“Mga Propeta nga Nagsunod sa mga Propeta,” Alang sa Kalig-on sa mga Kabatan-onan, Sept. 2023.
Pagpangandam alang sa Kinatibuk-ang Komperensiya
Mga Propeta nga Nagsunod sa mga Propeta
Bisan kinsa makakaplag og mga panalangin pinaagi sa pagsunod sa mga propeta—bisan ang Apostoles.
Kita padayong gihangyo sa pagsunod sa propeta. Apan ang uban tingali maghunahuna kon nganong importante kaayo nga sundon ang tingog sa propeta.
Niadtong Abril 2017 nga kinatibuk-ang komperensiya, si Presidente Thomas S. Monson, ang propeta nianang higayona, mihangyo sa mga miyembro sa Simbahan nga magtuon, dili lang mobasa, sa Basahon ni Mormon matag adlaw. Si Presidente Russell M. Nelson ug si Presidente Henry B. Eyring parehong misunod sa tambag sa propeta ug namulong mahitungod sa unsay nahitabo.
Usa ka Masulundon nga Apostol
Si Presidente Nelson miingon: “Naningkamot ko sa pagsunod sa tambag ni [Presidente Monson]. Lakip sa ubang butang, naglista ko kon unsa ang Basahon ni Mormon, unsa ang gipamatud-an, unsa ang gisupak, unsa ang gituman, unsa ang gipatin-aw, ug unsa ang gipadayag niini. Ang pagsusi sa Basahon ni Mormon sa ingon niana nga paagi makapahinuktok ug makapadasig nga buhat!”1
Si Presidente Nelson mipadayon sa pagpasabot nga siya nangutana sa uban sa samang mga pangutana ug nahibaloan nga daghan kaayong kinabuhi ang natandog pinaagi sa pagsunod sa tambag ni Presidente Monson. Ang Ginoo mogiya natong tanan pinaagi sa atong propeta, sa mga kasulatan, ug personal nga pagpadayag.
Usa ka Matinud-anon nga Apostol
Si Presidente Eyring miingon: “Akong gibasa ang Basahon ni Mormon matag adlaw sulod sa sobra sa 50 ka tuig. Mao nga resonable tingali nga maghunahuna ko nga ang mga pulong ni Presidente Monson alang sa laing tawo. Apan, sama sa daghan kaninyo, akong nabati ang pagdasig sa propeta ug ang iyang saad nagdapit kanako sa paghimo og mas dakong paningkamot.”
Si Presidente Eyring mipadayon: “Ang pagsunod sa tambag ni Presidente Monson adunay duha ka talagsaong mga epekto ngari kanako: Una, ang Espiritu nga iyang gisaad nakamugna og positibong pagbati kabahin sa umaabot, bisan kon ang kagubot sa kalibotan daw misamot. Ug, ikaduha, ang Ginoo mihatag kanako—ug kaninyo—og mas dakong pagbati sa Iyang gugma alang niadtong nag-antos.”2
Tanan
Ang tanan makahimo ug kinahanglan nga mosunod sa tambag sa propeta gikan sa kinatibuk-ang komperensiya. Bisan asa pa kamo sa inyong espirituhanong panaw, kamo sa kanunay mahimong molambo, usa man kamo ka Apostol, bag-ong kinabig, o bisan unsa pa. Dili kini makapaminos sa atong panginahanglan og personal nga pagpadayag; laing paagi kini nga ang Dios makapanalangin kanato. Gani kon ang Apostoles makakaplag og dugang nga mga panalangin niini nga paagi, kitang tanan makahimo gayod usab.