“Burabeti a Ririmwia Burabeti,” Ibukin Kakorakoraia Kairake, Tebetembwa 2023.
Katauraoi ibukin te Maungatabu ni Kabuta
Burabeti a Ririmwia Burabeti
Aomata ni kabane a kona ni ukori kakabwaia man ririmwiian te burabeti—riki Abotoro.
Ti bon reitinako n tuangaki bwa ti na ririmwiin te burabeti. Ma tabeman a miimi bwa bukin tera ana reirei te burabeti are e anga e bon rangi ni kakawaki ni ririmwiaki.
Inanon te maungatabu n Eberi 2017, Beretitenti Thomas S. Monson, te burabeti n te tai anne, e tuangiia membwa n te Ekaretia ni kamatebwaia, tiaki ti warekan, ana Boki Moomon ni katoabong. Beretitenti Russell M. Nelson ao Beretitenti Henry B. Eyring a kaai n ririmwiin ana reirei te burabeti ao n taetae iaon te bwai ae riki.
Te Abotoro ae Ongotaeka
Beretitenti Nelson e taku: “I a tia ni kataia n ririmwiin ana reirei [Beretitenti Monson]. Ibuakon bwaai tabeua, I a tia ni karaoi rinanin ana Boki Moomon bwa tera ae kamatoa, tera ae kaotia bwa e buretata, tera ae kakoroa bukina, tera ae kamataata, ao tera ae kaotia. Taraakin ana Boki Moomon rinanon kawai aikai e riki bwa te mwakuri ae kawanawana man anainano!”1
Beretitenti Nelson e reitinako ni kabwarabwara anne n titirakiniia tabeman te titiraki ae ti tebo ni kunea bwa a mwaiti ake a tia n ringaki maiuiia man iriira ana reirei Beretitenti Monson. TeUea e kairiira ni kabane rinanon ara burabeti, koroboki aika tabu, ao te kaotioti nakon temanna.
Te Abotoro ae Kakaonimaki
E taku Beretitenti Eyring: “I a tia ni wareware n ana Boki Moomon ni katoa bong n ae riaon 50 te ririki. Ngaia ae tao iai bukin au iango bwa ana taeka Beretitenti Monson bon ibukiia tabeman riki. Ma, n angiina ibuakomi, I namakina ana kaunganano te burabeti ao ana berita e kaoai ni kanakoraoa riki au kekeiaki.”
Beretitenti Eyring e reitinako: “N ongo ana reirei Beretitenti Monson iai uoua mwiina aika kakukurei irou: Te moan, te Tamnei are e beritanna e kariki namakin n iai te kantaninga ibukin baika a na riki imwiina, e ngae ngke e rikirake mangaongaon te aonaaba. Ao, te kauoua, e a tia te Uea n anganai—ao ngkoe—n namakina korakoran Ana tangira ibukiia ake a korakai.”2
Ni kabane
Ni kabane aomata a kona ao a riai n ririmwiin ana reirei te burabeti man te maungatabu ni kabuta. E aki taraaki bwa ko mena iaa ni mwanangam n tamnei, ko kona n taainako ni katamaroako, tao ngkoe te Abotoro, ngkoe are ko a tibwa rairaki, ke e ane bwaka imarenan anne. E aki kakeaa kainnanora ibukin kaotioti i bon iroura, bon teuana te kawai are te Atua e kona ni kakabwaiaira. E ngae ngkana Abotoro a kona ni kunei reitan kakabwaia n te kawai aei, ngaira ni kabane ni koauana ti kona naba.