“Te Tai ni Mwaie,” Ibukin Kakorakoraia Kairake, Tebetembwa 2023.
Te Tai ni Mwaie
Roronrikirake aikai a kunea te kimwareirei n tokanikai iaon te maaku ao n tibwauai aia taarena ma tabeman.
Taian tamnei iroun Cristy Powell
Emo’onahe Y. ao Jax C. kaka tebwi-ma-aua aia ririki iai irouiia te bwai ae kinaaki: a kaai ni mwaie n tain n te FSY maungatabu iaon kamataku aika kakaokoro i Provo, Utah.
Te mwaie n ti ngkoe imataia ngaa roronrikirake bon te bwai ae aki bebete irouia. Ma ngke a ukoria ni karikirakea ao n tibwaua aia taarena, a karekea te kaotioti ao ni konaa n rikirake ni kawai ake a tia ni buokiia ”riki n aron Iesu Kristo, ao n [anganiia], tabeman aomata, ao ni katamaroa riki te aonaaba” (Personal Development: Youth Guidebook [2019], 1).
Te Mwaie ae te Hoop ma Emo’onahe
Emo’onahe (eh-moh-oh-nah) e iangoia n tibwaua ana taarena n te maie ae te hoop, are bon mwakoron aia katei n Rikina n Amerika. “Temanna raoraou are e nako n ira te FSY imwaiu e tuangai bwa a tia ni karaoa te taarena aei ao are N na bon riai ni karaoia,” e taku.
“Bon teutana nakon nanou, ngaia are i kataia n aki katurua au taratara iaoia aomata.” Ma bon te aekaki ae matoa bwa ko na bon aki! “I kona n ongo takaruaia aomata n nimarangirang,” e taku. “A bon rang n takarua are I aki kona n ongo te katangitang, ngaia are I a kataia n tiku iaon bukibukin te katangitang!”
Emo’onahe e a tia ni mwakuri korakora ni katamaroa ana mwaie ae te hoop. E taku, “Bon iai aron raoi reiakinan ae ko na kabwaouako.” Ma mwaitin riki ana kataneiai, mwaitirin riki ae reiakina i bon irouna.
Te Tia Karaki ae Taarena
Te mwaie ae te hoop bon rinanin te mwaie ae karaoaki n te karaki. “Ko moanna ma te hoop teuana n tei ibukin moan rikim, ao ngkanne ko reita n ikoti taian hoop ni kaoti riki bwaai iaon maium. Inanon au kamataku, ko konaan noora te bwebwe, te ikare, ao te kaubooi,” e taku Emo’onahe. “Ngkana I karakina au karaki, I namakinna kanga I karakiniia koraki ake I reiakinaki mairouia ao taneiai ake I karekei.”
Emo’onahe e bon roko man baronga aika Cheyenne ao Arapahoe mai Oklahoma, ao bon ngaia naba mai Fort Peck Sioux ao Assiniboine. E taku, “I taneiai n namakina ae I kaokoro ma aomata nako, ao n tabetai “anne e anganai te mweebuaka.” Ma te mwaie ae te hoop e kakukureiia aomata n tatabemaniia. Taan mwaie n tatabemaniia a bon karioi oin aia otokai, ao “anne are e karika onotina ao okorona ibon iroum,” e taku.
Taarena a Kona ni Kakorakoraaki
Emo’onahe e namakina kaanna ma te Atua ngkana e tataro, wareki koroboki aika tabu, ao ni kekeiaki n iriira Iesu Kristo. E bon namakina naba kaanna ma te Atua ngkana e kekeiaki ni karikirakea ana taarena. “Ngkana I tabekirakei au hoops ao ni maie, I konaa n namakina te kimwareirei.” E taekinna: “Kakaei bwaai ake ko tangiri ao kakaeia aomata aika a tamaroa ake a na buokiiko n te aro are ko kona ni kabonganai am taarena ni bon kakorakorako ao tabeman. Te beku ibukiia tabeman e konaa naba ni kakorakora am kakoaua iroun Iesu Kristo.”
Te Mwaie n Irish ma Jax
Jax bon te katoki n nakonnano iaon ana kamatau n ana taarena, te mwaie n Irish, n ana kamataku te FSY n aekaia nako. “I a bon rangi, ni koro maaku. Ti teboo I a mena n-ruaia-naeta ni maaku,” e taku. “I karaoa au tataro ae uarereke imwain ae I teirake nako ikekei. I bon rang ni maaku, ma ngke e tang te katangitang. I kataia ae aongkoa akea aomata ikekei. Ao I waaki ni mwaie.”
Jax e kibakiba iaon waena ao ni kamwaingi rangana ni karaoa aron tein te mwaie n Irish. Ma nooran urauran moamoan Jax, angiia aomata aki ataia bwa bon te mwananga ni karokoana ikekei.
Karikirakean te Taarena e Buoka Kabebetean te Korakai
“Inanon 2020 e bon korakai au iango ao riki iangoan te bakabure,” e taku Jax. “I a tiku n te o n aoraki ibukin rootakin marurungin au iango inanon teuana namwakaina. I kunea bwa iai rootakin au kaburoro inanon uarerekeu ao n ataia bwa e kangaanga aron te reitaki ma aomata. E a bon rangi, ni koro ni n rkangaanga.”
N te taina e karekea tabeua bwain aoraki ibukin marurungin ana iango Jax, tinana e kaungaa ni kakaeia taan ibuobuoki aika a mwaatai ni buokia man rawawatan ana iango. E iangoia bwa e na ukora oin ana kaotioti n taraia bwa tera ae e na kona ni karaoia.
“I tataroakinna ao ni bubuti buokau,” e taku. “Ao I uringnga bwa ai tinau are e reia te mwaie n Irish. Ngaia are I moana te kiraati n te tai anne imwain ara kamataku ae bubura n te Kiritimati. I reiakin nimaua mwaie inanon uoua te wiiki, ma anne e kaunga,” e manikangare Jax. N te tai ae waekoa, te mwaie n Irish e riki bwa te kakabwaia ae bubura inanon maiu. “E rang ni ibuobuoki ma aekakin korakaiu ao roon au namakin,” e taku.
Tibwauaan Ana Taarena
N te FSY, ana kambwana Jax e tuangnga ngkana iai ana taarena are e kona n tibwaia n tain te kamataku. Ngaia are e mwaie ibukiia iaon te tabo nakonako. Ngke a tuangnga e riai ni kamataku, ana moan iango Jax bon, “Akea,o.” Ma e iangoia bwa e na tibwaua ana taarena e ngae ngke e bon maaku.
Ngkai Jax e a tia noori tamneina ni kamataku n te FSY, akea te bwai ae karaoia ma ti te ngare. “I katokai matau n taraa te moan mwakoro,” e taku. “Ma ngkanne aomata a moanna n roko nanoia ao n takarua, ao I a moanna ni moangare.”
Ibukiia roronrikirake ake a rootaki, e anga ana taeka n reirei Jax: “E tamaroa maroorokinana ma temanna nakon karabaana n aron ae I tia ni karaoia. Te Uea e ataiko bwa antai ngkoe, E na bon mena ikanne ibukim. E kan buokiko te Uea.”
Ni kabaneana, e namakinna Jax bwa reiakinan te mwaie n Irish e a tia n riki bwa te kakabwaia mairoun Tamara are i Karawa.
Kam Bon Onoti
Ko bon tuai ataia—ngkana ngkoe ko rairaki nakon te Uea, tao ko na konaa ni kaungaaki ni karikirakea te taarena ae boou, naba.
N aron Emo’onahe ao Jax, te Tamnei ae Raoiroi e kona ni buokiiko ni kinai taarena. Ngkai ko karikirakei taarena aikai ao n tibwauai, ko kona ni kunea te buoka ngkai ko kekeiaki n riki n ai aron te Tia Kamaiu.
Tera taarena are ko kona ni karikirakea ao n tibwauai?