“Tangiraki iroun te Atua,” Ibukin Kakorakoraia Kairake, Tebetembwa 2023.
Nakomai, Iriirai
Tangiraki iroun te Atua
N ana babaire ni kakukurei te Atua, iai kaantaningaia ataeinnaine ao ataeinimwaane ae itiaki mai ieta, kam tangiraki ao ni kainnanoaki n tatabemanii ngkami .
Iangoia bwa aekakira tangin te katangitang ngkana bwaai ni katangitang n aekaia nako ti te arona tangiia. Tera ngkana kii ake iaon te biano a katanga te nooti ae ti te arona ke ngkana bwanaa ni kabane n te kuaea ti te aekakina? Te kantangitang aei e na rang kabotu!
N ae kakukurei, bwaai ni katangitang ao bwanaa n te kuaea a kaokoro tangiia ao tein te bwanaa. Taian kii iaon te biano e anga aekan ee ni bwanaa, ao taian kuaea a anga tangiia ae tangiraoi. Te buu mai Buranti, tubati, waioriin, ao taian turam nako a karakaa riki tangina ae e kaokoro nakon tangiraoin bwaai ni katangitang.
Korakora ao Bwaintangira
N aron katangitang, Tamara are i Karawa e kimwareirei n tarena aika mwaiti, anua aika kakaokoro, ao taneiai irouiia Natina, n tatabemaniia te aine ao temwaane natina ae tangiriia. Bwa tera aroaro ae ko mena inanona, aaba raa ae ko maeka iai, reeti n aomata, ao botannaomata, Tamara are i Karawa e taraa am konabwai ae akea tiana, are ko kona n riki iai inanon te ongeaba, te akoi, ao te tangira.
Ana tangira ae korakora, E kaoko bwa ko na kunea kinakim mai ieta ao ni kakoroa nanon te kantaninga ibukim mai ieta. E kaungako bwa kona karikirakea am bwaintangira n te maiu n tamnei, anua n atua, ao n aanga aika mwaiti. Ao E anganiko am tai ni katoa bong n nooria ao n reiakinna ao ni ibuobuoki nakoia kaain rarikim n aron Iesu Kristo.
N ana babaire te Atua ae itiaki, ti roko n te aonaaba rinanon te tina ao te tama. Utu a bon kainanoiia ni kauoman. Ni kauoman, n aroia rao ni koaua, kaaro a boutoka ao katauraoi ibukiia aia utu. Inanon mweengara, kaaro ma kaainaba bon ngaiia taan kairi ma te aamarau, nanorinano, ao te tangira ae aki kewekewe—te iraorao irouia mwaane ao aine ni kabane inanon te etieti ae tamaroa. E tang karawa ngkana, aekan iraorao inanoia, iai te iowaawa, te kan tautaeka, ke taumatoa n aekaia nako, irouia mwaane ao aine. Kairoroaki, te rawawata ae maan, akoako, ao te atatai ae itiaki bon aron tamaroan Kristo are ti na ukoria n tatabemaniira.
Eng e koaua, akea ae kororaoi—ke utu nako ae kororaoi. Bwa tera aroaro ae ko mena inanona, karineiia am karo ao tangiriia am utu—am utu are ko karekea ao te utu are ko na karekea n te taina. Te Tia Kamaiu e kona ni kamataatako, kabwarabure, ao ni kaungaiia koraki ake irarikim. Ngkana ko karaoa ae tamaroa, te Uea e na buokiiko ao ni kairiko. Taiaoka uringnga bwa am mwakuri imatan te Uea ao inanon Ana Ekaretia bon kamatoakin anuam ao raoiroim ni kawakinan am berita ae tabu ma te Atua.
Te Nakoanibonga ao Ana Babaire te Atua
Te Atua e tangiriira riki ao e kinaira riki nakon are ti bon tangiriira ke ni kinaira i bon iroura. Ana kariaia n te nakoanibonga e bon anga ni kakabwaiakiia Natina ni kabane. Mwaane ake a tau n taua te nakoanibonga, ma ngaiia bon tiaki nakoanibonga. Beretitenti Russell M. Neson e reirei bwa te nakoanibonga “e bon rang kaineti naba nakoia [aine] n aroia naba mwaane.” Te nakoanibonga e anganiia aine ao mwaane “ni karekei … kaubwain te tamnei ni kabane are e a kaman katauraoia te Uea ibukiia Natina.”1
Te Ikotaki n Ibuobuoki
N ana Ekaretia te Uea, ti reirei inanon kauntira ngkai ti ibuobuoki n ikotaki. Inanon ara kauntira, taan kairiiri a ukora te atatai ao iango mairouia ni kabane, n reitaki ma kairake n ataeinnaine ao kairake n ataeinimwaane. Inanon waaki n tatabeua nako, ti karokoaki raoi inanon babaire aika tamaroa ao ni karekea te tokanikai ae mwaiti riki n ana beku te Uea ngkai ti kabonganaia aia tibwatibwa ao n ikotaki ni mwakuri, taari ao titita inanon Ana mwakuri.
Inanon ara uoote ao mwaanga, kairake n ataeinnaine ao kairake ataeinimwaane a kairii taian kiraati ao kooram. Inanon kauntira ibukiia kairake n te uoote, ara taan kairiiri aika kairake a ikotaki ni buokiia kairake n tatabemaniia n toma ma karawa, ara taan kairiiri n te Ekaretia, ao tabeman roronrikirake. Ngkai mwakuri ni ibuobuoki a katoatoa ma ake a ikawai, ara kairake n ataeinimwaane ao kairake n ataeinnaine a kawariia ao ni kakabwaiaiia aika mwaiti. Inanon ara mwakuri ni ibuobuoki, ti bane n tei ni katiteuanaaki.
Bon te kakabwaia nakoia kairake n ataeinimwaane ao kairake n ataeinnaine ngkai a beku bwa taan kakoaua n taian otenanti n te euangkerio ae kaokaki. Ngkoe bon te tia kakoaua ibukin te bwabetito, ibukin te bwabetito ibukiia ake a maiu ao te bwabetito ibukiia ara bwakatibu inanon te tembora. Ko beku naba n taabo tabeua inanon ana auti te Uea.
Kakabwaia iaon Berita aika tabu ma te Atua
N tatabemaniia nako, kairake n ataeinnaine ao kairake n ataeinimwaane a karaoi berita aika tabu ma te Atua. Ngkana a karineaki ma te kakaonimaki, ara berita aika tabu ma te Atua e uotii Ana kakabwaia—ae korakora riki nakon are ti na kona n iangoia. Ara berita aika tabu ma te Atua e kona ni katabui nanora ao ara mwakuri. Ara berita aika a tabu ao ana Mwakuri ni Kamaiu Kristo a kona ni buokiira n riki bwa natin te Atua—nanorinano, taotaonakinano, n orake n te tangira (taraa Motiaea 3:19). Ni bwaai ni kabane ake ti karaoi, ti moanna mairoun Iesu Kristo. Boni Ngaia moa ae ti rineia ibuakon ara rinerine aika mwaiti, ao ti karimoa inanon ara rinerine nako ake ti karaoi.
Taraa te Tia Kamaiu
Ko kona n namakina te kukurei, n namakina te abuee inanom ngkai ko karimoa Iesu Kristo bwa boton am kamatebwai ibukin te euangkerio, mwakuri ni ibuobuoki, waaki ni kakukurei, ao rikirakem i bon iroum ngkai ko rinea te tamaroa. Am kekeiaki ae boboto iaon Kristo e kona ni kakukurei ao iai mwiina ngkai ko buokiia tabeman ma te nanoanga ao te tangira ae koaua ae nako mai inanom.
Bwaai aika uaana a riki ngkana kairake n ataeinimwaane ao kairake n ataeinnaine a tangira te Uea ao ni beku ni katiteuanaaki ao n rau. Aio e bon eti n te tieminari, aia waaki ni kakukurei roronrikirake, ao FSY.
Ma te tangira ae itiaki, Tamara are i Karawa e kaoiia ni kabane kairake n ataeinnaine ao kairake n ataeinimwaane “bwa a na nakoina, ni katoonga ana raoiroi, ao akea ae e totokoia ngkana a nakoina.”(2 Nibwaai 26:33).
Tamara are i Karawa ao Iesu Kristo a tangiriko. A na buokiko ao ni kakabwaiako bwa kona bon kukurei raoi. Taiaoka karimoa n rinea ara Tia Kamaiu Iesu Kristo. Kakoaua te Atua ao katiteuanako iroun Iesu Kristo ma koraki ake irarikimi. Ngkai te nati ae tangiraki iroun te Atua, ko kona n toma ao n riki bwa kaain aia komunite Aika Itiaki are bon Ana Ekaretia ae kaokaki—Ana Ekaretia Iesu Kristo ibukiia Aika Itiaki ni Boong aika Kaitira. E aki kakawaki bwa antai ngkoe ao tera arom ko kainnanoaki n te aonaaba n te bong aei. Tera te bitaki are ko kona ni karaoia n am utu, n Ana Ekaretia ae kaokaki, ao n te aonaaba.
Iroun Iesu Kristo, bwaai ni kabane aika a tamaroa a kona ni karaoaki. Iroun Iesu Kristo, bwaai aika a koaua ni kabane ana roko, n ana tai ao ana kawai te Atua. Ngkai temanna Ana tia kakoaua ae onoti, I kakoaua ao ni berita.