“I kona n Tiku inanon te Rain,” Ibukin Kakorakoraia Kairake, Tebetembwa 2023.
I Kona ni Karaoi Bwaai ni Kabane rinanon Kristo
Te roronrikirake ngke a taekina aron Kristo ni kakorakoraia ni karaoan bwaai aika a kangaanga (taraa I-Biribi 4:13).
I kona n Tiku inanon te Rain
Ngke I moana bibiriu n te tabo ni biri, bon ai kaman miiu bwa N na urua te rekooti n te reirei n te biri n te maire. Imwiina n raabanen te tai I biri n te maire inanon nimaua te miniti tati, n urua te rekooti n raka iaon teniua te tekan.
Te bong are imwina, ngke, ti a kunea bwa maanin biriu e aki warekaki. A kabwarabwaraa taan tararuaa te biri bwa I biri teniua te mwaneka ni bunginako man kawain te tabo ni biri, are I aki kabwaataki man te kabobiri. Au tia kairiiri n te takakaro e kauntaeka bwa I a otinako man te rain ibukina bwa temanna te tia biri e notuainako. E taku te tia tararua, “Tao ana tiaki ana kaairua anne ngke e notuakinako, ma ana kaairua bwa e rang kaania te rain.” I taonnako ma te namakin ae kanga te bwai are N na kakoroa bukina e a nako buaka man anaaki mairou.
N te Tabati are imwina n aia kiraati Ataeinnaine, ti mataku n te witeo are e kabotauaki te tiku iaon te rain n te takakaro ni kawakinan taian tua.1 Rinanon tain te reirei, I tekateka ikekei, I un n te kauring are I a tia ni kabwaka iai.
Te bong are imwina ngke I biri ni katobibia kawain te tabo ni biri, I taraa naano ao n ataia I bon biri iaon nanon te rain. Ao ni katoaa te tai, N na bon toua nanona, n aron are e taku te tia tararua. I waekoa ni katoka biriu, ni karaua nanou. I a tia ni mwengaraoi ma te tabo are I biribiri iai are I aki noori kangaanga inanona.
Tekeraoiu, I a manga anganaki au tai tabeua te wiiki imwina. I kararoaai mai nuukan te rain ao ni urua ana rekooti te reirei, n te tai aei ngkai I a tiku iaon te tia.
Te taneiai anne e anganai te iango bwa kaanra ngai ma te rain ni biribiriu ma tabeua tuua. Ma ibukin Iesu Kristo ao Ana Mwakuri ni Kamaiu, I anganaki au tai riki teuana ngkai I raira nanou.
Ngkana e roko bwa taekan tuua, ti riai ni kararoaira man te rain ao ni karaoa ae tamaroa n tiku iaon te tia. Ma I rang kakaitau bwa ngkana ti karaoi kaairua, te Tia Kamaiu e kariaia bwa ti na rairinanora ao ni kataia riki.
Raygan P., Utah, USA