“Tulo ka Leksiyon gikan sa Katuigan sa Pagka-tinedyer ni Joseph Smith,” Alang sa Kalig-on sa mga Kabatan-onan, Sept. 2023.
Tulo ka Leksiyon gikan sa Katuigan sa Pagka-tinedyer ni Joseph Smith
Tan-awa kon unsay inyong makat-onan gikan sa mga kasinatian sa Propeta 200 ka tuig ang milabay.
Gibati ba nimo nga morag lisod nga makasabot sa mga tawo kaniadto? Nagpuyo sila sa dugay na kaayong panahon—makatudlo ba gayod sila nimo og bisan unsa mahitungod sa imong kinabuhi? Oo! Si Joseph Smith usa ka maayong ehemplo. Sa nag-edad siya og 18, nakakat-on siya og pipila ka butang mahitungod sa pagdawat og mga tubag sa pag-ampo ug sa iyang relasyon ngadto sa iyang Langitnong Amahan. Kadto nga mga leksiyon makatabang nimo karon.
Leksiyon #1: Usahay nagkinahanglan kini og panahon aron madawat ang mga tubag.
Ang mga tubag sa pag-ampo dili sa kanunay moabot dayon. Ang paghulat dili sayon—labi na nga ang paspas nga mga tubag anaa na sa internet sa hapit tanang pangutana.
Kon bation nimo nga dugay ka nga gitubag sa Dios, wala ka mag-inusara. Si Joseph Smith 12 anyos sa dihang nagsugod siya sa paghunahuna mahitungod “sa tanang importante nga mga pagpakabana alang sa [iyang] imortal nga kalag.”1 Nakigbisog siya sa mga pangutana mahitungod sa iyang personal nga katakos ug pagkadaotan sa kalibotan sulod sa sunod nga duha ka tuig. Milungtad kini og duha ka tuig sa pagpamalandong, pagtuon sa mga kasulatan, ug pagtrabaho niadto nga mga pangutana sa wala pa ang Dios ug si Jesukristo mopakita kaniya sa Sagrado nga Kakahoyan.
Ingon usab kini ngari kanato. Kon kita adunay pangutana, tingali molungtad kini og mga adlaw, mga bulan, o gani mga tuig sa dili pa nato madawat ang tubag. Apan OK ra kana. Ang buhat nga atong gihimo samtang naghulat mahinungdanon. Hinumdomi unsay gitudlo ni Elder Jeffrey R. Holland sa Korum sa Napulog Duha ka Apostoles: “Ang liso kinahanglang alimahan ug ato gayod nga hulaton nga kini mohingkod.”2
Leksiyon #2: Ang Dios nakaila sa atong ngalan.
Sa wala pa siya mag-edad og 18, si Joseph gibisitahan sa Dios nga Amahan, ni Jesukristo, ug sa anghel nga si Moroni. Nindot kaayo kadto! Ug kining balaanong mga binuhat tanan nakaila sa ngalan ni Joseph. Sila nakaila niya sa personal!
Ang Dios nakaila usab nimo sa personal. Ikaw Iyang anak ug siya nakaila sa imong ngalan. Ang Dios nagtudlo niini nga kamatuoran mahitungod sa Iyang mga nilalang: “Ang tanan nga mga butang maihap ngari kanako, kay sila ako ug Ako nakaila kanila” (Moises 1:35).
Kabahin sa rason nga si Joseph masaligon sa pagbuhat sa unsay gipabuhat kaniya mao nga siya nakasabot nga siya anak sa Dios, kinsa nakaila kaniya sa personal.
Leksiyon #3: Kon kita mahinulsolon, atong gibuksan ang atong kaugalingon sa espirituhanon nga mga kasinatian.
Usa sa labing nakapadasig ni Joseph nga moadto sa Sagrado nga Kakahoyan kay aron maghinulsol sa iyang mga sala. Mao gihapon kana ang rason nga nag-ampo siya nianang gabii nga ang anghel nga si Moroni mipakita niya: “alang sa kapasayloan sa [iyang] tanan nga mga sala ug kahilayan” (Joseph Smith—Kasaysayan 1:29). Nagtudlo kini nato og duha ka butang:
Una, kon nakahimo kita og mga sayop, kinahanglang dili kita maghunahuna nga dili kita angayan nga mag-ampo. Si Joseph nakahimo og “mga sala ug kahilayan,” apan sa gihapon siya nakahibalo nga siya mahimong mag-ampo ug makadawat og kapasayloan.
Ikaduha, kon kita mahinulsolon, atong bation ang Espiritu sa mas lig-ong paagi. Sama sa gipasabot ni Elder Jörg Klebingat sa Seventy, “Ang espirituhanong pagsalig molambo kon kamo boluntaryo ug malipayong maghinulsol sa mga sala.”3
Si Presidente Russell M. Nelson nagtudlo nga ang paghinulsol nagtabang nato nga mahimong mas sama sa Manluluwas. Kon kita maghinulsol, atong gibuksan ang mga pultahan sa langit. “Kita mopili nga molambo sa espirituhanon nga paagi ug makadawat sa hingpit nga kalipay––ang hingpit nga kalipay sa katubsanan diha Kaniya.”4
Mao nga kon ikaw kinahanglang maghinulsol sa usa ka butang, buhata kini! Dili lang kini makahatag nimo og kalinaw ug makatabang nimo nga mas mahisama sa Manluluwas, apan makatabang usab nimo kini nga bation ang Espiritu sa mas lig-ong paagi ug madawat ang mga tubag sa mga pag-ampo.
Si Joseph Smith tingali nagpuyo sa dugay nang panahon, apan ang mga leksiyon nga iyang nakat-onan isip tin-edyer makatabang gihapon nimo karon. Lain pa usab kini nga rason aron nga magmapasalamaton ni Propeta Joseph Smith.