“Unsaon Ninyo sa Pagpangandam alang sa Kinatibuk-ang Komperensiya,” Alang sa Kalig-on sa mga Kabatan-onan, Sept. 2023.
Pagpangandam alang sa Kinatibuk-ang Komperensiya
Unsaon Ninyo sa Pagpangandam alang sa Kinatibuk-ang Komperensiya
Kini nga kabatan-onan daghan kaayo og nakat-onan gikan sa kinatibuk-ang komperensiya. Unsaon ninyo sa pagpangandam aron makabaton og makahuloganon nga kasinatian?
Gusto Ko nga Mosunod sa Propeta
Nag-andam ko sa akong kaugalingon alang sa Oktubre 2022 nga kinatibuk-ang komperensiya pinaagi sa pagbasa mahitungod sa Pag-ula ni Jesukristo diha sa Basahon ni Mormon ug sa Daang Tugon.
Atol sa komperensiya, si Presidente Russell M. Nelson namulong kanato ug nagpamatuod mahitungod sa kaimportante sa templo.1 Didto sa templo, ang mahangtoron nga mga panalangin gisaad, ug ang maanindot nga espiritu mabati kon kamo moadto didto.
Wala pay templo sa Nicaragua, apan adunay usa nga gipahibalo. Manghinaot ko nga makapaminaw ko sa mga pulong ni Presidente Nelson ug makaadto sa templo kon mahuman na kini.
Samtang nagtan-aw ko sa komperensiya, gibati nako ang Espiritu nga nagpamatuod nga anaa ko sa saktong dapit. Gibati nako nga ang akong kasingkasing daw napuno sa gugma sa Dios.
Carlos M., Nicaragua
Ang Pagkaayo Anaa alang sa Tanan
Sa wala pa ang kinatibuk-ang komperensiya sa Oktubre 2022, namalandong ko sa mga butang nga nahitabo sa akong kinabuhi bag-ohay lang. Daghang butang ang misamok sa akong hunahuna sa wala pa ang komperensiya, ug nanginahanglan ko nga mobati og kahupayan, kalinaw, ug kalig-on.
Atol sa komperensiya, si Elder Quentin L. Cook sa Napulog Duha ka Apostoles miingon, “Tungod sa Pag-ula sa Manluluwas, ang pagkaayo anaa alang sa tanan.”2
Kadto nga mga pulong naghatag nako og kalinaw ug paglaom. Pinaagi sa Pag-ula ni Jesukristo, kon makahimo ko og mga sayop ug dili sakto nga mga pagpili, ako mapasaylo ug mobati og kalinaw. Ug bisan unsa pa man ang kasakit nga tingali akong bation, ako mamaayo. Kitang tanan mobati nianang sama nga kalinaw ug pagkaayo kon kita maghinulsol sa atong mga sala ug maningkamot nga mahimong mas maayo matag adlaw.
Kaye D., Philippines
Ang Inyong Pagpangandam sa Komperensiya
Paggahin og pipila lang ka minuto sa pagpangandam alang sa komperensiya, ug makabaton kamo og mas nindot pa nga mga kasinatian. Busa, unsaon ninyo sa pagpangandam? Sugdi pinaagi sa pagsulat sa inyong mga pangutana! Pamalandongi ang inyong mga pangutana samtang magtan-aw kamo, ug masurprisa mo kon kapila ang mga mamumulong nga daw direktang nakig-istorya kaninyo.