« Tāpe’a māite i te parau mau », Nō te pūai o te feiā ’āpī, Tiurai 2023.
Tāpe’a māite i te parau mau
Fa’ahōho’ara’a nā Ben Simonsen
Te taime mātāmua ’a ’ite ai au i te hō’ē fare purera’a a te ’Ēkālesia, ’ua mana’o vau ē e fare ma’i te reira. Nō tōna mā ’e tōna māniania ’ore. ’Ua here au i te ’evanelia a Iesu Mesia i te taime iho ā ’a haere ai au i te mau purera’a.
’Ua ha’amata te mau tuahine misiōnare i te ha’api’i iā’u, ’e fa’aoti ai au e bāpetizo iā’u. ’O te hō’ē ïa mahana au maita’i a’e !
’Ua fa’a’itehia mai iā’u te ’evanelia e tō’u veutupu, e misiōnare tei ho’i mai mai tāna misiōni. Pi’i mai ’oia iā’u i te hō’ē po’ipo’i Sābati ’e ’ua ani mai iā’u ’ia haere i te purera’a nā muri iāna ’e tōna ’utuāfare. ’I te ha’amatara’a, ’ua parau mai tō’u metua vahine iā’u ē, ’e’ita tā’u e nehenehe e haere nō te mea ’aita tā mātou e moni nō te ’āufau i te pere’o’o uta ta’ata. I tō’u fa’ati’ara’a i tō’u hoa nō te reira, ’ua parau mai ’oia ē e rave ’oia iā’u, ’e ’ua fa’ati’a tō’u metua vahine iā’u ’ia haere.
Noa atu e mea tītauhia ’ia haere ’ōtahi noa
I muri mai i tō’u bāpetizora’ahia, e rave rahi ha’atāfifira’a tā’u i fari’i e tō’u ’utuāfare. I te tahi taime, ’ua hina’aro rātou ’ia fa’aea vau i te fare i te Sābati, terā rā, e mā’iti au e haere i te purera’a. I te rahira’a o te taime, e mea fifi roa ’ia tāmau noa i te fa’aea i ni’a i te ’ē’a o te fafaura’a.
E pāto’i te tahi mau melo o tō’u ’utuāfare i te ’Ēkālesia ’e ’ua parau mai iā’u ē, ’ua rave au i te mā’itira’a hape ’ia ’āmui atu i reira. ’Ia parau ana’e mai rātou iā’u i te reira, e puta mai teie mau parau i roto i tō’u ferurira’a : « ’Ua ’ite au, tē ora nei te Metua i te ao ra ’e ’o Iesu Mesia. ’Ua ’ite au e parau mau te ’Ēkālesia. » Nā teie mau mana’o i tauturu iā’u ’ia tāpe’a noa i te parau mau.
E nehenehe tā tātou mau ’ohipa e ha’aputapū i te orara’a o vetahi ’ē
’Ia tāfifi ana’e au e nāhea i te ’aufau i te tuha’a ’ahuru, e fa’a’ite mai tō’u veutupu iā’u nāhea ’ia ’aufau i te reira. I teienei ’ia hōro’a mai tō’u metua vahine i te moni pūtē nā’u, e ’aufau noa vau i tā’u tuha’a ’ahuru. ’Ua ’ite mātou tō’u ’utuāfare i te mau ha’amaita’ira’a nā roto mai i te reira. ’Ua ha’amata ato’a tō’u ’utuāfare i te hōro’a mai i tā rātou moni nō te ’aufau i te tuha’a ’ahuru ! ’Ohipa māere te reira.
Te rahira’a o te taime e haere au i te purera’a ’o vau ana’e, terā rā, i te tahi taime, e haere mai tō’u metua vahine nā muri iho iā’u. ’Ua fa’aoti tō’u metua vahine e ha’api’i rahi atu ā nō ni’a i te ’evanelia ’e tē ’oa’oa nei nō te reira, noa atu ā ’aita ’oia i bāpetizohia atu ra.
E taui te pure ’e te fa’aro’o i te mau ’ā’au
’Ua ’ite au i te rima o te Fatu i roto i tō’u orara’a ’utuāfare ’a pure ai au nō rātou ’e ’a ani ai au ia vetahi ’ē ’ia pure nō rātou i roto i te hiero. ’Ua riro mai tō’u ’utuāfare ’ei turu pāpū mau, ’e i teienei, tē fa’aitoito mai nei rātou iā’u ’ia haere i te purera’a ’e ’ia vai ha’apa’o maita’i noa i tō’u huru mau.
’Aita i maoro a’enei, ’ua fa’aru’e mai tō’u pāpā rū’au, ’e ’ua ’itehia mai iā’u tōna i’oa ’a rave ai au i te ’ohipa ’ā’amu ’utuāfare. ’Ua ani au i tō’u pāpā e nehenehe ānei iā’u ’ia rave i tōna mau ’ōro’a i roto i te hiero. Nā ’ō mai ra ’oia : « ’A rave mai te mea e mea ti’a te reira. »
Te ’oa’oa mau ’e te poupou
Nā te tai’ora’a i te mau pāpa’ira’a mo’a ’e te ’itera’a nō ni’a i te tāra’ehara a Iesu Mesia i hōpoi mai i te ’oa’oa, te poupou, te hau ’e te tāmāhanahanara’a.
’Ua ’ite au ē, nā roto i te tusia tāra’ehara a te Fa’aora, e nehenehe au e pārahi fa’ahou i pīha’i iho i tō’u Metua i te ao ra ’e e nehenehe tō’u ’utuāfare e pārahi i pīha’i iho iā’u ē a muri noa atu mai te mea e tā’atihia mātou i roto i te hiero i te hō’ē mahana.
Nō Vanuatu mai teie ta’ata pāpa’i ’e tē ora nei ’oia i Fiti.