“Ko Na Kanga ni Katauraoi ibukin te Maungatabu ni Kabuta,” Ibukin Kakorakoraia Kairake, Tebetembwa 2023.
Katauraoi ibukin te Maungatabu ni Kabuta
Ko Na Kanga ni Katauraoi ibukin te Maungatabu ni Kabuta
A mwaiti ae a karekea roronrikirake aikai man te maungatabu ni kabuta. Ko na kanga ni katauraoi nakon karekean te taneiai ae nano?
I tangiria ni Iriira te Burabeti
I katauraoai ibukin te maungatabu ni Kabuta n Okitobwa 2022 man te wareware iaon Ana Mwakuri ni Kamaiu Iesu Kristo n ana Boki Moomon ao n te O Tetemanti.
Inanon te maungatabu, Beretitenti Russel M. Nelson e taetae nakoira ao ni kakoaua taekan kakawakin te tembora.1 Inanon te tembora, a beritanaki kakabwaia ae akea tokiia, ao namakinan te tamnei ae tamaroa ngkana ko nako ikanne.
Bon akea moa te tembora i Nicaragua, ma e a tia teuana ni katanoataaki. Au kantaninga bwa Na bon ongo ana taeka Beretitenti Nelson, ao n nakon te tembora ngkana e tia.
Ngke I mataku n te maungatabu, I namakina te Tamnei ni kakoaua bwa e bon eti au tabo ae I mena iai. I namakinna ae kanga nanou e kaonaki ma ana tangira te Atua.
Carlos M., Nicaragua
Te Kamaiu E Reke Nakoira ni Kabane
Imwain te maungatabu ni kabuta n Okitobwa 2022, I iangoia raoi bwaai ake a tia n riki inanon maiu n te tai ae aki maan. A mwaiti bwaai aika a bureburea au iango imwain te maungatabu, ao I tangiria n namakina te bebete, rau, ao korakora.
N tain te maungatabu, Unimwaane Quentin L. Cook man Kooram n Abotoro n Tengaun ma Uoman e taku, “Ibukin ana Mwakuri ni Kamaiu te Tia Kamaiu, te kamaiu e reke nakoia aomata ni kabane.”2
Taeka akanne anganai te rau ao te kantaninga. Rinanon Ana Mwakuri ni Kamaiu Iesu Kristo, ngkana I karaoa te kaairua ao rinerine aika bure, I kona ni karekea te kabwara bure ao namakinan te rau. Ao ana tera te maraki ae N na namakina, N na konaa ni kamaiuaki. Ngaira ni kabane ti kona n namakina te rau ae ti te arona ao ni kamaiuaki ngkana ti rairinanora man ara bure ao ni kekeiaki nakon te tamaroa n te bong teuana ma teuana.
Kaye D., Philippines
Am Katauraoi n te Maungatabu ni Kabuta
Anaa teutana te miniti ni katauraoi nakon te Maungatabu, ao ko na karekea te taneiai ae rangi tamaroa. Ngaia, ko na kanga ni katauraoi? Moanna man korean am titiraki! Iangoia inanom am titiraki ngkana ko mataku, ao ko na bon kubanako bwa a kanga taan taetae ni kaineti aia taetae nakoim.