’Ora Tauturu

E 4 rāve’a nō te pāturu i te mau hoa i roto i te mau ’utuāfare te tahi pae e melo

Nā Eric B. Murdock

Mau ve’a a te ’Ēkālesia

E nehenehe ’outou e tauturu i te mau ta’ata ato’a ’ia ’ite ’ua herehia ’e tē aupuruhia nei rātou i te fare purera’a, noa atu te huru ’o tō rātou huru orara’a.

’Ua rau te huru o te mau ’utuāfare. ’A hi’o na te mau ta’ata i te fare purera’a, ’ei hi’ora’a, tē vai ra paha te mau melo o tō rātou ’utuāfare e ’ere i te melo nō te ’Ēkālesia, ’aore rā tei mā’iti e fa’aātea ’ē i te ’Ēkālesia. ’Aita ana’e e pāturura’a a te ’utuāfare, e mea fifi paha nō te mau ta’ata ’ia ’āmui mai i te purera’a, ’aore rā ’ia mana’o ē tei roto rātou.

I reira ïa tātou e tomo mai ai.

E nehenehe ’outou e rave i te tahi ’ohipa faufa’a roa ma te ha’amaita’ira’a i te mau huru ’utuāfare ato’a, i roto i te mau huru tupura’a ato’a. Teie te tahi mau rāve’a nō te tauturu atu :

Fa’ahōho’ara’a nā Oksana Grivina

Pure nō te mau rāve’a e tauturu

’A pure nō te ’ite e nāhea ’outou i te tauturu i te feiā e haere mai nei i te purera’a ’e tō rātou ’utuāfare. ’Ia ineine nō te ’ohipa mai te au i te mau pāhonora’a tā ’outou e fāri’i.

Ha’amātau i te ’utuāfare

Mai te mea e nehenehe, ’a tāmata i te ha’amātau i te ’utuāfare tā’āto’a o tō ’outou mau hoa. E tauturu te reira ia ’outou ’ia ’ite e aha te pāturura’a tā tō ’outou hoa e vai ra i te fare, ’e te mea e ha’afīfī nei ia rātou ’ia ’āmui mai i te purera’a. ’Ia ha’amātau noa ai ’outou i te ’utuāfare, e nehenehe ’outou e fa’auruhia ia tauturu ma te mau rāve’a ta’a ’ē e hina’arohia.

’Ia pāpū maita’i e ora tāmau noa i te ’evanelia

E rave rahi ta’ata e ’ana’anatae nei i te ’Ēkālesia, ’ia ’ite ana’e rātou i te mau melo e ora nei i te mea tā rātou e ti’aturi nei. ’Aita ’outou i ’ite ’o vai tē hi’o nei ia ’outou. E nehenehe ’outou e fa’atupu e rave rahi maita’i nā roto noa i te orara’a i te ’evanelia. E ha’amaita’ira’a te reira nō tō ’outou orara’a ’e e nehenehe e tauturu i te ’āfa’i atu i te māramarama o te ’evanelia i te feiā e hā’ati nei ia ’outou.

’Ia hāmani maita’i noa

’Eiaha e ha’afaufa’a ’ore i te huru ’ōhie o te hāmani maita’i ’o te fa’atupu i te hō’ē ta’a-’ē-ra’a rahi. ’Ei hi’ora’a :

Mai te mea e ’ite atu ’outou i te hō’ē ta’ata e pārahi ’ōna ana’e i te fare purera’a, ’a pārahi atu i pīha’i iho iāna ’aore rā ’a ani atu e haere mai e pārahi ’e tō ’outou ’utuāfare.

Mai te mea ’aita rātou e nehenehe e haere atu i te purera’a ’aore rā i te mau ’ātivite o rātou ana’e, ’a pūpū atu e haere ’outou nā muri ia rātou ’aore rā e ani ia rātou ’ia haere mai ’e tō ’outou ’utuāfare.

E mea faufa’a ato’a ’ia fa’aō mai i tō ’outou mau hoa i roto i te mau ’ātivite. E hi’ora’a ha’iha’i paha te anira’a ’ia haere mai i te ’ātivite a te pāroita ’aore rā a te ’utuāfare, e nehenehe rā te reira e tauturu i tō ’outou hoa ’ia mā’iti i te fa’aea fātata noa i pīha’i iho i te Fa’aora ’e i tāna ’Ēkālesia, ’ia ’ite mai rātou tei roto rātou.