“Ngkana Temanna ae Tangiraki Iroura iai Korakain Ana Iango,” Ibukin Kakorakoraia Kairake Tebetembwa 2023.
Buokan te Maiu
Ngkana Temanna ae Ko Tatangiria e Korakai Ana Iango
Aikai nimaua iango n ataia bwa ngkana ko tangiria ni kan buoka temanna are karawawataki man te aki konamaki, kakaiin te nano, ke tabeua kangaangan te namakin.
Kamataata n te tamnei iroun Toby Newsome
E kona ni kangaanga taraan te rao ke kaain te utu are e rinanon te rawawata, e kakaii nanona, ke tabeua kangaanga n aorakin ana iango. E na bae n iai te bwai ae ko kan buokia ni karaoia ma ko aki ataia raoi bwa tera.
Aikai tabeua iango n taui n am iango ngkana ko iangoia ni kan buoka temanna aree korakai ma aorakin ana iango:
1. Ko riai ni marooro ma ngaiia.
Ngkana ko iangoia bwa e tamaroa kawarakiia ke ni kararoako, te kaeka bon: naako kawariia. Te reitaki ni iraorao ae kaan e rangi ni buokiia aomata ake a korakai ma aorakin aia iango. Reitaki ma ngaiia. Mamarooro ma ngaiia. E kona n riki bwa te bwai ae bebete ao n taneiai te aba iai, ma naako kawariia.
2. Tai anga te reirei ni karokoa a butiiko bwa ko na karaoia.
Ngkana iai temanna ae aki tuangko buokana, tai anganiia te reirei. Ni karokoa are ko a butiaki, kabotoa nanom n iraorao ma aomata, mwamwanano, ao tabeakiinaia ni koaua.
3. Bwaina te nimamannei, karaoiroia am iango n taraakin bwaai ao aomata, ao nanoanga.
Ngkana te aomata e bubuti buokana, iriira ana katooto te Tia Kamaiu. Tataro nakon te Tama are i Karawa ibukin ana kairi te tamnei. Ko na riki bwa te tia kaunganano ni uotiiarake aomata. Taetae nakoia n te aro ae nimamannei. Taekin bwaai aika koaua. Kaotia ae iai ootam ao ko nanoanga. Tuangiia bwa a na ataia ae ko boutokaiia ao ko mena ikanne ni kan buokiia. Kaunga nanoia n te aro ae aamarau ni ukori buoka mairouia aika rabakau.
4.Bwaina te taotaonakinnano ao nanomatoa.
Aomata ake a korakai n tabetai a na aki rangi kaekaeka ke n tuaraoi nanoia. Ma bwaina te taotaonakinnano. Reitinako kaotia nakoia ae ko tabeakiniia. Te katinanikuaki ni kaokoroaki e bon aki raoiroi ibukin marurungiia. Tai waekoa ni kitaniia ngkana aki kaekaeka n aron are ko tangiria.
5. Tararuaiko raoi naba.
Kakoaua raoi ae ko kunea te kimwareirei ni maium. Reitaanako am tataro i bon iroum ao kamatebwaian koroboki aika tabu. Kawara te tembora. Karaoi bwaai tabeua ake ko na kukurei iai. Tai kariaia bwa ana kangaanga temanna ae ko tatangiria e riki bwa korakaim ke karawawatakim inanon maium. Kawariia tabeman ibukin te boutoka ngkana ko kainnanoia.