11 ’ā’amu poto roa nō ni’a i te fa’a’itera’a i te ’evanelia

’E e nehenehe ato’a ’outou e fa’a’ite i te reira !

e tamāhine ’āpī ; mau tamari’i e pure ra

Fa’a’ite nāhea te ’evanelia e nehenehe e tauturu

I te hō’ē mahana, tei roto vau i te piha ha’api’ira’a e pārahi ra i pīha’i iho i tō’u hoa. Tē fa’aineine ra māua nō te hō’ē hi’opo’ara’a, ’e ’ua parau mai ’oia iā’u tē taiā nei ’oia. ’Ua tae mai te mana’o i roto iā’u ē, e ti’a iā’u e ha’api’i iāna nāhea ’ia pure. I muri iho, ’ua pi’o māua to’opiti i tō māua ’upo’o ’e ’ua pure māmū noa nō te fāri’i i te tauturu nō te hi’opo’ara’a. ’Ua māuruuru roa vau ē, ’ua nehenehe te pure e tauturu i te tāmarū i te hepohepo o tō’u hoa.

Abigail, Urutue

e taure’a tamaroa ; feiā ’āpī e haere ra e fārerei i te hō’ē vahine pa’ari

Aupuru i te feiā i roto i te fifi

Tē vai ra te hō’ē vahine pa’ari i roto i tā mātou pāroita, ’aita ’oia iho e nehenehe e haere mai i te purera’a ’ōro’a nō te fifi i te pae o te ea. ’Ua ani māua tō’u metua tāne i te ’episekōpo, e nehenehe ānei māua e ’āfa’i i te ’ōro’a mo’a i tōna fare i te mau hepetoma ato’a. ’Ua ha’amata ato’a tāna tāne fa’aipoipo, tei paruparu roa, i te rave ato’a i te ’ōro’a mo’a. Te aura’a nō te ha’aputuputura’a ia ’Īserā’ela ’o tē anira’a ïa tātou ia vetahi ’ē ’ia ha’afātata mai ia Iesu Mesia. E tuha’a rahi te aupurura’a nō taua ’ohipa ra

Shion, Utaha, Fenua Marite

e feiā ’āpī tamāroa ; mau tamari’i e ha’uti ra

E ani ’ia haere mai i te ’ātivite

Tē tere ra vau nā ni’a i te pere’o’o ta’ata’ahi nā pīha’i iho i te hō’ē ’ēkālesia, ’ite a’era vau e rave rahi ta’ata i reira e ’ori ra. ’Ua pi’i atu vau i te hō’ē taure’are’a tamāroa (tōna i’oa o Courage) ’e ’ua ani atu iāna e aha tā rātou e rave ra. ’Ua parau ’oia ē, ’ua haere mai rātou nō te mau piha ha’api’ira’a tei pi’ihia te séminaire. ’Ua parau mai ’oia iā’u ē, tē vai ra te hō’ē fa’a’oa’oara’a i te fare purera’a, ’e ’ua ani mai e haere ānei au nā muri iāna. ’Ei hoa, ’ua taui mau Courage i tō’u orara’a i te tauturura’a iā’u ’ia ’ite i te ’evanelia.

David, Kana

e taure’are’a tamāroa ; feiā ’āpī e ta’uma ra nā ni’a te ’ē’a

’Ia riro ’ei hi’ora’a maita’i

’Ua ha’api’i rahi mai au ma te hi’ora’a i tō’u tua’ana. Mea au roa nā’u te mau ha’uti video ’e te tu’era’a pōpō, ’e, e mea pāpū ē, e rave au i te reira mau mea i te mau taime ato’a ’āhani e ere nōna. Mea au ato’a nāna te reira mau mea, ’e i te rave rahi taime e ha’uti ’āmui māua i te reira, e rave noa rā ’oia i te taime ’ia tupu i te rahi ’e ’ia hau atu i te maita’i. E’ita roa e mo’ehia iā’u te ani-manihini-ra’a ’ia rave i te rā’au ta’ero i te fare ha’api’ira’a. ’Ua feruri ’oi’oi au i tō’u taea’e ’e ’ua ’ite au i te mea tāna e ma’iti ; nō te mea ’ua hina’aro vau ’ia riro mai iāna te huru, ’ua rave au i te mā’itira’a ti’a ’e ’ua parau vau ’aita.

Emilio, Tennessee (Fenua Marite)

e tamāhine ’āpī ; mau tamāhine e tauahi ra

Tauturu ia vetahi ’ē ’ia ’ite i te here o te Mesia

I roto i te hō’ē ’āmuira’a JSF, ’ua tae mai te mana’o ’ōtahi iā’u. ’Ua pure au i te mau mahana ato’a, ma te ti’aturi e fāri’i au i te Vārua ’e te here o Iesu Mesia. I muri a’e i te hō’ē o te mau a’ora’a, ’ua haere mai ’e ’ua tauahi mai te hō’ē feiā ’āpī tamāhine iāu, ’aita vau i mātau maita’i iāna. ’Ua fāri’i au i te here o te Mesia i roto i tāna tauahira’a, mai te huru ra ē, tē parau mai ra ’oia iā’u ’ua here ’oia iā’u.

Natalie, Tīreni.

e tamāhine ’āpī ; mau tamāhine ’e te mau niuniu

’A pe’e i te mau fa’aurura’a

I te hō’ē mahana ’ua fāri’i au i te hō’ē fa’aurura’a pae vārua e tītau manihini i tō’u hoa maita’i roa nō te ha’api’ira’a i te hō’ē purera’a. ’Ua hina’aro vau e tāu’a ’ore i te fa’aurura’a, i te pae hope’a rā ’ua hāpono atu vau i te hōē parau pōro’i i te mahana nā mua atu. ’A pārahi ’āmui ai māua i te purera’a, ’ua hitahita ri’i au. I te fa’a’otira’a rā te purera’a, e mata ’ata’ata rahi tōna i ni’a i tōna hōho’a mata. ’Ua fa’aha’amana’o te reira iā’u ē, ’ua mātau maita’i te Atua i tāna mau tamari’i hau atu iā’u, ’e e mea ti’a iā’u e pe’e tāmau noa i te mau fa’aurura’a nō te fa’a’ite i te ’evanelia a Iesu Mesia.

Eliza, Minnesota, Fenua Marite

e taure’are’a tamāroa ; feiā ’āpī i te ’āua ra’au tanu

’A pure i ni’a i te mea e parau

’O vau ’e tō’u tuahine ana’e te melo nō te ’Ēkālesia i roto i tā māua fare ha’api’ira’a. Tē ’ite nei te mau ta’ata ē, e mea ta’a ’ē māua ’e e ’ui tāmau noa mai i te mau uira’a. I te ha’amatara’a ’ua hitahita ri’i au ’ia paraparau ia rātou, ’ua pure rā vau ’ia ti’a iā’u ’ia parau i te mea tano, ’e ’ua fa’aro’o ’e ’ua fa’atura rātou i tā’u mau mā’itira’a.

Ruben, Norovētia

e tamāhine ’āpī ; tamāhine ’e te mātini rorouira

Fa’a’ite i te parau mau o te ’evanelia nā ni’a te natirara

Nō te hō’ē fā, ’ua haere au nā te Mai, pe’e mai ’e ’ua ’itehia mai iā’u te mau pāpa’ira’a mo’a ’e te mau fa’ahitira’a parau nō te fa’a’ite i ni’a i te rāve’a tūreiara’a. ’Ua fāri’i au erave rahi tātarara’a mana’o nā roto mai i te mau ta’ata e parau nei ē, ’ua ha’aputapū te Vārua ia rātou nā roto i tā’u mau parau pia. E tauturu te fa’a’itera’a i te ’evanelia ia vetahi ’ē, ma te mau rāve’a e’ita roa tātou e nehenehe e feruri i taua taime ra.

Raquel, Peretīria

e tamāhine ’āpī ; mau tamari’i i te fare ha’api’ira’a

’Ia ’ite i te hāmani

I roto i te hō’ē o tā’u mau piha ha’api’ira’a, tē tai’o ra mātou i te hō’ē buka e fa’ahapa nei i te ’Ēkālesia. ’Ua ’ite au ē e ti’a iā’u ’ia parau atu nō te parau mau o te ’evanelia i fa’aho’i-fa’ahou-hia mai. Nō reira, ’ua ’āfa’i au i tō’u rima i ni’a. ’Ua pi’i mai ra te ’orometua ha’api’i iā’u, ’aita rā vau i ’ite e aha te mea e parau atu. Nō te tahi tumu ’ē’e, ’ua ha’amata vau i te hīmene i te mau hīmene nō te Hīro’a Fa’aro’o. Ma tō’u maere rahi, ’ua fa’a’ī te hō’ē fa’aturara’a rahi i te piha. I muri iho, ’ua iti mai te ’āhuehuera’a, ’e ’ua fa’atura mai tō’u ’orometua ’e tō’u mau hoa ha’api’ira’a i te ’āparaura’a i roto i te piha ha’api’ira’a.

Monique, Massachusetts, Fenua Marite

e tamāhine ’āpī ; ’utuāfare i te fare

’Ia riro ’ei māramarama

I te 15ra’a o tō’u matahiti, ’ua fa’aoti au e ha’amata e ’imi i te hō’ē ’ēkālesia nō te haere atu i roto. Tau mahana i muri mai, ’ua riro mai au ’ei hoa nō te hō’ē tamāhine i te fare ha’api’ira’a, mai te huru ra ē, e māramarama tō ni’a iāna. Tau hepetoma i muri mai, ’ua ani mai ’oia iā’u ’ia haere i tōna fare. I tō’u taera’a atu, ’ua ani mai tōna ’utuāfare iā’u ’ia ’āmui atu ia rātou nō te purera’a pō ’utuāfare. ’Ua ’ana’anatae roa vau i Te ’Ēkālesia a Iesu Mesia i te Feiā Mo’a i te mau Mahana Hope’a nei, tei niuhia i ni’a i te ’oa’oa o te ’utuāfare o tō’u hoa i taua pō ra.

McKaylie, Colorado, Fenua Marite

e taure’are’a tamāroa ; feiā ’āpī tamāroa e ’āparau ra

Fa’a’ite ma te here

’Ua fa’aitoito tō’u taea’e feti’i iā’u ’ia fārerei atu i te mau misiōnare, tē mana’o nei au, nō te mea ’ua hina’aro ’oia ’ia fāna’o vau i te mau ha’amaita’ira’a tāna e fāna’o nei i taua taime ra. ’Ua fāri’i au ē, tō’u taea’e feti’i ’e tō’u hoa, o Enoch ’ua here ’e ’ua hina’aro rāua i te hō’ē mea maita’i nō’u. Nā te reira i hōro’a mai te au maita’i ’ia haere mai i te purera’a.

Eric, Ghana