Usa ka Panahon sa Pagsayaw

Ni Stephanie E. Jensen ug Jessica Zoey Strong

Mga Magasin sa Simbahan

Kini nga kabatan-onan nakakaplag og kalipay pinaagi sa pagbuntog sa mga kahadlok ug pagpakigbahin sa ilang mga talento ngadto sa uban.

Mga litrato pinaagi ni Cristy Powell

Ang katorse anyos nga si Emo’onahe Y. ug si Jax C. adunay usa ka butang nga komon: sila parehong mipasundayag og mga kahanas sa pagsayaw atol sa variety show sa komperensiya sa AKK [FSY] sa Provo, Utah.

Ang pagsayaw nga mag-inusara sa atubangan sa liboan ka kabatan-onan dili sayon alang nilang duha. Apan samtang nagtinguha sila sa pagpalambo ug pagpaambit sa ilang mga talento, nakadawat sila og pagpadayag ug milambo sa mga paagi nga nakatabang nila nga “mahimong mas mahisama ni Jesukristo, ug mohimo sa [ilang kaugalingon], ubang tawo, ug gani ang kalibotan nga mas maayo” (Personal nga Kalamboan: Giya nga Basahon sa Kabatan-onan [2019], 1).

Pagsayaw Gamit ang Holahop uban ni Emo’onahe

Si Emo’onahe (eh-moh-oh-nah) nakadesisyon nga mopakigbahin sa iyang talento sa pagsayaw gamit ang holahop, nga kabahin sa ilang Native American nga kultura. “Usa sa akong mga higala nga miadto sa AKK [FSY] nga nag-una nako misulti nako nga sila aduna niining pagpasundayag sa talento ug kinahanglan ko nga mopasundayag,” siya miingon.

“Medyo ginerbiyos ko, busa naningkamot ko nga dili motan-aw sa mga tawo.” Apan morag lisod nga dili motan-aw! “Madungog nako ang tanan nga nagkaguliyang,” siya miingon. “Saba kaayo sila nga maglisod kog paminaw sa musika, busa naglisod kog tayming sa tugtog!”

Si Emo’onahe naningkamot og maayo aron mahimong maayo sa pagsayaw gamit ang holahop. Siya miingon, “Dugay kaayo ang akong pagkat-on.” Apan kon mas magsige siya og praktis, mas nakakat-on siya bahin sa iyang kaugalingon.

Talentado nga Pag-asoy og Istorya

Ang pagsayaw gamit ang holahop usa ka pamaagi sa personal nga pag-asoy og istorya. “Magsugod ka og usa ka holahop nga nagrepresentar sa imong sinugdanan, ug dayon mopadayon ka sa pagdugang og laing holahop aron sa pagpakita og dugang pa mahitungod sa imong kinabuhi. Sa akong pagpasundayag, makakita kamo og usa ka alibangbang, usa ka agila, usa ka cowboy,” si Emo’onahe miingon. “Kon moasoy ko sa akong istorya, mobati ko nga nag-asoy sa istorya gikan niadtong akong nakat-onan ug sa akong mga kasinatian.”

Si Emo’onahe gikan sa Cheyenne ug Arapahoe nga mga tribo sa Oklahoma, ug usab sa Fort Peck Sioux ug Assiniboine. Siya miingon, “Naanad na ko nga mobati nga lahi kaayo kay sa uban,” ug usahay “makapahimo kana kanako nga dili komportable.” Apan ang pagsayaw gamit ang holahop naghangop sa pagka-indibidwal. Matag tigsayaw nagmugna sa ilang kaugalingong koryograpiya, ug “mao kana ang nakapahimo niini nga talagsaon kaayo ug personal kanimo,” siya miingon.

Ang mga Talento Makapalig-on

Si Emo’onahe mibati nga mas duol sa Dios samtang siya mag-ampo, magbasa sa mga kasulatan, ug maningkamot sa pagsunod ni Jesukristo. Siya mibati usab nga mas duol sa Dios samtang maningkamot siya sa pagpalambo sa iyang mga talento. “Kon mokuha ko sa akong mga holahop ug mosayaw, malipay ko.” Mirekomendar siya: “Pangitaa ang mga butang nga ganahan ninyo ug pangitaa ang maayong mga tawo nga motabang ninyo aron magamit ninyo ang inyong mga talento sa pagpalig-on sa inyong kaugalingon ug sa uban. Ang pagserbisyo sa uban makatabang ninyo nga mapalig-on usab ang inyong pagpamatuod ni Jesukristo.”

Irish nga Pagsayaw uban ni Jax

Si Jax nakuyawan kaayo mahitungod sa pagpasundayag sa iyang talento, Irish nga pagsayaw, atol sa AKK [FSY] nga variety show. “Nahadlok gyod kaayo ko. Morag anaa ko sa lungag nga puno sa mga bitin ka hadlok,” siya miingon. “Nag-ampo ko og kadali sa wala pa ko moadto. Nahadlok gihapon ko, apan ang musika mitukar. Nagpakaaron-ingon ko nga walay tawo didto. Ug misugod lang ko sa pagsayaw.”

Si Jax milukso ug gilihok ang iyang mga paa sa tradisyonal nga Irish nga pamaagi. Apan kon tan-awon ang malipayon nga panagway ni Jax, kadaghanan sa mga tawo tingali dili makatag-an nga lisod kaayo ang panaw aron makaabot didto.

Pagpalambo sa Talento aron Matabangan sa Pagdumala sa Kaugtas

“Niadtong 2020 naugtas gyod ko ug gani naghunahuna nga maghikog,” si Jax miingon. “Anaa ko sa ospital alang sa kahimsog sa pangisip sulod sa usa ka bulan. Akong nahibaloan nga ako adunay pediatric brain inflammation ug nasayran nga ako autistic. Lisod gayod kaayo kadto.”

Sa dihang nakadawat si Jax og pipila ka tambal alang sa iyang kahimsog sa pangisip, ang iyang inahan miawhag niya sa pagpangita og pisikal nga kalingawan aron matabangan sa pagdumala sa iyang kaugtas. Nakadesisyon siya sa pagpangayo og personal nga pagpadayag kon unsay iyang mahimo.

“Nag-ampo ko mahitungod niini ug nangayo og tabang,” siya miingon. “Ug nakahinumdom ko nga ang akong iyaan nagtudlo og Irish nga sayaw. Busa misugod ko og eskwela sa wala pa ang among dakong pasundayag sa Pasko. Kinahanglan kong makat-on og lima ka sayaw sa duha ka semana, mao nga makalingaw kana,” si Jax nagkomedya. Wala madugay, ang Irish nga sayaw nahimong dakong panalangin sa iyang kinabuhi. “Nakatabang gayod kini sa akong lebel sa kaugtas ug dili maayo nga mga pagbati,” siya miingon.

Pagpakigbahin sa Iyang Talento

Atol sa AKK [FSY], ang grupo ni Jax nangutana niya kon aduna ba siyay talento nga mapakigbahin niya sa variety show. Mao nga misayaw siya sa daplin sa dalan alang nila. Sa dihang miingon sila niya nga kinahanglan siyang mopasundayag, ang unang gihunahuna ni Jax, “Oy, dili.” Apan nakadesisyon siya nga mopakigbahin sa iyang talento bisan kon nahadlok siya.

Karon nga si Jax nakakita sa mga bidyo sa iyang kaugalingon nga nagpasundayag atol sa AKK [FSY], dili niya mapugngan ang pagkatawa. “Wala gyod ko mopahiyom sa unang bahin,” siya miingon. “Apan ang mga tawo misugod sa pag-abiba, ug misugod ko sa pagpahiyom.”

Alang sa kabatan-onan nga nanglimbasog, si Jax mihatag niini nga tambag: “Mas maayo nga isulti kini ngadto sa usa ka tawo kay sa tagoan kini sama sa akong gihimo. Ang Ginoo nakaila kon kinsa kamo, ug Siya anaa alang kaninyo. Ang Ginoo gusto nga motabang kaninyo.”

Sa kinatibuk-an, si Jax mibati nga ang pagkat-on og Irish nga sayaw usa ka panalangin gikan sa Langitnong Amahan.

Talagsaon Kamo

Wala gayod kamo masayod—kon kamo modangop ngadto sa Ginoo, tingali madasig usab kamo sa pagpalambo og bag-ong talento.

Sama nila ni Emo’onahe ug Jax, ang Espiritu Santo motabang ninyo sa pag-ila sa mga talento. Kon kamo mopalambo niini nga mga talento ug mopakigbahin niini, kamo makakaplag og tabang samtang maningkamot kamo nga mahimong mas mahisama sa Manluluwas.

Unsa ang mga talento nga inyong mapalambo ug mapakigbahin?

“Ayaw tugoti nga ang kahadlok sa kapakyasan makawala sa inyong gana. Ayaw tugoti nga ang tingog sa mga mananaway moparalisa ninyo—kana nga tingog nagagikan man sa gawas o sa sulod. … Kon kamo mas motuo ug mosalig diha sa Espiritu, mas modako ang inyong kapasidad sa paglalang. … Sa inyong pagbuhat sa normal nga mga kahigayonan sa adlaw-adlaw ninyong kinabuhi ug sa paglalang og butang sa katahom ug mapuslanon, inyong mapauswag dili lamang ang kalibotan sa inyong palibot apan usab ang inyong kalibotan.”

Presidente Dieter F. Uchtdorf, kanhi Ikaduhang Magtatambag sa Unang Kapangulohan, “Ang Kalipay, Inyong Kabilin,” Okt. 2008 nga kinatibuk-ang komperensiya (Liahona, Nob. 2008, 119).

Kon kamo o usa sa inyong minahal nanglimbasog sa mga panghunahuna nga maghikog o grabe nga mga pagbati sa kabalaka o depresyon, pangayo dayon og tabang gikan sa usa ka kasaligan nga hamtong.