“Mopili nga Moserbisyo” Alang sa Kalig-on sa mga Kabatan-onan, Sept. 2023.
Ako Makahimo sa Tanan nga Butang pinaagi kang Kristo
Ang kabatan-onan nagpakigbahin kon sa unsang paagi si Kristo milig-on kanila sa pagbuhat sa lisod nga mga butang (tan-awa sa Mga Taga-Filipos 4:13).
Mopili nga Moserbisyo
Sa kanunay gusto gyod ko nga magmisyon, apan sa pag-edad nako og 18, ang pandemya nagsugod. Mibati ko nga dili andam sa pagserbisyo, mao nga mieskwela ko sa kolehiyo, ug nakadawat og nindot nga eskalarsyip [scholarship]. Daghang tawo ang miingon nga dili na lang ko magmisyon. Mibati ko nga morag nawala ang akong tinguha sa pagserbisyo.
Apan sa kinatibuk-ang komperensiya si Presidente M. Russell Ballard miingon, “Kon kamo anaa pa sa edad alang sa misyonaryo nga pagserbisyo apan wala pa makaserbisyo tungod sa pandemya o uban pang mga rason, ako modapit ninyo sa pagserbisyo karon.”1 Sa dihang gisulti niya ang pulong nga “karon,” gibati nako nga morag nakig-istorya siya nako—nga ako kinahanglang magmisyon karon. Sukad nianang adlawa nag-ampo ko mahitungod niini ug nakadawat og pamatuod nga panahon na nga moserbisyo ko sa Ginoo.
Nakadawat ko og daghang pagpanaway mahitungod sa akong desisyon. Ang akong eskalarsyip nakanselar pa gani. Apan ang akong tinguha sa pagmisyon lig-on kaayo nga walay usa niadtong mga butanga ang importante. Gitawag ko nga moserbisyo sa Guatemala Quetzaltenango Mission. Espesyal kaayo kini tungod kay ang akong mga ginikanan naselyo alang sa kahangtoran didto sa Guatemala.
Kon naghunahuna kamo kon magmisyon ba kamo, dili pa ulahi kaayo! Mosalig kanunay sa Langitnong Amahan ug ni Jesukristo. Sila mogiya kanato ug mopanalangin kanato sa mga butang nga dili nato mahunahuna.
Enoc M., Dominican Republic