“Nganong kinahanglan man kita nga mopahigayon og mga bunyag alang sa patay na nga mga katigulangan?,” Alang sa Kalig-on sa mga Kabatan-onan, Sept. 2023.
Direkta sa Punto
Nganong kinahanglan man kita nga mopahigayon og mga bunyag alang sa patay na nga mga katigulangan?
Si Jesukristo nagtudlo nga ang tanang tawo kinahanglang mabunyagan aron makasulod sa gingharian sa Dios human niini nga kinabuhi (tan-awa sa Juan 3:5). Apan daghang tawo ang wala makabaton niana nga oportunidad.
Ang Dios mipadayag nga kadtong namatay na nga wala mabunyagi mahimong masangyawan sa ebanghelyo ni Jesukristo didto sa kalibotan sa mga espiritu (tan-awa sa 1 Pedro 3:18–19; Doktrina ug mga Pakigsaad 138:30–33). Siya mipadayag usab nga ang mga buhi mao ang bunyagan alang niini nga mga tawo (tan-awa sa 1 Mga Taga-Corinto 15:29; Doktrina ug mga Pakigsaad 124; 128). Kini nga mga pagbunyag kinahanglang pagahimoon dinhi sa yuta.
Mahimo kitang mangita sa mga rekord sa namatay nga mga katigulangan ug mopahigayon og mga pagbunyag alang nila diha sa mga templo. Naghatag kini kanila og oportunidad sa pagdawat sa bunyag, nga kinahanglanon alang sa celestial nga gingharian.
Si Elder D. Todd Christofferson miingon: “Ang atong mga paningkamot alang sa atong mga patay mobunga og tataw nga saksi nga si Jesukristo mao ang balaang Manunubos sa tanang katawhan. Ang Iyang grasya ug mga saad moabot bisan niadtong kinsa samtang buhi pa wala makakaplag Kaniya” Elder D. Todd Christofferson, (“Nganong Kita Magbunyag alang sa mga Patay?” [Liahona, Mar. 2009, 35]).