“Ako Makapabilin sulod sa mga Linya,” Alang sa Kalig-on sa mga Kabatan-onan, Sept. 2023.
Ako Makahimo sa Tanan nga Butang pinaagi kang Kristo
Ang kabatan-onan nagpakigbahin kon sa unsang paagi si Kristo milig-on kanila sa pagbuhat sa lisod nga mga butang (tan-awa sa Mga Taga-Filipos 4:13).
Ako Makapabilin sulod sa mga Linya
Sukad sa akong pagsugod og apil sa lumba sa dagan, nangandoy gyod ko nga malagpasan ang rekord sa eskwelahan sa milya nga pagdagan. Unya paingon sa kataposan niini nga panahon midagan ko og milya sa sakto nga lima ka minuto, nalagpasan ang rekord og sobra sa tulo ka segundo.
Apan pagkasunod adlaw, among nahibaloan nga ang akong milya walay kwenta. Ang opisyales mipasabot nga nakahimo ko og tulo ka lakang sulod sa lumbaanan, nga nakapahimo nakong dili kwalipikado sa lumba. Ang akong coach nakiglalis nga nakatunob ko kay natukmod ko sa laing miapil sa lumba. Ang opisyal miingon, “Tingali dili niya sayop nga siya gitukmod, apan iyang sayop kay duol kaayo siya sa linya.” Milakaw ko nga mibati nga ang akong kalamposan sayop nga giilog gikan kanako.
Pagkasunod Dominggo sa klase sa Young Women, nagtan-aw kami og bidyo nga nagtandi sa pagpabilin diha sa mga linya sa mga isport ngadto sa pagsunod sa mga sugo.1 Sa tibuok nga leksiyon naglingkod ko didto, naglagot nga nakahinumdom nga napakyas ko.
Pagkasunod adlaw samtang nagdagan ko libot sa lumbaanan og dagan, miduko ko ug nakabantay nga nagdagan ko ibabaw sa sulod nga linya. Ug matag karon ug unya, motunob ko sa sulod, sama sa giingon sa opisyal. Dihadiha dayon mihunong ko og dagan, nagmapaubsanon. Komportable ra kaayo ko kon asa ko nagdagan nga wala na ako makakita sa mga kakuyaw niini.
Maayo na lang, gihatagan ko og ikaduhang higayon pipila ka semana ang milabay. Mipalayo ko sa sentro nga linya ug nalagpasan ang rekord sa eskwelahan, niiniing higayona nagpabilin sulod sa utlanan.
Kana nga kasinatian nakapahunahuna nako kon unsa na ako kaduol sa linya nga akong gidaganan sa pipila sa mga sugo. Apan tungod ni Jesukristo ug sa Iyang Pag-ula, gihatagan ko kanunay og laing higayon samtang ako maghinulsol.
Kalabot sa mga sugo, kita kinahanglang mopalayo sa linya ug mobuhat sa atong labing maayo aron magpabilin sulod sa mga utlanan. Apan mapasalamaton ko nga kon kita makahimo og mga sayop, ang Manluluwas motugot nato sa paghinusol ug sa pagsulay pag-usab.
Raygan P., Utah, USA