ប្រាំពីរ ថ្ងៃសម្រាប់ធ្វើការចែកចាយ

ដោយ សាន់ដ្រា អេដវើដស៍

ទស្សនាវដ្តីសាសនាចក្រ

អ្នកអាចចែកចាយដំណឹងល្អតាមទម្រង់ធម្មតា និងសាមញ្ញជាច្រើន ។ តើអ្នកត្រៀមខ្លួនសម្រាប់ការល្បងសមត្ថភាពហើយឬនៅ ?

នៅពេលយើងនិយាយអំពីការចែកចាយទីបន្ទាល់របស់យើង យើងតែងតែគិតអំពីការថ្លែងទីបន្ទាល់របស់យើងនៅក្នុងការប្រជុំសាក្រាម៉ង់ ឬការថ្លែងទីបន្ទាល់ដែលរៀបចំផ្លូវការមួយចំនួនផ្សេងទៀត ។ ប៉ុន្តែយើងបានទទួលការលើកទឹកចិត្តឲ្យ « ស្វែងរកឱកាសដើម្បីបង្ហាញពីសេចក្ដីជំនឿរបស់បងប្អូនតាមវិធីធម្មតា និងវិធីសាមញ្ញជាច្រើន » ។^១

នៅក្នុងរយៈពេលប្រាំពីរថ្ងៃនៃការល្បងសម្ថភាពខាងក្រោម អ្នកអាចចែកចាយទីបន្ទាល់របស់អ្នកតាមរបៀបខុសគ្នាជារៀងរាល់ថ្ងៃក្នុងមួយសប្តាហ៍ ។ អ្នកអាចធ្វើរឿងទាំងនេះតាមលំដាប់លំដោយ ឬអ្នកអាចបង្កើតគំនិតផ្ទាល់ខ្លួនរបស់អ្នកក៏បាន ! តើអ្នកត្រៀមខ្លួនសម្រាប់ការល្បងសមត្ថភាពហើយឬនៅ ?

រូបភាព

សាលាប្រជុំ

រចនារូបភាពដោយ អិមមីលី ដេវីស

ថ្ងៃទី ១ ៖ សាសនាចក្រ

សូមពិចារណាពីការថ្លែងទីបន្ទាល់របស់អ្នកក្នុងការប្រជុំតមអាហារ និងទីបន្ទាល់ក្នុងព្រះវិហារ ប្រសិនបើនោះជាអ្វីដែលអ្នកមានទំនុកចិត្តធ្វើ ។ បើមិនដូច្នោះទេ អ្នកក៏អាចចែកចាយទីបន្ទាល់របស់អ្នកនៅក្នុងព្រះវិហារដោយការចូលរួមក្នុងថ្នាក់របស់អ្នកនៅថ្ងៃអាទិត្យ និងក្នុងថ្នាក់សិក្ខាសាលាបានផងដែរ ។ មតិយោបល់ដែលអ្នកចែកចាយនៅទីនោះអាចលើកទឹកចិត្តដល់អ្នកដទៃ និងពង្រឹងទីបន្ទាល់របស់ពួកគេក៏ដូចជារបស់អ្នកផងដែរ ។

រូបភាព

មិត្តភក្ដិ

ថ្ងៃទី ២ ៖ មិត្តភក្តិ

តើអ្នកបានរៀនអ្វីខ្លះនៅក្នុងព្រះវិហារកាលពីថ្ងៃអាទិត្យ ? តើអ្នកចូលចិត្តអ្វីដែលនរណាម្នាក់បានចែកចាយនៅក្នុងសុន្ទរកថាប្រជុំសាក្រាម៉ង់ ឬនៅក្នុងការពិភាក្សាក្នុងថ្នាក់របស់អ្នកដែរឬទេ ? ប្រហែលជាបទចម្រៀងបើកកម្មវិធីគឺជាទំនុកតម្កើងមួយដែលអ្នកចូលចិត្ត ។ សូមប្រាប់មិត្តភក្តិអំពីរឿងនេះ ! បន្ទាប់មកសូមសួរអំពីសុខទុក្ខរបស់ពួកគេនៅចុងសប្តាហ៍ផងដែរ ។

រូបភាព

ទូរសព្ទហៅតាមប្រព័ន្ធផ្សព្វផ្សាយសង្គម

ថ្ងៃទី ៣ ៖ ប្រព័ន្ធផ្សព្វផ្សាយសង្គម

ប្រព័ន្ធផ្សព្វផ្សាយសង្គមគឺជាកន្លែងដ៏ល្អមួយដើម្បីចែកចាយកិច្ចការខាងវិញ្ញាណបានយ៉ាងធម្មតា និងសាមញ្ញ ។ សម្រាប់ការល្បងសមត្ថភាពនៅថ្ងៃនេះ សូមពិចារណាចែកចាយការចុះផ្សាយអំពី ៖

ខគម្ពីរមួយក្នុងចំណោមខគម្ពីរដែលអ្នកចូលចិត្ត ។
សម្រង់សម្តីលើកស្ទួយមកពីសន្និសីទទូទៅ ។
គំនិត ឬបទពិសោធន៍ខាងវិញ្ញាណ ។
អ្វីមួយដែលអ្នកស្រឡាញ់ ឬអរគុណចំពោះព្រះអង្គសង្គ្រោះ ។
ររបៀបដែលទ្រង់បានជួយអ្នកនាពេលថ្មីៗនេះ ឬគុណសម្បត្តិដែលអ្នកកោតសរសើរដែលទ្រង់មាន ហើយហេតុអ្វី ។

រូបភាព

ទូរសព្ទហៅតាមវីដេអូ និងសារជាអក្សរ

ថ្ងៃទី ៤ ៖ ផ្ញើសារ ឬវីដេអូ

ផ្ញើសារលើកទឹកចិត្តទៅកាន់មិត្តភក្តិម្នាក់តាមរយៈសារជាអក្សរ ឬវីដេអូ ។ អ្នកអាចចែកចាយការពិភាក្សាមកពីសន្និសីទមួយដែលអ្នកគិតថា ពួកគេប្រហែលជាចូលចិត្ត ប្រាប់ពួកគេនូវអ្វីមួយដែលអ្នកអរគុណដល់ពួកគេ ឬចែកចាយអំពីជំនឿរបស់អ្នកលើព្រះយេស៊ូវគ្រីស្ទ ។ ឧទាហរណ៍ ៖ ពួកគេប្រហែលជាត្រូវការដឹងអំពីសេចក្ដីស្រឡាញ់របស់ព្រះវរបិតាសួគ៌ដែលមានចំពោះពួកគេ ។ អ្នកអាចប្រាប់ពួកគេដោយផ្ទាល់បានជានិច្ច !

រូបភាព

យុវនារីដែលមានប៉េងប៉ោងរាងបេះដូង

ថ្ងៃទី ៥ ៖ ការបម្រើ

អ្នកអាចនឹងឆ្ងល់ថាតើការបម្រើអ្នកដទៃអាចជារបៀបមួយដើម្បីចែកចាយទីបន្ទាល់របស់អ្នកបានដោយរបៀបណា ។ សាវក ប៉ុល បានបង្រៀន ធីម៉ូថេថា « ចូរធ្វើជាគំរូដល់ពួកអ្នកជឿ ដោយពាក្យសម្ដី កិរិយាប្រព្រឹត្ត សេចក្តីស្រឡាញ់ សេចក្តីជំនឿ និងសេចក្តីបរិសុទ្ធ »( ធីម៉ូថេទី ១ ៤:១២ ) ។ ដូច្នេះ អ្នកអាចបង្ហាញជំនឿរបស់អ្នកតាមរយៈគំរូរបស់អ្នកបាន ដោយបម្រើអ្នកដទៃដូចជាព្រះអង្គសង្គ្រោះនឹងបម្រើពួកគេដូច្នោះដែរ ។

រូបភាព

ឧបករណ៍សិល្បៈ

ថ្ងៃទី ៦ ៖ សិល្បៈ

ពេលខ្លះមនុស្សប្រើសិល្បៈជាមធ្យោបាយដើម្បីចែកចាយគំនិត និងអារម្មណ៍របស់ពួកគេ ។ អ្នកអាចប្រើគំនូរ រូបចម្លាក់ កំណាព្យ តន្ត្រី ឬសិល្បៈប្រភេទផ្សេងៗទៀតដើម្បីចែកចាយពីអារម្មណ៍របស់អ្នកអំពីព្រះយេស៊ូវគ្រីស្ទ និងដំណឹងល្អរបស់ទ្រង់បាន ។

រូបភាព

យុវវ័យកំពុងនិយាយគ្នា

ថ្ងៃទី ៧ ៖ ការសន្ទនាធម្មតាៗ

សូមកុំខ្លាចក្នុងការលើកឡើងពីជំនឿរបស់អ្នកនៅឱកាសសាមញ្ញៗ ដូចជាអ្នកនឹងចែកចាយគំនិតផ្សេងទៀតដែលអ្នកមានអំពីប្រធានបទដែលបានផ្តល់ឲ្យ ។

ជាការពិតណាស់ អ្នកអាចនិយាយអំពីសកម្មភាពសាសនាចក្រ ឬបទគម្ពីរមួយដែលអ្នកបានអានថ្មីៗនេះ ប៉ុន្តែវាក៏អាចជារឿងធម្មតាជាងនេះទៅទៀតក៏បានដែរ ។ ឧទាហរណ៍ ៖

ប្រសិនបើអ្នកទទួលការបំផុសគំនិតពីធម្មជាតិ សូមបង្ហាញការដឹងគុណរបស់អ្នកចំពោះការបង្កបង្កើតរបស់ព្រះចំពោះនរណាម្នាក់ផ្សេងទៀត ។
ប្រហែលជាអ្នកធ្លាប់មានបទពិសោធន៍ខាងវិញ្ញាណដ៏គួរឲ្យចាប់អារម្មណ៍កាលពីពេលថ្មីៗ នេះ ។ សូមប្រាប់មិត្តភក្តិអំពីវា ប្រសិនបើវាមិនមានលក្ខណៈផ្ទាល់ខ្លួនពេកទេ ។
សូមស្វែងរកភាពស្រដៀងគ្នានៃដំណឹងល្អនៅក្នុងសៀវភៅ ឬភាពយន្តដែលអ្នកចូលចិត្ត ហើយចែកចាយការយល់ដឹងរបស់អ្នក ។

ធម្មតា និងសាមញ្ញ

នៅពេលអ្នកស្វែងរកវិធីផ្សេងៗដើម្បីចែកចាយជំនឿរបស់អ្នក វានឹងកាន់តែមានលក្ខណៈសាមញ្ញសម្រាប់អ្នកដើម្បីធ្វើដូច្នេះ ។ ដំបូងវាអាចនឹងមានអារម្មណ៍ថាឆ្គង ប៉ុន្តែមិនថ្វីទេ ! សូមចាំថា ទីបន្ទាល់របស់អ្នកផ្ទាល់ គឺជាការសាមញ្ញសម្រាប់អ្នកទៅហើយ—វាជាផ្នែកមួយដែលបង្ហាញថាអ្នកជានរណា ។ ការចែកចាយទីបន្ទាល់ក៏អាចក្លាយជាការសាមញ្ញផងដែរ ។ អ្វីដែលវាត្រូវការនោះគឺការបង្ហាញវាឲ្យកាន់តែច្រើនបន្តិចជារៀងរាល់ថ្ងៃ ។

តើអ្នកនឹងចែកចាយទីបន្ទាល់របស់អ្នកនៅថ្ងៃនេះដោយរបៀបណា ?