“Gikan sa mga Epistola ngadto sa Buhi nga mga Sibya,” Alang sa Kalig-on sa mga Kabatan-onan, Ago. 2023.

Pagpangandam alang sa Kinatibuk-ang Komperensiya

Gikan sa mga Epistola ngadto sa Buhi nga mga Sibya

Ni David A. Edwards

Mga Magasin sa Simbahan

Ang komunikasyon gikan sa mga lider sa Simbahan layo na kaayo og naabtan, apan ang mga katuyoan mao ra gihapon.

Dul-an sa 2,000 ka Tuig ang Milabay

Samtang Siya ania dinhi sa yuta, si Jesukristo miorganisar sa Iyang Simbahan. Human nga nabanhaw ang Manluluwas ug mikayab ngadto sa langit, ang Iyang mga Apostoles ang nangulo sa Simbahan uban sa katungod, pagpadayag, ug inspirasyon nga Iyang gihatag kanila.

Niadtong mga panahona, ang mga lider sa Simbahan kasagaran makigsulti sa mga miyembro sa Simbahan sa lainlaing lugar pinaagi sa mga epistola (mga sulat).

Ang Bag-ong Tugon naglangkob sa mga epistola nga gisulat ni Pablo, Pedro, Juan, Santiago, ug Judas. Kini nga mga sulat gisulat pinaagi sa kamot, gipadala pinaagi sa kamot, gikopya pinaagi sa kamot, ug gibasa og kusog.

Kini nga mga lider sa Simbahan kasagaran adunay sama nga mga katuyoan sa pagsulat niini nga mga sulat. Sila nagtinguha sa:

Pagpamatuod ug pagtudlo sa ebanghelyo ni Jesukristo.
Pag-awhag, pagdasig, ug pagbayaw.
Pagpahinumdom sa mga sugo ug mga pakigsaad.
Pagtubag sa kasamtangan nga mga hagit.
Pagpasidaan bahin sa mga kakuyaw.
Pagkorihir sa mga sayop nga mahimong nakasulod sa Simbahan.
Paghiusa sa Simbahan.

Karong Adlawa

Mopadayon sa unahan dul-an sa 2,000 ka tuig ug makita ninyo nga daghang butang ang nausab, apan ang pipila ka butang mao ra gihapon.

Si Jesukristo mipahiuli sa Iyang Simbahan nganhi sa yuta, ug adunay mga propeta ug mga apostoles pag-usab aron mangulo niini. Apan sukad sa panahon sa mga epistola, ang teknolohiya sa komunikasyon nagkalambo—gikan sa pag-imprinta ngadto sa radyo ngadto sa telebisyon ngadto sa internet.

Ang mga lider sa Simbahan makahatag na karon og mga mensahe atol sa kinatibuk-ang komperensiya alang sa tibuok Simbahan sa usa ka higayon. Gani mahimo kining ipaabot gamit ang satellite ug buhi nga pagsibya sa online sa lainlaing pinulongan sa usa ka higayon. Sulod sa pipila ka adlaw, ang mga pulong maanaa na sa online sa lainlaing pinulongan, ug ang giimprinta nga bersiyon ipadala sa tibuok kalibotan.

Samtang mangandam kamo sa umaabot nga kinatibuk-ang komperensiya, tingali maghunahuna kamo mahitungod niadtong mga epistola sa Bag-ong Tugon. Lahi kadto nga mga panahon, ug ang mga teknolohiya lahi kaayo. Apan ang mga mensahe sa komperensiya nagtuman sa samang mahinungdanon nga mga katuyoan. Samtang nagsinati kamo sa mga mensahe sa komperensiya, mahimong maghunahuna kamo kon giunsa nila:

Pagpamatuod ug pagtudlo sa ebanghelyo ni Jesukristo.
Pag-awhag, pagdasig, ug pagbayaw.
Pagpahinumdom sa mga sugo ug mga pakigsaad.
Pagtubag sa kasamtangan nga mga hagit.
Pagpasidaan bahin sa mga kakuyaw.
Pagkorihir sa mga sayop nga mahimong nakasulod sa Simbahan.
Paghiusa sa Simbahan.