“4 ka Paagi sa Pagpalig-on sa Inyong Pamilya,” Alang sa Kalig-on sa mga Kabatan-onan, Sept. 2023.
4 ka Paagi sa Pagpalig-on sa Inyong Pamilya
Inyong mapalig-on ang inyong pamilya nga mahimong labing maayo kutob sa mahimo pinaagi sa pagpanimuyo diha sa ebanghelyo ni Jesukristo.
Dili igbali kon unsa ka lig-on ang inyong pamilya, kanunay kining nagkinahanglan og gamayng pagpalig-on. Karong panahona, daw ang mga paghampak ngadto sa pamilya kanunayng anaa. Kini tungod kay si Satanas nahibalo nga ang pamilya importante ngadto sa plano sa Langitnong Amahan. Kon adunay bisan unsa nga mabuhat sa kaaway nga makabalda sa kinabuhi sa pamilya, seguradoha nga siya mosulay.
Bisan kon walay pamilya nga hingpit, ang inyo adunay usa ka butang nga nakabintaha nga walay laing pamilya ang anaa: kamo! Ug kamo adunay ebanghelyo ni Jesukristo sa inyong kiliran. Ang mga propeta ug mga apostoles mitudlo, “Ang kalipay diha sa kinabuhi sa pamilya labaw nga makab-ot kon gipasikad diha sa mga pagtulun-an ni Ginoong Jesukristo.”1
Aniay pipila ka paagi nga ang ebanghelyo sa Ginoo makapalig-on ug magdala og kalipay ngadto sa inyong pamilya:
-
Ang mga pamilya mabugkos sa tanang kahangtoran.
-
Ang mga pamilya malingaw nga maggahin og panahon nga mag-uban, maghatag og serbisyo sa matag usa, ug makasinati sa pagkahisakop ug mobati sa balaanon nga pagkatawo.
-
Ang mga pamilya makasalig sa gahom ni Jesukristo aron sa pagsulbad sa mga walay pagsinabtanay, mga panagbingkil, ug mga hagit pinaagi sa paghinulsol, pagpasaylo, ug hugot nga pagtuo.
Aniay upat ka paagi nga kamo makapalig-on sa inyong pamilya pinaagi sa pagpanimuyo diha sa ebanghelyo:
Mga Paghulagway ni Lai T. Sheng
1 Awhaga sa Pag-ampo
Ang mga pamilya mahimong mas lig-on kon sila mag-uban sa pag-ampo. Ang pag-ampo makapanalangin sa inyong pamilya og kalinaw, gugma, ug panag-uyon. Kon ang pag-ampo dili naandan nga buhat sa inyong pamilya, pag-ampo aron masayod kon sa usang paagi nga kamo makatabang sa inyong pamilya nga manag-uban nga mag-ampo. Pangandam sa paglihok sa mga tubag nga inyong madawat.
2 Magdungan sa Pagsimba
Sa simbahan makakat-on kita kabahin sa ebanghelyo ni Jesukristo. Moambit usab kita sa sakramento ug makigsaad sa Dios nga kita andam nga modala kanato sa ngalan ni Jesukristo ug kanunay nga mohinumdom Kaniya (tan-awa sa Mosiah 18:8–10; Doktrina ug mga Pakigsaad 20:77, 79).
Ang pagsimba isip usa ka pamilya makatabang sa pagdala sa tanan nga mas duol sa Dios ug sa usa’g usa. Nagkinahanglan og pasalig ang pag-adto matag semana, palihog hibaloi nga ang inyong pagtambong makapalig-on kaninyo ug makatabang kaninyo sa pagkaplag og laing mga paagi nga kamo makapalig-on sa inyong pamilya. Kon ang inyong pamilya mopili nga dili mosimba uban kaninyo, palihog hibaloi nga ang inyong pagtambong makapalig-on kaninyo ug makatabang kaninyo sa pagkaplag og mga paagi nga kamo makapalig-on sa inyong pamilya.
3 Paghigugma ug Pagserbisyo
Ang Manluluwas mitudlo, “Maghigugmaay sa usag usa, maingon nga ako nahigugma kaninyo” (Juan 15:12). Sultihi ang inyong pamilya kon unsa ninyo sila ka pinangga––bisan kon segurado kamo nga nahibalo na sila. Ang pagpadayag sa inyong gugma alang sa inyong pamilya pinaagi sa pulong ug buhat nagdapit sa Espiritu sa inyong panimalay.
Ang pagserbisyo sa mga sakop sa pamilya usa ka importante nga paagi sa pagpakita sa inyong gugma. Ug ang dungan nga pagserbisyo sa uban makapasuod usab sa inyong pamilya sa usa’g usa ug ngadto sa Langitnong Amahan. Dili ninyo kinahanglang mohimo og dakong proyekto sa pagserbisyo. Ang pagserbisyo mahimong yano, sama sa pag-andam sa paborito nga pagkaon alang sa usa ka silingan. Ang pagserbisyo isip usa ka pamilya magdala og hingpit nga kalipay tungod kay, sa atong mabasahan sa mga kasulatan, “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).
4 Sunda ang Ebanghelyo
Daghang pamilya ang adunay mga sakop kinsa dili mga miyembro sa Simbahan o kinsa mipili nga mohunong sa pagsimba. Kon walay suporta sa pamilya, mahimong lisod ang pag-apil diha sa simbahan. Kon ang inyong pamilya anaa sa sama nga sitwasyon, hinumdomi nga ikaw mahimo gihapon nga usa ka maayo nga impluwensiya pinaagi sa pagsunod sa ebanghelyo.
Pakit-a ang inyong pamilya nga kamo nagsunod sa unsay inyong gituohan. Wala gayod kamo masayod kanus-a sila magtan-aw kon unsay inyong isulti o buhaton. Kini magdala sa kahayag sa ebanghelyo ngadto sa inyong pamilya. Bisan unsa paman ang inyong sitwasyon, ang inyong makanunayon nga mga paningkamot sa pagsunod sa ebanghelyo makaabli sa pultahan aron ang Espiritu moggiya, moimpluwensiya, ug mobayaw sa inyong pamilya ug motabang kanila nga mopaduol ngadto sa Manluluwas, si Jesukristo.