“Ti a Nako, ao n Ongora,” Ibukin Kakorakoraia Te Roronrikirake, Tebetembwa 2023.
Ti a Nako, ao n Ongora
Iai au babaire ni kakoroa nanon miiu. Ma ngke I kanakoa iangoana ao ni kariaia te Uea bwa e na kaira kawaiu, I kakabwaia ni kawai aika tamaroa.
Kamataatana n te tamnei iroun Michael Mullan
Ngke e nang bon koro 17 au ririki, I mwaing nako San Francisco, California, USA, n reirei n te reirei ni korobanna. I miakinna bwa N na riki bwa te tia korotamnei ibukin Disney.
N te reirei are i aona riki, I reiakina ae mwaiti iaon te korobanna. I reiakinna mairoun Tamau are i Karawa bwa antai ngai. I aikoa titiku ni mweengau. Au karo aikoa manga kautai ni kairai nakon te taromauri ni katoa Tabati. Akea temanna ae ataia bwa I maiuakina te euangkerio ke I aki. Ma I ataia I Kainnanoia. I kakaea inanon bokin te tareboon Ana Ekaretia Iesu Kristo ibukiia Aika Itiaki ni Boong aika Kaitira. Ngke I nakonako inanon ana kateitei te Ekaretia ao n ongo “I Ataia E Maiu Au Tia Kabooi Maiura” (Anene n Taromauri, nambwa 136) ni katangaki, I namakina te mweengaraoi. I moanna n ata te bwai ae nanonaki n te euangkerio ibukiu ao tera I rangi n tangiria.
Karika te Uea bwa te Nambwa Teuana ni Maium
N aron anne, I tangiria ni kairekerekea Tamau are i Karawa ni bwaai ni kabane ake I karaoi. Te katooto, I moanna n titiraki Nakoina tera Ana kantaninga iaon au babaire ibukin au mwakuri ao te tabo raa ae I riai ni mena iai. Ngke I tataro ao n titiraki iaon aikai, I moanna n namakina ae iai te tabo riki teuana ae N na mena.
Bon teutana uruakin nanou. I a tia ni bairei kanoan nako miiu ao au kataratara iaon au baire. I taku n au iango bwa I ataia bwa N na nakea ao tera ae N na karaoia. Ma ngkai, I ataia bwa I kainnanoa te Uea bwa e na riki n moanibwai inanon maiu, ao anne e a nene ni matoa irou nakon bwaai nako. E ngae ngke I ataia bwa kawaiu e riki ni kaokoro man te bwai are I a tia ni katamneia, I a tia n namakina Ana tangira ibukiu, ao I onimakina Wanawanana.
I bon kairaki nakon te Brigham Young University–Idaho ao Brigham Young University i Provo, Utah, ni kabanea au reirei ae bubura n te korotamnei. Imwain are I angabeeba, I a karekea te intenship ao ni kataneiai ni mwakuri n te studio ibukin te keim. Tao teuana te ririki imwina, imwin rineakiu n riki bwa te tia mwakuri ae bwanin au tai, e a karina naba ni kaboakite studio mairoun te Disney, ike e a karekei mwaawa aika boou ao ni karekea te rikirake.
Ngkana ko kanakoa te bwai are ko iangoia bwa ko na karekea, te Uea e na kakabwaiako n te tai ae riai ma n anganiko te bwai ae ko na kukurei iai. Ko bon aki kona n ataia bwa te tabo raa are e na uotiko te Uea nako iai. Ti nako, ao n ongora.
Moanibwai Moaa Bwaai Aika a Kakawaki
N tain te reirei, I mengo ma au kiraati ao au bwai n reirei ao tibwangau n te Ekaretia. I kataia ni baireia tera aika a moanibwai moa irou. N na nako ni kawariia aomata ni ibuobuoki nakoia, ke N na kamatebwai ibukin au ukeuke? Na wareki au boki aika tabu ngkai, ke Na kabanea au atianimente aei?
Ni katoa tai I karimoa te Uea ao ni karaoi mwakuri are E weteai ni karaoia, n taainako bwaai a nakoraoi, ao ngkanne tabeua. E kawakin Ana berita n taainako. Ngkana ti karimoa te Uea moa, bwaai ni kabane ana nakoraoi.
Ngke I nako te reirei ibukin reitan au beeba, I namakin rinerine ae ti te arona. Ngai bon te beretienti n te Botaki n Ataeinnaine n te uoote n te tai anne. Te bong teuana I karaoa au rinerine imarenan au kamatebwai ibukin au ukeuke ao buokakiia ataeinnaine ni bairea te waaki ni kakukurei. I nako ma ataeinnaine. Ma n au tai ae mwaawa, I tataro ao I kamatebwai n aron are I kona. Ma I bwaati n te ukeuke, ma au bwii aika a riao tamaroaia nakon ae I kantaningaia.
Anganna Bwa E na Kairiko
Tamara are i Karawa e na kairiko. E tangiriko ao e kinako raoi bwa tera arom ae ko mena inanona. E ataia raoi bwa tera ae ko na kakabwaiaki iai ao nningai.
Inanon maiu, bwaai a tia ni bitaki ao ni mwaing teutana. Ma E a tia ni mena inanona n te tai ae bwanin. Ngkai I a tia ni ira Ana kairi ibukiu, bwaai a tia ni bitaki nakon ae moan te tamaroa. Tiaki n aron ae I kantaningaia, ma e tamaroa.
E tangiria bwa E na riki bwa mwakoron maiura. Ngkana ti kona ni Karinna inanon maiura, iai taian kakuba aika tamaroa aika a tataningaira ngaira n tatabemaniira. Tera riki bwaai ake E kaawakin Irouna ibukim are ko aki noori?