“Mibati nga Naugtas, Nabalaka, o Naguol?,” Alang sa Kalig-on sa mga Kabatan-onan, Sep. 2023.
Tabang sa Kinabuhi
Mibati nga Naugtas, Nabalaka, o Naguol?
Aniay pipila ka butang nga mahimo nimo mahitungod niini.
Pagtesting sa Kaugtas
Unsa ka grabe ang kaguol o kaugtas nga inyong gibati?
Kon kamo nakasinati nga wala nay paglaom, kataranta, o taas na og panahon nga depresyon o kabalaka, palihog pangayo og tabang pinaagi sa pagpakigsulti ngadto sa usa ka kasaligan nga hamtong. Mahimo usab ninyong sulayan ang pipila ka kasayoran diha sa yellow nga seksiyon (labi na ang mga sukaranan!), apan usahay magkinahanglan kamo og dugang nga tabang, ug OK ra kana.
Kon mibati kamo nga gustong maghikog, pangayo dayon og tabang. Kontaka ang inyong lokal nga pang-emerhensiya nga help line, departamento sa kapolisan, o ospital.
Normal lang nga mabalaka, maguol, o maugtas usahay. Kini nga mga pagbati kasagaran matandog tungod sa mga sirkumstansiya sa kinabuhi ug moabot ug molabay samtang ang kinabuhi nag-usab-usab. Sulayi ang pipila ka kasayoran nga makatabang!
Ang mga Sukaranan
-
Dangop ngadto sa Langitnong Amahan. Siya maminaw ug motubag sa inyong mga pag-ampo. Siya motabang kaninyo sa pag-atubang sa mga hagit nga moabot kaninyo.
-
Ipunting ang hunahuna ngadto ni Jesukristo. “Ang kalipay nga atong gibati dili kaayo konektado sa mga sirkumstansiya sa atong kinabuhi apan ang tanan konektado kaayo sa gitutokan sa atong kinabuhi.”1
-
Pagserbisyo sa uban. “Sa atong paghatag sa atong mga kaugalingon sa pag-alagad sa uban, atong madiskobrehan ang atong kaugalingong mga kinabuhi ug atong kaugalingong kalipay.”2
-
Ipabilin ang inyong espiritu nga himsog. Pagbasa kanunay sa mga kasulatan matag adlaw, tambong sa templo kon mahimo, pag-ambit sa sakramento, tumana ang inyong mga pakigsaad, ug paghinulsol matag adlaw. Pangayo og mga panalangin sa pagkapari kon kamo nagkinahanglan niini.
-
Ipabilin ang inyong panglawas nga himsog. Pagbaton og igong katulog ug pag-ehersisyo, ug sunda ang Pulong sa Kaalam.
Kon Kamo Mibati og Kabalaka
-
Tutok sa karon. Dili makatabang nga mabalaka mahitungod sa umaabot o maugtas mahitungod sa nangagi. Ang karon mao lamang ang butang nga mahimo gayod ninyong usbon.
-
Paggahin og panahon sa pagrelaks. “Kini dili panginahanglan nga ang usa ka tawo kinahanglan modagan nga labaw pa kay sa iyang kusog” (Mosiah 4:27).
-
Positibo nga maghunahuna. Ang negatibo nga mga pagbati mahimong maoy hinungdan sa negatibo nga mga hunahuna. Ang positibo nga paghunahuna makatabang ninyo nga mobati nga dili kaayo mahadlok o mabalaka.
Kon Kamo Mibati og Kaguol
-
Hibaloi nga ang mga pagsulay kabahin sa plano. Ang pagsinati og lisod nga mga sirkumstansiya wala gayod magpasabot nga kamo adunay nahimong sayop. Mosalig nga ang Langitnong Amahan molig-on kaninyo ug ang inyong mga hagit maanaa alang sa inyong kaayohan (Doktrina ug mga Pakigsaad 90:24; tan-awa usab sa Mga Taga-Roma 8:28; Doktrina ug mga Pakigsaad 122:5–9).
-
Motutok sa pagpasalamat. Isulat ang mga butang nga inyong pasalamatan matag adlaw, ug siguroa nga mopasalamat sa Langitnong Amahan (tan-awa sa Doktrina ug mga Pakigsaad 98:1).
-
Buhata ang mga butang nga malingaw kamo. Mogahin og panahon uban sa mga higala ug pamilya, mosulay og bag-ong kahanas, maminaw sa makadasig nga musika, o magplano og makalingaw nga kalihokan.
Kon Kamo Mobati nga Dili Kamo Ingon ka Maayo
-
Hibaloi nga dili kamo kinahanglan nga mahimong hingpit. “Dinhi sa mortalidad ang pagkahingpit ‘gipaabot pa.’”3 Ayaw ikomparar ang inyong kaugalingon sa uban, sa tinuod nga kinabuhi o sa social media.
-
Pagsulti nga mabination sa inyong kaugalingon. Magmabination sa inyong kaugalingon, sama sa inyong buhaton ngadto sa usa ka higala. Ang Espiritu Santo mabination usab nga makigsulti ninyo ug dili gayod magbugal-bugal o mopakaubos kaninyo.
-
Hibaloi nga ang Manluluwas molig-on sa mga kahuyang. Si Jesukristo namatay alang sa atong mga sala ug midala sa Iyang Kaugalingon sa mga kasakit, mga sakit ug mga balatian (tan-awa sa Alma 7:11–12). Kon kita mapaubsanon, Siya misaad nga “mohimo sa mahuyang nga mga butang nga mahimo nga malig-on” (Ether 12:27). Kita dili tingali ingon ka maayo sa atong kaugalingon, apan kita mahimong ingon ka maayo uban Kaniya.
Panapos
Kamo aduna tingali daghang adlaw nga kamo mobati nga masaligon ug andam sa pag-atubang sa mga hagit sa kinabuhi. Bisan unsa pa kanindot ang inyong bation, siguroa nga magpadayon kamo sa pagbuhat sa mga sukaranan.
Pag-ampo ngadto sa Langitnong Amahan—bisan kon sayon ra ang kinabuhi. Motutok sa unsay nahimo sa Manluluwas alang ninyo ug sa Iyang kinabuhi ug mga pagtulon-an—bisan kon maayo ra ang dagan sa mga butang. Dayon kon makasinati kamo og lisod nga mga pagbati, kamo mas mahimong andam sa pagdumala niini.