“Buhii, ug Paminaw,” Alang sa Kalig-on sa mga Kabatan-onan, Sept. 2023.
Buhii, ug Paminaw
Aduna koy plano sa pagkab-ot sa akong mga pangandoy. Apan sa dihang akong gibuhian ug gitugotan ang Ginoo sa paggiya sa akong dalan, napanalanginan ko sa maanindot nga mga paagi.
Paghulagway pinaagi ni Michael Mullan
Sa dihang mga 17 anyos pa ko, mibalhin ko ngadto sa San Francisco, California, USA, aron moeskwela sa pang-art nga eskwelahan. Nangandoy ko nga mahimong tighulagway [illustrator] sa Disney.
Sa kolehiyo, nakakat-on ko og daghan pa kay sa art. Nakakat-on ko kon kinsa ko ngadto sa akong Langitnong Amahan. Wala na ko sa among panimalay. Wala nay ginikanan nga mopukaw nako aron dad-on ko sa simbahan matag Dominggo. Walay makahibalo kon nagsunod ba ko o wala sa ebanghelyo. Apan nasayod ko nga nagkinahanglan ko Kaniya. Nangita ko sa Ang Simbahan ni Jesukristo sa mga Santos sa Ulahing mga Adlaw diha sa phonebook. Sa pagsulod nako sa gambalay sa Simbahan ug nadungog ang “Buhi ang Manunubos Ko, Niini Nasayod Ako” (Mga Himno, nu. 80) nga gitugtog, mibati ko nga morag anaa sa panimalay. Akong naamgohan kon unsa ang kahulogan sa ebanghelyo ngari kanako ug kon unsa gayod ang akong gusto.
Himoa ang Ginoo nga Numero Uno sa Inyong Kinabuhi
Nianang puntoha, gusto nako nga ilambigit ang akong Langitnong Amahan sa tanan nakong gibuhat. Pananglitan, misugod ko sa pagpangutana Niya kon unsa ang Iyang hunahuna bahin sa akong mga plano sa panarbaho ug asa ko kinahanglang maanaa. Samtang nag-ampo ko ug nangutana niini nga mga pangutana, misugod ko sa pagbati nga kinahanglang anaa ko sa laing dapit.
Morag nasagmuyo ko. Nakatakda na ang tanan nakong mga pangandoy ug akong pagtutok diha sa akong plano. Nagtuo ko nga nahibalo ko sa hingpit kon asa ko moadto ug unsay akong buhaton. Apan karon, nahibalo ko nga gusto nako nga ang Ginoo mao ang numero uno sa akong kinabuhi, ug mas mahinungdanon kana nako kay sa bisan unsa pang butang. Bisan kon nahibalo ko nga ang akong dalan mahimong lahi kay sa akong gihunahuna, gibati nako ang Iyang gugma alang nako, ug misalig ko sa Iyang kaalam.
Naabot ko sa Brigham Young University–Idaho ug Brigham Young University sa Provo, Utah, aron humanon ang akong illustration degrees. Sa wala pa mogradwar, nag-intern ko sa lokal nga game studio. Mga usa ka tuig ang milabay, human ko nadawat isip full-time, ang studio wala damha nga gipalit sa Disney, nga nagdala og bag-ong mga oportunidad ug paglambo.
Kon inyong buhian ang unsay inyong gihunahuna nga kinahanglan ninyong maangkon, ang Ginoo mopanalangin ninyo sa tukmang panahon sa unsay makapalipay gayod kaninyo. Wala gayod kamo kahibalo kon asa kamo dad-on sa Ginoo. Buhii lang, ug paminaw.
Unaha ang mga Butang nga Kinahanglang Unahon
Atol sa pag-eskwela, kinahanglan nakong atimanon ang mga klase ug homework ug mga responsibilidad sa Simbahan. Kinahanglan nakong hunahunaon kon unsa ang akong mga prayoridad. Mobisita ba ko sa mga tawo aron mangalagad nila, o magtuon alang niini nga eksamin? Magbasa ba ko karon sa akong mga kasulatan, o humanon ba nako kini nga buluhaton?
Matag higayon nga unahon nako ang Ginoo ug himoon ang buhat nga Siya mitawag nako aron himoon, ang mga butang sa kanunay mahimo ra, ug ang uban pa. Siya sa kanunay motuman sa Iyang mga saad. Kon unahon nato ang Ginoo, ang tanan mosunod ra.
Sa dihang mieskwela ko sa graduate school, nag-atubang ko og susama nga mga pagpili. Ako ang presidente sa Young Women sa ward nianang higayona. Usa ka adlaw kinahanglan ko nga mopili tali sa pagtuon sa eksamin ug pagtabang sa young women sa pagplano og kalihokan. Miadto ko sa young women. Sa libre nakong oras, nag-ampo ko ug nagtuon kutob sa akong mahimo. Bisan pa man nakapasar ko sa eksamin, ug mas dako ang mga grado kay sa akong gidahoman.
Himoa nga Siya Mogiya Kaninyo
Ang Langitnong Amahan mogiya kaninyo. Siya nahigugma kaninyo ug nahibalo sa hingpit kon asa na kamo. Siya nakahibalo sa hingpit kon unsay labing makapanalangin kaninyo ug kon kanus-a.
Sa akong kinabuhi, ang mga butang nausab ug medyo nalahi og gamay. Apan anaa Siya niini sa tibuok panahon. Samtang nagsunod ko sa Iyang paggiya kanako, ang mga butang nahimong maanindot. Dili sama sa akong gidahoman, apan maanindot.
Siya gusto nga mahimong kabahin sa atong kinabuhi. Kon kita motugot lamang Kaniya sa atong kinabuhi, adunay maanindot nga mga surprisa nga naghulat sa matag usa kanato. Unsa pa man ang Iyang giandam alang kaninyo nga dili gani ninyo makita?