“Man te Kororeta nakon te Kanako Bwana ae Maeu,” Ibukin Kakorakoraia Kairake, Aokati 2023.

Katauraoi ibukin te Maungatabu ni Kabuta

Man te Kororeta nakon te Kanako Bwana ae Maeu

Iroun David A. Edwards

Ana Maekatin te Ekaretia

Te reitaki mairouia taan kairiiri n te Ekaretia e roko man kawaina ae raroa, ma te kantaninga iai a tiku n ti tearona.

Tamnei

Bauro e korei reeta

E kaniia 2,000 te Ririki n Nako

Ngke E mena iaon te aba, Iesu Kristo e baronga Ana Ekaretia. Imwin maunga utin te Tia Kamaiu ao n rierake nako karawa, Ana Abotoro a kaira te Ekaretia ma te kariaiaki, kaotioti, ao kairakiia are E anganiia.

Ni boong akekei, taan kairiiri n Ekaretia aki toki n reitaki ma kaain te Ekaretia n taabo aika a mwaiti n rinanon korean (reeta).

Kanoan te Nu Tetemanti a koreaki reeta mairouia Bauro, Betero, Ioane, Iakobo, ao Iuta. Reeta aikai a bon koreaki man te bai, uotaki man te bai, katotongaki man te bai, ao e warekaki n takaruaeaki.

Taan kairiiri n te Ekaretia aikai iai te kantaninga ae titearona ni korean reeta aikai. A ukoria nakon:

Kaotan koaua ao reireia ana Euangkerio Iesu Kristo.
Kaungaia, kairakia mai ieta, ao tabekaki rake.
Kauringaan taian tua ao berita aika tabu.
Te Marooro Iaon kakaewenako aika ngkai.
Kauring iaon kangaanga.
Kaetii kaairua nako ake a na rinrake n te Ekaretia.
Katiteuanaaki n te Ekaretia.

Tamnei

Russell M. Nelson

Te Bong aei

E kaniia 2,000 te ririki biri-mwaakana are ao ko kona n nooria bwa a mwaiti bwaai aika tia ni bitaki, ma tabeua bwaai a bon tiku n aroia.

Iesu Kristo e kaoka Ana Ekaretia nako aon te aba, ao manga iai naba burabeti ao abotoro ake a na kairia. Man boong ake a koreaki iai reeta, bwaai n rabakau n reitaki a roko—man te tabo ni boreeti nakon te rerio nakon te terewition nakon te intanete.

Taan kairiiri n te Ekaretia a kona ngkai n anga te rongorongo n te maungatabu ni kabuta ibukin te Ekaretia ae bwanin n te tai ae waekoa. Riki e kanakoaki iaon tiataraite ao ni maeu iaon kanako bwana iaonrain inanon taetae aika bati n te tai ae ti teuana. Inanon boong, tekiti a katokaaki iaonrain inanon taetae tabeua, ao rairakiia a boretinaki a bon kanakoaki nakon te aonaaba ae bwanin.

Ngkai ko katauraoi ibukin rokon te maungatabu ni kabuta, ko kona ni iangoi taekan reeta ake a koreaki akanne n te Nu Tetemanti. Akanne bon kaokoron taai, ao rabakau aika a boou a bon rangi ni kaokoro. Ma rongorongon te maungatabu e kakoroa nanon te kantaninga ae ti te arona ae moan te kakawaki. Ngkana ko rinanon rongorongo man te maungatabu, ko na riai ni iangoia bwa a kanga n:

Kaotan koaua ao reireia ana Euangkerio Iesu Kristo.
Kaungaia, kairakia mai ieta, ao tabekaki rake.
Kauringaan taian tua ao berita aika tabu.
Te Marooro Iaon kakaewenako aika ngkai.
Kauring iaon kangaanga.
Kaetii kaairua nako ake a na rinrake n te Ekaretia.
Katiteuanaaki n te Ekaretia.