“Kon ang Usa ka Minahal Adunay mga Panglimbasog sa Kahimsog sa Pangisip,” Alang sa Kalig-on sa mga Kabatan-onan, Sept. 2023.
Tabang sa Kinabuhi
Kon ang Usa ka Minahal Adunay mga Panglimbasog sa Kahimsog sa Pangisip
Ania ang lima ka ideya aron isilsil sa hunahuna kon kamo gustong motabang sa usa ka tawo nga nag-antos og depresyon, kabalaka, o ubang emosyonal nga mga hagit.
Mga paghulagway pinaagi ni Toby Newsome
Lisod kaayo nga magtan-aw sa usa ka higala o sakop sa pamilya nga nakasinati og depresyon, kabalaka, o ubang mga hagit sa kahimsog sa pangisip. Tingali gusto nimong mobuhat og butang aron makatabang apan dili sigurado kon unsa.
Ania ang pipila ka ideya aron isilsil sa hunahuna samtang magkonsiderar kon unsaon ninyo pagtabang ang usa ka tawo nga nanglimbasog sa ilang kahimsog sa pangisip:
1. Motabang gayod.
Kon naghunahuna kamo kon labing maayo ba nga motabang o mopalayo, ang tubag mao: motabang gayod. Ang suod nga sosyal nga mga relasyon makatabang gayod sa mga tawo nga nanglimbasog sa kahimsog sa pangisip. Pakig-istorya nila. Apil uban nila. Morag yano ug normal ra kini, apan motabang gayod.
2. Ayaw paghatag og tambag gawas kon mangayo sila ninyo.
Kon ang usa ka tawo wala pa mangayo ninyo og tabang, ayaw pagsugod sa paghatag nila og tambag. Hangtod nga mangayo sila ninyo, motutok lamang sa pagkamahigalaon, mapinanggaon, ug matinuoron nga nagpakabana.
3. Magmalumo, positibo, ug maluluy-on.
Kon ang usa ka tawo mangayo sa inyong tabang, sunda ang tambag sa Manluluwas. Pag-ampo sa Langitnong Amahan alang sa inspirasyon. Magmadasigon. Mosulti nila sa malumo nga paagi. Mosulti og positibo nga mga butang. Mopakita og pagsabot ug kaluoy. Pahibaloa sila nga kamo mosuporta nila ug anaa alang nila. Malumong moawhag nila sa pagpangayo og propesyonal nga tabang.
4. Magmapailobon ug magmakanunayon.
Ang mga tawo nga nanglimbasog tingali usahay dili mopagawas sa gibati o mapasalamaton. Apan pagmapailobon. Pagpabilin nila. Ang pagpalayo dili gayod makaayo nila. Ayaw gayod og palayo kon dili sila mopahayag sa paagi nga gusto ninyo.
5. Atimana usab ang inyong kaugalingon.
Seguroa nga nakaplagan ninyo ang kalipay sa inyong kinabuhi. Ipadayon ang inyong personal nga pag-ampo ug pagtuon sa kasulatan. Motambong sa templo. Buhata ang uban nga pipila ka butang nga malingaw kamo. Ayaw tugoti nga ang kaugtas ug kabalaka sa sitwasyon sa inyong minahal mobuntog kaninyo. Pangayo og tabang sa uban alang sa suporta kon nagkinahanglan kamo niini.