« Hō’ē ā pupu ha’uti, » Nō te pūai o te feiā ’āpī, Tiurai 2023.
Hō’ē ā pupu ha’uti
’Ua riro mai teie nā tino to’opiti ’ei hoa nō te orara’a tā’āto’a.
Mau hōho’a nā Jeffery Barker Edwards
E ono noa hepetoma tō te tuahine Dil e fa’aoti ai ’oia i tāna misiōni i Auterāria, ’a ’ite ai ’oia ē, e tāvini ’oia i te mau hepetoma e toe nei e te tuahine Tuala !
« ’O te ’ohipa hope’a roa ïa tā’u i mana’o ’a tomo ai au », tā te tuahine Dil ïa i parau.
’O te tuahine Dil ’e te tuahine Tuala nā vahine ha’uti mātāmua o tā rāua nā pupu tāta’ura’a pōpō i roto i te ’ete i Auckland, i Aotearoa. E ta’ata ha’uti ’aro ia rāua iho. Mea pinepine rāua i te ’aro te tahi i te tahi i roto i te mau tata’ura’a hope’a, ’e e ’ere i te mea nehenehe roa.
« Nō te fa’a’ōhie ri’i i te reira », tē parau ra te tuahine Tuala, « e haere mātou i rāpae i te tahua ma te pēpē ’e te ’ere’ere i ni’a i te ’iri. »
E rave rahi hora tō te tuahine Dil ’e te tuahine Tuala ha’api’ipi’ira’a i te ha’uti i te tāorara’a popo i roto i te ’ete. « Tō māua ora ’o te tāorara’a i te popo i roto i te ’ete », te parau ïa a te tuahine Dil.
I muri a’e i te noa’ara’a tā rāua parau tū’ite i te ha’api’ira’a tuarua, ’ua fa’auruhia rāua to’opiti ’ia tāvini i te hō’ē misiōni—noa atu ē, ’aita hō’ē o rāua i mana’o ’ia tāvini nā muri i te tahi.
Māiti ’ia tāvini
Nō te tuahine Tuala, tītauhia ma’a taime roa nō te fa’atano i tōna hina’aro i ni’a i te hina’aro o te Fatu. « E 21 matahiti tō’u ’a rave ai au i te fa’aotira’a e ha’a mai te au i te muhumuhu », tē nā ’ō rā ’oia. « ’Ua ’aro noa na vau i roto i tō’u ferurira’a i te reira ē tae roa atu vau i ni’a i te manureva. »
’Ua tāpae te tuahine Tuala i tāna misiōni i Auteraria i te taime nō te pararera’a ma’i pe’e COVID-19, ’e noa atu ā e mea fifi, ’ua māuruuru roa ’oia i te mea ē, ’ua fa’aoti ’oia e tāvini.
« E’ita tā’u e nehenehe e feruri ē, ’o vau noa ā teie tuahine Tuala mai tō’u 21ra’a matahiti. Mai te huru ra ē, ’ua roa’a iā’u te pa’ari. »
’Ua fāri’i te tuahine Dil i te hō’ē muhumuhu « māramarama ’e te ’āfaro » nō te tāvini i te hō’ē misiōni ’a fāri’i ai ’oia i tāna ha’amaita’ira’a patereareha. Ma’a taime i muri iho, ’ua fa’aoti ’oia ē, e pe’e i te muhumuhu ’ia tāvini, ’inaha « ’o te hina’aro o te Fatu te ’ē’a ti’a ’e te mā’itira’a maita’i roa a’e. » ’Ua tae mai te pi’ira’a, ’e ’ua fa’anaho ’oia i tāna mau pūtē nō te tāvini i Auteraria.
Hō’ē ā pupu ha’uti… nā te ātea noa
’Eiaha nō te mea ’ua tāvini te tuahine Dil ’e te tuahine Tuala i roto i te hō’ē ā misiōni e riro ’oi’oi ïa rāua ’ei hoa. E ta’ata ’aro i ni’a i te tū’aro nā mua a’e nō nā tau e rave rahi, e mea fifi roa ïa nā te tuahine Dil ’e te tuahine Tuala ’ia hi’o i te tahi ’e te tahi mai te tahi atu ta’ata.
’Oia mau, i te mahana mātāmua, ’a fārerei ai te tuahine Tuala i te tuahine Dil, hō’ē o tōna mau mana’o mātāmua ’oia ho’i, « ’Aita vau e ’ite ē, e tītauhia ānei iā’u ’ia au iāna. »
Fa’a’ore i te pe’ape’a
Nō reira, i te taime ’a fa’ata’ahia ai te tuahine Tuala ’e te tuahine Dil ’ia tāvini ’āmui, mea huru ’ē mau.
’Ua ha’atumuhia tō rāua mana’o to’opiti nō te tahi ’e te tahi i ni’a i te huru o tā rāua ha’utira’a i te taorara’a i te pōpō i roto i te ’ete. Tō rāua mana’o tāta’itahi, e mea ’iriā, e mea tāta’u noa, ’e te ’ino’ino te tahi i te tahi.
Terā rā, ’ua ha’amata te mau mea i te taui ’a ’ite ai rāua i te huru o te tahi. ’Ua ’itehia ia tuahine Dil ē, e mea « ta’a ’ē roa » te tuahine Tuala i tāna i mana’o noa na. « E ta’ata here mau ’oia—hō’ē o te mau hoa i here-roa-hia e au i roto i te misiōni », tē parau ra te tuahine Dil.
Hō’ē ā tō te tuahine Tuala mana’o. ’Aita ’oia i mana’o ē, ’ua riro tōna mau mana’o ’arora’a tū’aro nō te tuahine Dil ’ei « ’arora’a feruri-’ore-hia » i roto i tōna orara’a.
’Ua monohia te reira mau mana’o ’ino, ’e te ha’avā, i te here ’e te hāro’aro’ara’a ’a ha’amata ai ’oia i te ’ite ’o vai mau te tuahine Dil. ’E noa atu, ’ua mana’o te tuahine Tuala e mea muhu noa te tuahine Dil, ’ua ’ite rā ’oia, « e nehenehe tā te tuahine Dil e parauparau! »
I roto i teie auhoara’a ’āpī, ’ua ’ite te tuahine Dil ’e te tuahine Tuala ē, ’aita paha rāua i riro noa ’ei ’enemi i terā mau tau ra.
« I roto i te ha’utira’a pōpō e ha’amau ’oe i roto i te ferurira’a ē, e ti’a iho ā ’ia upo’oti’a, ’e e ’enemi te mau pupu ato’a », tē parau ra te tuahine Dil. « ’E i muri iho, ’ia fa’aoti te ha’utira’a, tē ’ite nei ’oe ē, ’auē ho’i ē, ’aita fa’ahou rātou e ’enemi. I te pae hope’a, e ’ere iho ā paha rātou e ’enemi mau.’ »
I teienei, tē ’ite nei te tuahine Dil ’e te tuahine Tuala ē, hō’ē ā « pupu » tā rāua—te pupu ho’i a te Atua.
Christ in the Midst [Te Mesia i rotopū i te ta’ata], nā Judith Mehr
Nō te mau ta’ata ato’a te tusia a Iesu Mesia
’Ua ’ite nā tuahine to’opiti i te rima o te Atua i roto i tō rāua pi’ira’a ’ei hoa ’e ’ua ’ite rāua i te mana o te tāra’ehara a Iesu Mesia, ’ua ti’a ia rāua ’ia fāri’i i te fa’aorara’a ’e te tauira’a.
« ’Ua rave Iesu Mesia i taua tusia ra ’ia ti’a i teie mau mea ato’a tei ’ino roa i muta’a iho rā ’ia fa’aorahia, ’ia fa’ati’ahia ’e ’ia maita’i roa atu ā », te parau ïa a te tuahine Dil. « E nehenehe tātou e fa’a’ore i te hapa. E nehenehe ato’a tātou e ha’amo’e. E nehenehe tātou e haere i mua, ’e e taui iho ā te mau mea ato’a. »
’Aita noa te tuahine Tuala ’e te tuahine Dil i fa’aora i tō rāua mā’ino’ino, ’ua ha’api’i ato’a rā rāua e nāhea i te hi’o ia vetahi mai tā te Atua e hi’o nei ia rāua.
« I tō’u haerera’a mai i’ō nei ’e ’ia hi’o i tō’u hoa misiōnare ’e te tahi atu mau ta’ata i raro a’e i te hō’ē māramarama ’āpī, tē ’ite nei au ē, e faufa’a tō te ’ā’amu ta’ata tāta’itahi », tē parau ra te tuahine Tuala. « ’E e hina’aro te mau ta’ata ato’a i te tāra’ehara a Iesu Mesia. »
E ha’api’i mai rātou ē, noa atu e mea fifi, e nehenehe rā nō nā ta’ata to’opiti, i te hō’ē taime ’ia hi’o te tahi i te tahi ’ei ’enemi, ’ia ’āmui fa’ahou mai nā roto i te here.
« Noa atu tō ’outou fāito matahiti ’e ’aore rā tō ’outou tūta’ere », tē parau nei te tuahine Tuala, « ’e ’aore rā e ta’ata ti’aturi ’ore ānei ’outou ’e ’aore rā e feiā fa’aro’o ānei.
« Mai te mea pa’i ē, e nehenehe tā’u e ’ohipa i pīha’i iho i te hō’ē ta’ata ē ’aita tō māua aura’a pūai, ’e e ’āmui māua to’opiti nō te hō’ē ’ōpuara’a tumu, e nehenehe ato’a ïa te tahi atu mau ta’ata. »