“4 Kawai ni Kakorakoraa Am Utu,” Ibukin Kakorakoraia Kairake, Okitobwa 2023.
4 Kawai ni Kakorakora Am Utu
Ko kona ni kakorakora am utu nakon te kabanea n tamaroa man maiuakinan Ana Euangkerio Iesu Kristo.
E aki taraaki bwa matoara am utu, n taainako e kona ni kakorakoraaki riki. N boong aikai, e taraa n taataketenaki naba nakon te utu n taainako. E riki aio bwa Tatan e ataia bwa utu a kakawaki nakon ana babaire Tamara are i Karawa. Ngkana arona bwa iai bwaai ae e kona ni urua iai te utu teuare e buakaka, e na bon kataia ni karaoia.
E ngae ngkana aki kororaoi utu, bon iai te bwai teuana n am utu ae akea n utu nako: bon ngkoe! Ao iai iroum ana euangkerio Iesu Kristo n am itera. A reirei burabeti ma abotoro ni kangai, “Kukurein te utu e bon koro nanona ngkana e kabotoaki iaon ana reirei te Uea Iesu Kristo.”1
Aikai tabeua kawai are ana euangkerio Iesu Kristo e kona n kakorakorako ao ni uota te kukurei nakon am utu:
-
Utu a kona ni kabaeaki bwa a na akea tokina.
-
Utu a kona n kakukureiia man kabaneae aia tai i bon imarenaia, n ibuobuoki i marenaia, ao n namakina te kinaaki mai karawa.
-
Utu a kona ni katan iaan mwaakan Iesu Kristo bwa e na taobaraa te aki oota, te kaaitara, ao te korakai rinanon te rairannano, te kabwara bure, ao te onimaki.
Aikai aua kawai ko kona ni kakorakoraia iai am utu man maiuakinan te euangkerio:
Tamnei ni kamataata iroun Lai T. Sheng
1 Kaungaa te Tataro
A kakorakoraaki utu ngkana a kaai n tataro ni ikotaki. Te tataro e kona n kakabwaia am utu ma te rau, te tangira, ao te nakoraoi. Ngkana te tataro tiaki te anua ni maiu n am utu, tataro bwa ko na kanga n ataa angan buokan am utu bwa a na kaai n tataro ni ikotaki. Tauraoi ni mwakuri iaon taian kaeka ake ko karekei.
2 Naakon te Taromauri ni Ikotaki
N te taromauri ti reiakina ana euangkerio Iesu Kristo. Ti anaa naba te toa ao n berita ma te Atua ae ti kukurei ni katokaa iaora aran Iesu Kristo ao n teimatoa n ururingnga (taraa Motiaea 18:8–10; Reirei ao Berita aika Tabu 20:77, 79).
Kaean te taromauri ma ara utu e buoka te utu ni kaaniia nakon te Atua ao i bon i marenaia. E anaa te mwakuri ni katoa wiiki, ma te Atua e na bon kakabwaiai ara mwakuri. Ngkana am utu a rineia bwa a na aki kaea te taromauri ma ngkoe, taiaoka ataia bwa rorokom e na kakorakorako ao n buokiko n kakaai aanga n kakorakoraa am utu.
3 Te Tangira ao te Beku
E reirei te Tia Kamaiu, “Kam na i tangitangiri; n ai arou ngkai I tangiri ngkami” (Ioane 15:12). Tuangiia am utu ae ko tangiriia—e ngae ngkana ko bon kakoaua bwa a ataia. Kaotan am tangira nakoia am utu rinanon te taeka ao te mwakuri e kaoa te Tamnei nako nanon mweengam.
Te mwakuri n ibuobuoki nakoia kaain am utu bon te kawai ae kakawaki ni kaotan am tangira. Ao te uaia ni beku ibukiia tabeman e kona naba ni kaaniia am utu i bon imarenaia ao riki nakon Tamaia are i Kararwa. Ko aki kainanoia bwa kona barongaa te mwakuri n ibuobuoki ae e bubura. Te mwakuri n ibuobuoki e kona ni bebete karaoana, n aron katauraoan te amwarake ae tatangiria kaain rarikim. Te uaia ni beku n te utu e uota te kimwareirei ibukina, n aron ae ti warekia n booki aika tabu, “Ngkana kam beku ibukiia raomi ao kam bon beku naba iroun Atuami” (Motiaea 2:17).
4 Maiuakinan te Euangkerio
A mwaiti utu aika membwa ake tiaaki kaain te Ekaretia ke a tia n rineia bwa ana toki man kaean te taromauri. N akean te boutoka man te utu, e kona ni matoatoa te nako n taromauri. Ngkana am utu e rinanon te aekaki aio, uringnga bwa ko konaa n riki bwa te tia uota ae raoiroi man maiuakinan te euangkerio.
Karaoia bwa am utu a na nooria bwa ko maiuakina te bwai ae ko kakoaua. Ko aki kona n ataia ae a bon matakuakiniko n te bwai ae ko taekinna ao ni karaoia. Aio e na kona n uota ootan te euangkerio nakon am utu. E aki taraaki bwa tera ae rinanona am utu, am mwakuri ni kakaonimaki ni maiuakina te euangkerio e kona ni kauka te mataroa nakon ana kairi te Tamnei, katootonga, ao ni uotarake am utu ao n buokiia bwa ana kaaniia nakon te Tia Kamaiu, Iesu Kristo.