“Pinalangga sa Dios,” Alang sa Kalig-on sa mga Kabatan-onan, Sept. 2023.
Dali, Sunod Kanako
Pinalangga sa Dios
Sa plano sa Dios sa kalipay, ang matag batan-ong babaye ug batan-ong lalaki adunay balaanong katuyoan, matag usa ninyo pinalangga ug gikinahanglan.
Hunahunaa kon sama sa unsa kaha ang musika kon ang matag instrumento parehas ra og tingog. Unsa kaha kon ang matag tekla [key] sa piano parehas ra og nota o kon ang matag tingog sa choir parehas ra? Makapahimo kini sa musika nga puol kaayo paminawon!
Maayo na lang, ang mga instrumento sa musika ug mga tingog sa choir managlahi ang tingog ug tono. Ang mga tekla sa piano naghatag og daghang melodiya, ug ang mga choir naghatag og maanindot nga mga harmoniya. Ang mga French horn, mga tuba, mga bayolin, ug mga tambol matag usa nakadugang og talagsaong tingog ngadto sa harmoniya sa orkestra.
Mga Kalig-on ug mga Gasa
Sama sa musika, ang Langitnong Amahan nalipay sa nagkadaiyang mga talento, mga personalidad, ug mga kasinatian sa matag usa sa Iyang mga anak, matag usa pinalangga nga anak nga babaye ug anak nga lalaki. Bisan unsa pa ang inyong mga kahimtang, bisan asa pa kamo nagpuyo taliwala sa kanasoran, kaliwatan, ug katawhan, ang Langitnong Amahan nagmaya sa inyong walay kinutoban nga potensiyal, kon kinsa kamo sa umaabot pinaagi sa pagkamasulundon, grasya, ug gugma.
Uban sa dakong gugma, Siya nagdapit kaninyo sa pagdiskobre sa inyong balaanong pagkatawo ug pagtuman sa inyong balaanong katuyoan. Siya nag-awhag kaninyo sa pagpalambo sa inyong espirituhanong mga gasa, diosnong kinaiya, ug halapad kaayo nga mga posibilidad. Ug Siya nagtanyag ninyo og inadlaw nga mga oportunidad sa pagkat-on sa pagtan-aw ug pagserbisyo niadtong naglibot ninyo sama sa buhaton ni Jesukristo.
Sa balaanong plano sa Dios, kita mianhi niini nga kalibotan pinaagi sa usa ka inahan ug amahan. Ang mga pamilya nagkinahanglan sa duha. Silang duha, isip parehas nga managkauban, ang mga ginikanan moamuma ug mosangkap sa ilang mga pamilya. Sa atong mga panimalay, ang mga amahan ug mga bana mao ang mangulo uban sa kalumo, kaaghop, ug gugma nga walay pagpakaaron-ingnon—matarong nga mga kinaiya nga gikinahanglan sa kalalakin-an ug kababayen-an diha sa atong tanang relasyon. Ang langit maghilak kon, sa bisan unsa nga relasyon, adunay pag-abuso, pagdominar, o pagpamugos sa bisan unsa nga matang, sa kalalakin-an o sa kababayen-an. Ang pagkadili mapugsanon, pagkamainantoson, pagkamabination, ug putli nga kahibalo mao ang Kristohanong mga kinaiya nga gitinguha sa matag usa nato.
Siyempre, walay usa nga hingpit—ni ang bisan unsa nga pamilya. Bisan unsa pa ang inyong kahimtang, tahora ang inyong mga ginikanan ug higugmaa ang inyong pamilya—ang pamilya ninyo karon ug ang inyong pamilya sa umaabot. Ang atong Manluluwas makatabang ninyo sa pagsabot, pagpasaylo, ug pag-awhag niadtong naglibot ninyo. Kon buhaton ninyo ang kutob sa inyong mahimo, ang Ginoo motabang ug mogiya ninyo. Palihog hinumdomi nga ang inyong kahimtang atubangan sa Ginoo ug sa Iyang Simbahan matino pinaagi sa inyong personal nga kinaiya ug pagkamatarong sa pagtuman sa inyong mga pakigsaad uban sa Dios.
Pagkapari ug Plano sa Dios
Ang Dios mas nahigugma kanato ug mas nakaila kanato kay sa atong paghigugma o pagkaila sa atong kaugalingon. Ang Iyang katungod sa pagkapari gihatag aron sa pagpanalangin sa Iyang tanang anak. Ang takos nga mga igsoong lalaki mao ang naghupot sa pagkapari, apan sila dili mao ang pagkapari. Si Presidente Russell M. Nelson nagtudlo nga ang pagkapari “importante sa [kababayen-an] sama ni bisan kinsa nga lalaki.” Ang pagkapari naghatag sa kababayen-an ug kalalakin-an og “kahigayonan sa … tanang espirituhanon nga mga bahandi sa Ginoo alang sa Iyang mga anak.”1
Pagtinabangay sa Pagserbisyo
Sa Simbahan sa Ginoo, kita nakigtambagay diha sa konseho samtang nagtinabangay sa pagserbisyo. Sa atong mga konseho, ang mga lider mangayo og mga hunahuna ug mga ideya sa tanan, lakip na sa mga batan-ong babaye ug mga batan-ong lalaki. Sa matag sitwasyon, makakab-ot kita og mas maayo nga mga desisyon ug adunay mas dakong kalamposan diha sa pagserbisyo sa Ginoo kon kita mohatag og bili sa mga kontribusyon sa usag usa ug magtambayayong, mga managsoon diha sa Iyang buhat.
Sa atong mga ward ug mga branch, mga batan-ong babaye ug mga batan-ong lalaki ang mangulo sa mga klase ug mga korum. Sa konseho sa kabatan-onan sa ward, ang atong mga lider sa kabatan-onan manag-uban sa pagtabang sa matag batan-on nga makonektar sa langit, sa atong mga lider sa Simbahan, ug sa ubang kabatan-onan. Isip tigpangalagad nga mga kompanyon sa mga hamtong, ang atong mga batan-ong lalaki ug mga batan-ong babaye magtabang ug magpanalangin sa daghan. Sa atong pagserbisyo, kitang tanan magkahiusa.
Pagkanindot nga panalangin nga ang mga batan-ong lalaki ug mga batan-ong babaye nagserbisyo isip mga saksi sa gipahiuli nga mga ordinansa sa ebanghelyo. Kamo mao ang mga saksi alang sa mga bunyag, mga bunyag alang sa mga buhi ug mga bunyag alang sa mga katigulangan diha sa templo. Kamo nagserbisyo usab sa ubang mga dapit sa balay sa Ginoo.
Mga Panalangin sa Pakigsaad uban sa Dios
Sa indibidwal nga paagi, ang matag batan-ong babaye ug matag batan-ong lalaki maghimo og sagrado nga mga pakigsaad uban sa Dios. Kon matinud-anong tumanon, ang atong mga pakigsaad uban sa Dios magdala sa Iyang mga panalangin—mas dako kay sa atong mahunahuna. Ang atong mga pakigsaad uban sa Dios makapaputli sa atong mga tinguha ug mga binuhatan. Ang atong mga pakigsaad ug ang Pag-ula ni Kristo makatabang nato nga mahimong sama sa usa ka anak sa Dios—mapaubsanon, mapailobon, puno sa gugma (tan-awa sa Mosiah 3:19). Sa tanan natong buhaton, atong sugdan pinaagi ni Jesukristo. Siya ang pilion nato og una taliwala sa atong daghang pagpili, ug unahon nato Siya sa matag pagpili nga atong himoon.
Tan-aw ngadto sa Manluluwas
Makasinati kamo og kalipay, init nga mga pagbati sa inyong kasingkasing kon ibutang ninyo si Jesukristo diha sa sentro sa inyong pagkat-on sa ebanghelyo, pagserbisyo, mga kalihokan, ug personal nga kalamboan ug samtang mopili kamo sa maayo. Ang inyong nakasentro kang Kristo nga mga paningkamot makalingaw ug magantihon samtang nagtabang kamo sa uban sa tiunay nga kaluoy ug gugma.
Talagsaong mga butang mahitabo kon ang mga batan-ong lalaki ug mga batan-ong babaye nahigugma sa Ginoo ug nagtinabangay sa pagserbisyo diha sa panaghiusa ug panag-uyon. Mao usab kini diha sa seminary, regular nga mga kalihokan sa kabatan-onan, ug AKK [FSY].
Uban sa walay kinutoban nga gugma, ang atong Langitnong Amahan nagdapit sa matag batan-ong babaye ug batan-ong lalaki “sa pagduol ngadto kaniya ug sa pag-ambit sa iyang kaayo; ug siya wala maglimod kang bisan kinsa nga moduol ngadto kaniya” (2 Nephi 26:33).
Ang Langitnong Amahan ug si Jesukristo nahigugma kaninyo. Sila motabang ug mopanalangin ninyo aron tinuoray nga magmalipayon. Palihog pilia og una ang atong Manluluwas nga si Jesukristo. Salig sa Dios ug mahimong usa diha ni Jesukristo uban niadtong naglibot kaninyo. Isip usa ka pinalangga nga anak sa Dios, kamo makakonektar ug mahisakop sa komunidad sa mga Santos nga mao ang Iyang gipahiuli nga Simbahan—Ang Simbahan ni Jesukristo sa mga Santos sa Ulahing mga Adlaw. Kon kinsa kamo karon ug kon kinsa kamo sa umaabot mao ang gikinahanglan sa kalibotan karon. Pagkadako sa kalainan nga inyong mahimo diha sa inyong pamilya, sa Iyang gipahiuli nga Simbahan, ug sa kalibotan.
Diha ni Jesukristo, ang tanang maayo nga mga butang posible. Diha ni Jesukristo, ang tanang tinuod nga mga butang mapahinabo, sa tukmang panahon ug pamaagi sa Dios. Isip usa sa Iyang espesyal nga mga saksi, ako nagpamatuod ug nagsaad.