« ធ្វើជាចម្លើយអធិស្ឋានចំពោះការអធិស្ឋានរបស់នរណាម្នាក់ » ដើម្បីកម្លាំងនៃយុវជន ខែ កក្កដា ឆ្នាំ ២០២៣ ។
ចូរមកតាមខ្ញុំ
ធ្វើជា ចម្លើយ ចំពោះ ការអធិស្ឋានរបស់នរណាម្នាក់
ការធ្វើតាមការបំផុសគំនិតជួយយើងធ្វើឲ្យមានភាពខុសប្លែក ។
Such as I Have I Give unto Thee [ របស់ដែលខ្ញុំមាន នោះខ្ញុំនឹងឲ្យដល់អ្នក ] ដោយ វលធើរ រេន
ពេត្រុស និងយ៉ូហាន ព្យាបាលបុរសម្នាក់នៅឯព្រះវិហារបរិសុទ្ធ .
អ្នកអាចមានអារម្មណ៍ថាអ្នកមិនមានអ្វីច្រើនដើម្បីផ្ដល់ឲ្យនោះទេ ។ ប៉ុន្តែអ្នកមានសេចក្តីជំនឿលើព្រះយេស៊ូវគ្រីស្ទ ហើយសេចក្តីជំនឿរបស់អ្នកលើទ្រង់គឺគ្រប់គ្រាន់ល្មមដើម្បីដឹកនាំទៅរករឿងដ៏អស្ចារ្យមួយចំនួន ។
មិនយូរប៉ុន្មានបន្ទាប់ពីការសុគតរបស់ព្រះយេស៊ូវគ្រីស្ទ និងការមានព្រះជន្មរស់ឡើងវិញ ពេត្រុស និង យ៉ូហាន បានទៅព្រះវិហារបរិសុទ្ធ ជាកន្លែងដែលមានបុរសម្នាក់មិនអាចដើរបានអង្គុយនៅខាងក្រៅ ហើយបានសុំជំនួយ ។
ពេត្រុសបាននិយាយទៅកាន់បុរសនោះថា « ប្រាក់ ហើយនឹងមាស ខ្ញុំគ្មានទេ តែ របស់ដែលខ្ញុំមាន នោះខ្ញុំនឹង ឲ្យដល់អ្នក គឺដោយសារព្រះនាមព្រះយេស៊ូវគ្រីស្ទ ពីស្រុកណាសារ៉ែត ចូរអ្នកក្រោកឡើងដើរទៅចុះ » ( សូមមើល កិច្ចការ ៣:៦ បានបន្ថែមការបញ្ជាក់ ) ។
ពេត្រុសទាញបុរសនោះឲ្យឡើងឈរ ។ នេះជាលើកទីមួយហើយក្នុងជីវិតរបស់គាត់ ដែល បុរសនេះអាចឈរបាន ។ គាត់បានដើរ ហើយថែមទាំងលោតដោយភាពរីករាយ ។ ជំនឿរបស់ពេត្រុសលើព្រះគ្រីស្ទបានផ្តល់ឲ្យលោកនូវភាពក្លាហានដើម្បីព្យាបាលបុរសនោះដោយអំណាចនៃបព្វជិតភាព ។
អ៊ីចឹង ចូរឲ្យយើងមានភាពស្មោះត្រង់ ។ អ្នកប្រហែលជានឹងមិនទៅព្យាបាលជំងឺផ្លូវកាយរបស់មនុស្សគ្រប់គ្នាគ្រប់ពេលនោះទេ ។ ប៉ុន្តែជំនឿរបស់អ្នកអាចជួយតាមវិធីផ្សេងៗទៀត ។ ដូចពេត្រុសដែរ អ្វីដែលអ្នកមាន អ្នកអាចផ្តល់ឲ្យ ។
រូបថតមកពី Getty Images
ការធ្វើឲ្យមានភាពខុសប្លែក
តើអ្នកធ្លាប់អធិស្ឋានដើម្បីកុំឲ្យសូវមានអារម្មណ៍ឯកោដែរឬទេ ? ឬថានរណាម្នាក់នឹងក្លាយជាមិត្តរបស់អ្នកដែរទេ ?
តើមាននរណាម្នាក់ធ្លាប់មកជួប បានទូរសព្ទហៅ ឬផ្ញើសារមកអ្នកក្នុងពេលនោះដែរឬទេ? ពួកគេអាចនឹងធ្វើតាមការបំផុសគំនិត និងព្យាយាមកែលម្អដូចជាអ្នកដែរ ។ អ្វីដែលពួកគេបានធ្វើគឺប្រើពេលវេលាបន្តិចបន្តួច ភាពក្លាហានរបស់ពួកគេ និងសេចក្ដីសប្បុរសបន្តិចដោយស្មោះត្រង់—ឬនិយាយម្យ៉ាងទៀតថា អ្វីដែលពួកគេមាន ។ អ្នកក៏អាចអនុញ្ញាតឲ្យសេចក្ដីជំនឿរបស់អ្នកជំរុញអ្នកឲ្យធ្វើតាមការបំផុសគំនិតទាំងឡាយផងដែរ ។
អែលឌើរ រ៉ូណល អេ រ៉ាសបាន នៃក៉ូរុមនៃពួកសាវកដប់ពីរនាក់បានបង្រៀនថា « យើងមានការទទួលខុសត្រូវដ៏ពិសិដ្ឋដើម្បីរៀនទទួលស្គាល់ព្រះចេស្តារបស់ [ ព្រះវិញ្ញាណបរិសុទ្ធ ] នៅក្នុងជីវិតយើង និងការឆ្លើយតបរបស់ទ្រង់ » ។១
អ្នកមិនតែងកត់សម្គាល់ថាពេលណា ឬប្រសិនបើអ្នកបានធ្វើឲ្យមានការខុសប្លែកគ្នាចំពោះនរណាម្នាក់ជានិច្ចនោះទេ ដូច្នេះវាអាចពិបាកនឹងមើលឃើញគោលបំណងនៃការធ្វើតាមការបំផុសគំនិតទាំងនោះណាស់ ។
ទោះជាយ៉ាងណាក៏ដោយ ការព្យាយាមបម្រើ—ធ្វើអ្វីដែលអ្នកអាចធ្វើបាន—នឹងធ្វើឲ្យអ្នកមានអារម្មណ៍សប្បាយរីករាយ និងសម្រេចបាន ទោះបីជាអ្នកមិនឃើញលទ្ធផលជានិច្ចក៏ដោយ ។ នៅពេលអ្នកស្តាប់តាមការបំផុសគំនិត នោះព្រះវិញ្ញាណបរិសុទ្ធនឹងជួយអ្នកឲ្យរៀនពីរបៀបបម្រើអ្នកដទៃ ទោះបីជាមានកាលវិភាគមមាញឹកក៏ដោយ ។ ដូចដែលអែលឌើរ ជែហ្វ្រី អ័រ ហូឡិន នៃកូរ៉ុមនៃពួកសាវកដប់ពីរនាក់បានបង្រៀនថា ៖ « ការអធិស្ឋានត្រូវបានឆ្លើយតប … ភាគច្រើនបំផុត … ដោយព្រះប្រើប្រាស់មនុស្សដទៃផ្សេងទៀត ។ មែនហើយ ខ្ញុំអធិស្ឋានថាទ្រង់នឹងប្រើប្រាស់យើង ។ ខ្ញុំអធិស្ឋានថា យើងនឹងធ្វើជាចម្លើយចំពោះការអធិស្ឋានរបស់មនុស្សទាំងឡាយ » ។២
អំណរសម្រាប់អ្នករាល់គ្នា
តាមរយៈការធ្វើល្អ អ្នកអាចធ្វើជាចម្លើយចំពោះការអធិស្ឋានរបស់អ្នកដទៃ ហើយរកឃើញអំណរនៅតាមផ្លូវ—និងក្នុងភាពអស់កល្បជានិច្ច ។ ដូចជាអែលឌើរ រ៉ាសបាន បង្រៀនថា ៖ « អំណរនោះកើតឡើងជាភាពសុខសាន្តនៅក្នុងស្ថានភាពលំបាក ឬការខូចចិត្ត ។ វាផ្តល់ការលួងលោម និងភាពក្លាហាន បើកសម្តែងសេចក្តីពិតនៃដំណឹងល្អ ហើយពង្រីកសេចក្តីស្រឡាញ់របស់យើងចំពោះព្រះអម្ចាស់ និងបុត្រាបុត្រីទាំងអស់របស់ទ្រង់ ។៣ ម្យ៉ាងវិញទៀត អ្នកក៏កាន់តែដូចព្រះគ្រីស្ទដែរ ។
គ្រាន់តែផ្តល់អ្វីដែលអ្នកអាចធ្វើបាន ដោយចាប់ផ្តើមពីពេលបន្តិច និងការគោរពប្រតិបត្តិ ។
ជាការពិតណាស់ ពេលខ្លះអ្នកគឺជាមនុស្សម្នាក់ដែលត្រូវការជំនួយបន្ថែមបន្តិចបន្តួច ។ ត្រង់នេះផងដែរ ព្រះវរបិតាសួគ៌ដែលពេញដោយសេចក្តីស្រឡាញ់បញ្ជូនការបំផុសគំនិតដល់អ្នកដទៃ ។ ពួកគេអាចរកឃើញអំណរ ខណៈពេលធ្វើជាចម្លើយចំពោះការអធិស្ឋានរបស់អ្នក ដូចជាអ្នកអាចធ្វើជាចម្លើយចំពោះការអធិស្ឋានរបស់ពួកគេដែរ ។ នោះមានន័យថា មានចម្លើយដែលអាចទៅរួចដល់ទៅរាប់ពាន់លានចម្លើយ ហើយចម្លើយបន្ទាប់នោះអាចទទួលបាននៅពេលដើរតាមផ្លូវ ដែលហៀបនឹងនិយាយជម្រាបសួរ ។