’ia e haere e ti’i i te hō’ē ta’ata o Petero te i’oa nō te ha’api’i iāna. ’Aita i maoro roa i muri iho i te reira, ’ua fāri’i Petero i te hō’ē ’ōrama i reira tōna ’itera’a i te mā’a tei ’ōpanihia e te ture ’āti Iuda, ’ua parauhia rā ’oia ’ia ’amu i te reira nō te mea ’ua tāmā te Atua i te reira. I muri noa mai i te fāri’ira’a Petero i te reira ’ōrama, tae mai ra te mau tavini a Korenelio ’e ’ua ’ani iāna ’ia haere nā muri iho ia rātou. ’Ua parau te Vārua ia Petero ’ia haere atu.

I muri a’e i tōna fārereira’a ia Korenelio ’e te ’itera’a i tōna maita’i ’e te parau mau, ’ite ihora Petero i te ’aura’a o tāna ’ōrama. E ti’a ato’a i te ’evanelia ’ia tae i te mau ’ētene mai ia Korenelio. I reira tō Petero paraura’a : « E parau mau tā’u i ’ite ē, e ’ore te Atua e ha’apa’o i te huru o te ta’ata ; ’o tei mata’u rā iāna, ’e ’o tei rave i te parauti’a ra i te mau fenua ato’a ra o te ’itehia mai ïa e āna » (Te ’Ohipa 10:34–35). ’Ua ha’api’i Petero ia Korenelio nō ni’a ia Iesu Mesia ’e ’ua ani iāna ’e i tōna ’utuāfare ’ia bāpetizohia. (Hi’o Te ’Ohipa 10.)

’Ua riro te ’āfa’ira’a i te ’evanelia i te mau ’ētene ’ei tauira’a rahi nō te ’Ēkālesia mātāmua. E mea fifi roa nō te tahi mau ta’ata ’ia fāri’i i teie tauira’a. E ’ohipa maita’i rā te reira, ’e e ha’api’i te reira i te hō’ē parau mau niuhia i ni’a i te Atua ’e tō tātou mau ta’ata tupu.

’Aita e mā’itira’a te ta’ata

’Ia ha’amaita’i ana’e ’oia i tāna mau tamari’i, ’aita te Atua e mā’iti te ta’ata nō tōna ti’ara’a pātireia, te taura ta’ata, te tao’a rahi, te ha’api’ira’a, te ’aravihi, te hōho’a, ’aore rā te tahi atu ta’a-’ē-ra’a ’o te fa’ata’a te nuna’a.¹ « ’Inaha, hō’ē ā huru tō te Fatu hi’ora’a i te mau ta’ata ato’a ; ’e tei parauti’a ra ’o tā te Atua ïa e here roa atu » (1 Nephi 17:35). E nehenehe te tā’āto’ara’a e haere mai iāna ra, nō te mea « e hō’ē ana’e rātou ato’a i mua i te Atua » (2 Nephi 26:33). « ’E hi’o [’oia] i te ’ā’au » (1 Samuela 16:7). E fāri’i ’oia i te feiā e « rave i te parauti’a, ’e ’ia hina’aro ho’i i te aroha ’e te haere ma te haeha’a » (Mika 6:8).

E nehenehe te mau ta’ata ato’a e mā’iti e haere ia Iesu Mesia ra, ’ia rave i te mau fafaura’a ’e te Metua i te ao ra, ’e ’ia pe’e i tō rāua ’ē’a. ’E e ti’a i teie parau mau e arata’i i te huru e nāhea tātou ’ia fa’a’ite i te ’evanelia a te Fatu ’e tōna here.

E’ita tā tātou e nehenehe e hi’o noa i te mau fa’a’itera’a nō rāpae o te hō’ē ta’ata ma te mana’o ē, ’aita tōna « huru » e tano nō te ’evanelia. E’ita tā tātou e nehenehe e tu’u noa i te mau tāpa’o o te ao nei i ni’a i te ta’ata ’e ’ia feruri ē teie mau tāpa’o e ti’avaru ïa ia rātou ’ia ’āmui mai i roto i te purera’a. E’ita e ti’a ia tātou e fa’aoti noa ’eiaha e tāvini i te hō’ē ta’ata nō te mea noa e mau mana’o poritita ta’a ’ē tō rātou, e mau fa’a’oa’oara’a ’aore rā e tāota ta’a ’ē tō rātou i tō tātou.

’Aita te Atua e hi’o nei i te hō’ē ta’ata mai te hō’ē ha’aputura’a tāpa’o ’ei fa’ata’ara’a i te mau pupu ’aore rā i te huru rau o te ta’ata. E hi’o ’oia i te hō’ē ta’ata—tāna tamari’i. ’E mai te reira e ti’a ai ia tātou ’ia hi’o i te ta’ata tāta’itahi—’ei ta’ata ’ōtahi mau ’e te fāna’ora’a ’e te ’aravihi ’ia haere i te Atua ra.

’Ia riro ’ei taʼata ha’aputuputu

’Ua fa’aitoito te peresideni Russell M. Nelson ia tātou ’ia ’āmui mai i roto i te ha’aputuputura’a ia ’Īserā’ela.² Tera rā, mai te mea ta’a ’ē atu i te Atua, e ma’iti tātou ’ia riro ’ei « feiā fa’atura i te ta’ata » ’ia anihia mai e fa’a’ite i te ’evanelia ’e ’ia ’āfa’i mai i te ta’ata i te purera’a, e nehenehe tātou e ha’apurara ’aore rā e fa’a’āmahamaha hau atu i te ha’aputuputura’a mai ’e i te ’āmuira’a mai.

E rave ana’e tātou tāta’itahi i te hō’ē fafaura’a : ’aita te ha’apurarara’a. ’Ia riro tātou ’ei ta’ata ha’aputuputu. ’A here, ’a fa’a’ite ’e ’a ani manihini atu.

’Aita māua tō’u hoa i pāpū maita’i ē, te vahine tā māua i ha’api’i i Helemani, e tano maita’i ’ia bāpetizohia ’oia. ’Aita māua i ’ite maita’i i tōna ā’au, ’ua ’ite maita’i rā te Atua. Tē ’oa’oa nei au i te mea ē, ’ua fa’auruhia māua ’ia tāmau noa i te ha’api’i iāna.

’A fa’aitoito ai ’outou i te pe’e i te Vārua ma te ha’apa’o ’ore i te huru o te ta’ata, e ’arata’ihia ’outou nō te tauturu i te feiā ’ati a’e ’ia ’outou ’ia haere mai i te Mesia ra, noa atu te huru o tō rātou mau ta’a-’ē-ra’a.