“Teniua Reirei mairoun Iotebwa Timiti Ni Kairakena,” Ibukin Kakorakoraia Kairake, Tebetembwa 2023.
Teniua Reirei mairoun Iotebwa Timiti Ni Kairakena
Taraia bwa tera ae ko kona n reiakinna man ana taneiai te Burabeti 200 te ririki n nako.
Ko a tia n namakina taraan ae kanga e kangaanga te reitaki nakoia aomata ake ngkoa? A maeka n taai aika a bwakanako—a kona n rereiniko te bwai teuana iaon maium? Eng! Iotebwa Timiti bon te katooto ae korakora. Man te tai are e koro 18 ana ririki, e a tia n reiakin tabeua bwaai iaon karekean kaekaan taian tataro ao reitakina ma Tamana are i Karawa. Reirei akanne a kona ni buokiko n te bonga aei.
Reirei #1: N tabetai e anaa te tai ae maan karekean kaeka.
Kaeka nakon tataro n taainako aki roko ni waekoa. Te tataninga e bon aki bebete—riki ngkana angiin titiraki.a waekoa n roko kaekaaia iaon te intanete.
Ngkana ko namakina abwakin am tai ibukin te Atua ni kaekako, ko aki tiku n tii ngkoe. Bon 12 ana ririki Iotebwa Timiti ngke e moan waakina ana iangoa ibukin, “kakawakin tabeaiangana ni marurungin [oin] tamneina ae aki mamate.”1 E inimaki ma taian titiraki ni kaeti ma aron kororaoina ao buakakan te aonaaba ibukin uoua riki te ririki. E anaa te maan ae uoua te ririki iangoana, kamatebwaian koroboki aika tabu, ao ni kamwakurii rinanon titiraki akanne imwain kaotin te Atua ao Iesu Kristo nakoina n te Buakonikai ae Tabu.
Bon ti te arona ma ngaira. Ngkana ti karekei titiraki, e na riai n anaa tabeua te bong, namwakaina, ke e bon ririki imwain ae ti karekea te kaeka. Ma anne e NAKORAOI. Te kekeiaki are ti karaoia ngkai ti tataninga e bon riai. Uringa ana reirei Unimwaane Jeffrey R. Holland man te Kooram n Abotoro n te Tengaun ma Uoman: “Te koraa e na ribanaaki ao ti riai n tataninga ikawaina.”2
Reirei #2: Te Atua e kinaira man arara.
Imwain ngke 18 ana ririki Iotebwa e kawaraki iroun te Atua te Tama, Iesu Kristo, ao te anera ae Moronaai. E kakukurei anne! Ao aomata mai i karawa aikai a kinaa Iotebwa n arana. A kinaa ae bon ngaia!
Te Atua e kinako naba. Ngkoe Natina ao e ataa aram. Te Atua e reirei te koaua aei iaon Ana karikibwai:: “Bwaai ni kabane a kona ni warekaki irou, bwa bon au bwai ao I atai” (Mote 1:35).
Aio naba bukina are e karekea te mwengaraoi Iotebwa ni karaoa te bwai are e tuangaki are e bon mataata iai bwa bon ngaia natin te Atua, are e kinaaki raoi.
Reirei #3: Ngkana ti rarairi nanora, ti kauka nanora nakon taneiai n te tamnei.
Teuana kaungaan nanon Iotebwa n nakon te Buakonikai ae Tabu bon rairan nanona man ana bure. Anne naba bukina ngke e tataro n te tairiki are e kaoti nakoina te anera ae Moroni: “ibukin kabwarakin [ana] bure ni kabane ma nanobabana” (Iotebwa Timiti—Rongorongo 1:29). Aio are e reireiniira uoua bwaai:
Te moan, ngkana ti karaoa te kairua, ti riai n aki iangoia bwa ti aki tau n tataro. E a tia Iotebwa ni karaoa te “bure ao te nanobaba,” ma e bon ataia e kona n tataro ao ni karekea te kabwarabure.
Te kauoua, ngkai ti bon rairi nanora, ti kona n namakina korakoran te Tamnei riki. Ngke e kabwarabwara Unimwaane Jorg Klebingat man te Itingaun, “Te kakoaua n Tamnei e rikirake ngkana ko anga nanom ao kimwareireim n raira nanom man te bure.”3
Beretitenti Russell M. Nelson e reirei bwa te rairannano e buokiira n riki n ai aron te Tia Kamaiu. Ngkana ti rairananora, ti kauki mataroan karawa. “Ti rineia bwa tina rikirake ni maiura n tamnei ao ni karekea te kimwareirei—te kimwareirei ibukin te kamaiuaki Irouna.”4
Ngaia are ngkana ko kainnanoia n rairananom man te bwai teuana, karaoia! E aki tii uota te rau ni buokiko n riki n aron te Tia Kamaiu, ma e na buokiko naba n namakina te Tamnei n te aro ae korakora riki ao ni karekei kaekaan taian tataro.
E a tia ni maiu Iotebwa Timiti n taai ake ngkoa, ma te reirei are reiakinna ngke tebwi tabun ana ririki e teimatoa naba ni buokiko n te bong aei. Bon anne naba bukin ara kakaitau ibukin te Burabeti Iotebwa Timiti.