« កុំបែកខ្ចាត់ខ្ចាយ—ប្រមូលផ្តុំវិញ » ដើម្បីកម្លាំងនៃយុវជន ខែកក្កដា ឆ្នាំ ២០២៣ ។
ចូរមកតាមខ្ញុំ
កុំបែកខ្ចាត់ខ្ចាយ—ប្រមូលផ្តុំវិញ
ព្រះមិនបង្ហាញការពេញព្រះទ័យលើអ្នកណាជាងអ្នកណាឡើយ ហើយយើងក៏មិនគួរធ្វើបែបនោះដែរ ។
រូបភាពរចនាដោយ ត្រាវីស៍ ខនស្ទែនទីន
ពីរបីសប្តាហ៍បន្ទាប់ពីខ្ញុំបានមកដល់ប្រទេសអាឡឺម៉ង់ក្នុងនាមជាអ្នកផ្សព្វផ្សាយសាសនា អ្នកបង្ហាត់បង្រៀនរបស់ខ្ញុំ និងខ្ញុំបានគោះទ្វាររបស់ស្ត្រីវ័យចំណាស់ម្នាក់ ដែលបានយល់ព្រមអនុញ្ញាតឲ្យយើងបង្រៀនគាត់ ។
ក្នុងអំឡុងមេរៀនដំបូងរបស់យើង យើងបានអញ្ជើញគាត់ឲ្យអានខគម្ពីរមួយឲ្យឮៗ ។ គាត់បានអានពាក្យទាក់ៗទាំងលំបាកដោយប្រើវ៉ែនតាដែលមានកម្រាសក្រាស ។ ហើយចម្លើយរបស់គាត់ចំពោះសំណួររបស់យើងគឺខ្លី ។ យើងមិនប្រាកដថាគាត់យល់បានកម្រិតប៉ុណ្នានោះទេ ។
យើងបានសុំគាត់ឲ្យអានបទគម្ពីរខ្លះៗនៅក្នុងព្រះគម្ពីរមរមន មុនពេលពួកយើងជួបគ្នាលើកក្រោយ ។ ពេលយើងមកម្ដងទៀត គាត់បានអានបទគម្ពីរទាំងនោះហើយ ប៉ុន្តែហាក់ដូចជាមិនបានយល់ពីអត្ថន័យរបស់វាទេ ។ យើងឆ្ងល់ថាតើគាត់អាចនឹងមានឧបគ្គសខ្លះៗទៅនឹងការរៀនសូត្រដែរឬទេ ។ យើងឆ្ងល់ថាតើយើងគួរបន្តបង្រៀនគាត់ទៀតឬអត់ ។ ប៉ុន្តែយើងនៅបន្តទៅទៀត ។
នៅពេលទៅជួបលើកក្រោយ យើងភ្ញាក់ផ្អើលពេលគាត់និយាយថាគាត់ចង់ទទួលពិធីបុណ្យជ្រមុជទឹក ។ បន្ទាប់មក ពេលយើងបន្តបង្រៀនគាត់ យើងបានសង្កេតឃើញថា ការអានរបស់គាត់តាមពិតទៅបានប្រសើរឡើងជាងមុនច្រើន ។ ចម្លើយរបស់លោកយាយចំពោះសំណួររបស់យើងនៅតែខ្លី ប៉ុន្តែហាក់ដូចជាប្រសើរជាងមុន និងប្រាកដជាងមុន ។
មិនយូរប៉ុន្មានខ្ញុំបានផ្ទេរទៅទីក្រុងផ្សេង ប៉ុន្តែក្រោយមកទៀត អ្នកបង្ហាត់បង្រៀនខ្ញុំបានសរសេរមកខ្ញុំដើម្បីប្រាប់ថា ស្ត្រីចំណាស់រូបនេះបានទទួលពិធីបុណ្យជ្រមុជទឹករួចហើយ ហើយបានទទួលការគាំទ្រពីសមាជិកក្នុងសាខា ។ ប្រសិនបើអ្នកសួរយើងកាលពីប៉ុន្មានសប្តាហ៍មុនថាតើអ្នកណាក្នុងចំណោមអ្នកដែលយើងបង្រៀនទាំងអស់ ដែលអាចទទួលពិធីបុណ្យជ្រមុជទឹក ហើយក្លាយជាសមាជិកនៃសាសនាចក្រ នោះយើងមិនគិតថា ស្រ្តីរូបនេះនឹងទទួលពិធីបុណ្យជ្រមុជទឹកនោះទេ ។
ដូច្នេះហើយ យើងបានរៀនមេរៀនចាស់មួយ—ជាមេរៀនដូចគ្នាដែលសាវកពេត្រុសបានរៀនពីយូរមកហើយថា យើងម្នាក់ៗត្រូវបន្តរៀន ៖ « ព្រះមិនរើសមុខអ្នកណាទេ » ( កិច្ចការ ១០:៣៤ ) ។
ការផ្លាស់ប្តូរដ៏ធំ
ពេត្រុសបានដឹកនាំសាសនាចក្រនៅពេលដ៏សំខាន់បំផុត ។ ព្រះអង្គសង្រ្គោះបានប្រាប់ដល់ពួកសាវករបស់ទ្រង់ថា « ចូរអ្នករាល់គ្នាទៅពេញសព្វក្នុងលោកីយទាំងមូល ហើយផ្សាយដំណឹងល្អទូទៅដល់គ្រប់មនុស្សទាំងអស់ចុះ » ( ម៉ាកុស ១៦:១៥ ) ។ ប៉ុន្តែរហូតមកដល់ពេលនេះ ពួកគេបានផ្សព្វផ្សាយ និងធ្វើពិធីបុណ្យជ្រមុជទឹកតែក្នុងចំណោមពួកយូដាប៉ុណ្ណោះ ។
បន្ទាប់មក មានរឿងដ៏អស្ចារ្យជាច្រើនបានកើតឡើង ។ មេទ័ពរ៉ូមម្នាក់ឈ្មោះថា កូនេលាស—ជាសាសន៍ដទៃ មិនមែនជាសាសន៍យូដាទេ ជាទាហានម្នាក់ដែលពាក់ឯកសណ្ឋានដូចគ្នាទៅនឹងអ្នកដែលបានឆ្កាងព្រះយេស៊ូវគ្រីស្ទ—បានឃើញទេវតាមួយអង្គក្នុងនិមិត្ត ។ ទេវតាប្រាប់កូនេលាសឲ្យចាត់បុរសម្នាក់ឈ្មោះពេត្រុសមកបង្រៀនលោក ។ មិនយូរប៉ុន្មានក្រោយមក ពេត្រុសបាននិមិត្តឃើញអាហារដែលត្រូវបានហាមប្រាមនៅក្រោមច្បាប់របស់សាសន៍យូដា ប៉ុន្តែគេប្រាប់លោកឲ្យបរិភោគវា ពីព្រោះព្រះបានធ្វើឲ្យបានជ្រះស្អាត។ បន្ទាប់ពីពេត្រុសបានឃើញការនិមិត្តនេះភ្លាម អ្នកបម្រើរបស់កូនេលាសបានមកដល់ ហើយអញ្ជើញគាត់ឲ្យមកជាមួយពួកគេ ។ ព្រះវិញ្ញាណបានប្រាប់ពេត្រុសឲ្យទៅ ។
បន្ទាប់ពីបានជួបកូនេលាស ហើយឃើញថាគាត់ជាមនុស្សល្អនិងស្មោះត្រង់ប៉ុណ្ណា នោះពេត្រុសបានដឹងពីអត្ថន័យនៃការនិមិត្តរបស់លោក ។ ដំណឹងល្អត្រូវទៅដល់ពួកសាសន៍ដទៃដូចលោកកូនេលាសដែរ ។ នោះជាពេលដែលពេត្រុសបាននិយាយថា « ប្រាកដមែន ខ្ញុំយល់ឃើញថា ព្រះមិនរើសមុខអ្នកណាទេ គឺនៅក្នុងគ្រប់ទាំងសាសន៍ អស់អ្នកណាដែលកោតខ្លាចដល់ទ្រង់ ព្រមទាំងប្រព្រឹត្តសេចក្ដីសុចរិត នោះគាប់ដល់ព្រះហឫទ័យទ្រង់ដែរ » ( កិច្ចការ ១០:៣៤–៣៥ ) ។ ពេត្រុសបានបង្រៀនកូនេលាសអំពីព្រះយេស៊ូវគ្រីស្ទ ហើយបានអញ្ជើញគាត់ និងគ្រួសាររបស់គាត់ឲ្យទទួលពិធីបុណ្យជ្រមុជទឹក ។ ( សូមមើល កិច្ចការ ១០ ) ។
ការនាំយកដំណឹងល្អទៅកាន់សាសន៍ដទៃបានឲ្យមានការផ្លាស់ប្តូរដ៏ធំមួយសម្រាប់សាសនាចក្រសម័យដើម ។ មនុស្សមួយចំនួនមានការលំបាកក្នុងការទទួលយកការផ្លាស់ប្តូរនេះ ។ ប៉ុន្តែវាជារឿងត្រឹមត្រូវ ហើយវាបានបង្រៀនសេចក្ដីពិតជាមូលដ្ឋានអំពីព្រះ និងមនុស្សទាំងអស់ ។
គ្មានការពេញចិត្តនិយម
នៅពេលទ្រង់ប្រទានពរដល់បុត្រាបុត្រីរបស់ទ្រង់ ព្រះមិនបង្ហាញការពេញចិត្តលើជាតិសាសន៍ ពូជសាសន៍ ភេទ ទ្រព្យសម្បត្តិ ការអប់រំ សមត្ថភាព រូបរាង ឬភាពខុសគ្នាណាមួយដែលបែងចែកមនុស្សនោះទេ ។១ ទ្រង់ « យោគយល់ថាសាច់ទាំងអស់ដូចគ្នា អ្នកណាដែលសុចរិត នោះត្រូវបានប្រោសប្រណីពីព្រះ » ( នីហ្វៃទី១ ១៧:៣៥ ) ។ មនុស្សទាំងអស់អាចមករកទ្រង់បានដើម្បី « មនុស្សទាំងអស់ក៏ដូចគ្នានៅចំពោះព្រះដែរ » ( នីហ្វៃទី២ ២៦:៣៣ ) ។ ទ្រង់ « ទតចំពោះក្នុងចិត្តវិញ » ( សាំយូអែល ទី១ ១៦:៧ ) ។ ទ្រង់ទទួលយកអស់អ្នកដែល « ប្រព្រឹត្តដោយសុចរិត … ស្រឡាញ់សេចក្ដីសប្បុរស ហើយឲ្យដើរ … ដោយសុភាពរាបទាប » ( មីកា ៦:៨ ) ។
មនុស្សគ្រប់គ្នា អាចជ្រើសរើសមករកព្រះយេស៊ូវគ្រីស្ទ ចុះសេចក្តីសញ្ញាជាមួយនឹងព្រះវរបិតាសួគ៌ ហើយដើរតាមមាគ៌ារបស់ទ្រង់ ។ ហើយសេចក្តីពិតនេះគួរតែណែនាំពីរបៀបដែលយើងចែកចាយដំណឹងល្អរបស់ព្រះអម្ចាស់ និងសេចក្តីស្រឡាញ់របស់ទ្រង់ ។
យើងមិនអាចមើលតែលក្ខណៈខាងក្រៅរបស់នរណាម្នាក់បានទេ ហើយគិតថាពួកគេមិន « សម » សម្រាប់ដំណឹងល្អនោះទេ ។ យើងមិនគ្រាន់តែអាចអនុវត្តតាមស្លាកខាងលោកិយចំពោះមនុស្ស ហើយគិតថាស្លាកទាំងនោះដកសិទ្ធិពួកគេពីការដាក់បញ្ចូលទៅក្នុងសាសនាចក្រនោះទេ ។ យើងមិនអាចគ្រាន់តែសម្រេចចិត្តមិនបម្រើនរណាម្នាក់ដោយសារតែពួកគេមានគំនិតនយោបាយ ចំណូលចិត្ត ឬរសជាតិខុសពីយើងនោះទេ ។
ព្រះមិនមើលឃើញបុគ្គលណាម្នាក់ជាបណ្តុំនៃស្លាកតំណាងឲ្យក្រុម ឬលក្ខណៈផ្សេងៗនោះទេ ។ ទ្រង់ទតឃើញបុគ្គលម្នាក់—ជាបុត្រាបុត្រីរបស់ទ្រង់ ។ ហើយនោះជារបៀបដែលយើងគួរមើលឃើញមនុស្សម្នាក់ៗ—ជាបុគ្គលពិសេសម្នាក់ដែលមានឱកាស និងសមត្ថភាពស្មើគ្នាក្នុងការមករកព្រះ ។
ចូរប្រមូលផ្តុំគ្នាវិញ
ប្រធាន រ័សុល អិម ណិលសុន បានលើកទឹកចិត្តយើងឲ្យចូលរួមក្នុងការប្រមូលសាសន៍អ៊ីស្រាអែល ។២ ប៉ុន្តែប្រសិនបើយើង មិនដូចព្រះទេ យើងជ្រើសរើសធ្វើជា « អ្នករើសអើងមុខអ្នកណា » នៅពេលនិយាយដល់ការចែកចាយដំណឹងល្អ និងរួមទាំងអ្នកដែលនៅព្រះវិហារ នោះយើងអាចនឹងកំពុងបែកខ្ចាត់ខ្ចាយ ឬបែងចែក ជាជាងយើងកំពុងប្រមូលផ្តុំ និងរួបរួមហើយ ។
សូមឲ្យយើងម្នាក់ៗធ្វើការប្ដេជ្ញាចិត្តថា ៖ កុំបែកខ្ចាត់ខ្ចាយទៀតឡើយ ។ ចូរប្រមូលផ្តុំគ្នាវិញ ។ ស្រឡាញ់ ចែកចាយ និងអញ្ជើញ ។
ដៃគូរបស់ខ្ញុំ និងខ្ញុំមិនប្រាកដថា តើស្ត្រីចំណាស់ដែលយើងបង្រៀននៅប្រទេសអាល្លឺម៉ង់ នឹងទទួលពិធីបុណ្យជ្រមុជទឹកដែរឬអត់ទេ ។ យើងមិនយល់ចិត្តរបស់គាត់ ប៉ុន្តែព្រះយល់ចិត្តគាត់ ។ ខ្ញុំរីករាយដែលយើងបានទទួលការបំផុសគំនិតឲ្យបន្តបង្រៀនគាត់ ។
នៅពេលយើងព្យាយាមធ្វើតាមព្រះវិញ្ញាណ ហើយព្យាយាមមិនរើសអើងមុខ នោះយើងនឹងទទួលបានការដឹកនាំដើម្បីជួយអ្នកដែលនៅជុំវិញយើងឲ្យមករកព្រះគ្រីស្ទ ទោះជាពួកគេមានភាពខុសគ្នាយ៉ាងណាក៏ដោយ ។