« E nehenehe au e fa’aea noa i roto i te mau rēni », Nō te pūai o te feiā ’āpī, Tetepa 2023.

E ti’a iā’u te mau mea ato’a nei i te Mesia

Tē fa’a’ite nei te feiā ’āpī nāhea te Mesia i te ha’apūaira’a ia rātou ’ia rave i te mau ’ohipa teimaha (hi’o Philipi 4:13).

E nehenehe au e fa’aea noa i roto i te mau rēni

Hōho’a

feiā ’āpī tamāhine e horo ra i roto i te hō’ē tata’ura’a tū’aro

Mai te taime ’a ha’amata ai au i te horo i ni’a i te tahua, e moemoeā nō’u ’ia tūpa’i i te tai’o uati a te fare ha’api’ira’a i roto i te horora’a i te maile. I muri iho i te pae hope’a o teie pu’e tau, ’ua horo vau i te maile i roto e pae minuti te maoro, ma te tūpa’i i te tai’o uati hau atu i te toru tetoni.

I te po’ipo’i a’e ’ua ’ite mātou ē, ’aita tā’u maile i tai’ohia. ’Ua fa’ata’a mai te mau ti’a fa’atere ē, ’ua rave au e toru ta’ahira’a ’āvae i roto i te ’ē’a, tei fa’a’ere iā’u i te horora’a. ’Ua mārō tō’u ta’ata fa’aineine ē, ’ua haere noa vau i rāpae nō te mea ’ua tūra’ihia vau e te tahi atu ta’ata horo. ’Ua parau te ti’a fa’atere e, « e ’ere paha nōna te hape i te mea ē, ’ua tūra’ihia ’oia i rāpae, e hape rā nōna i te mea ē, ’ua fātata atu ’oia i te rēni ». ’Ua haere ’ē atu vau ma te mana’o, ’ua rave-hape-hia tā’u horora’a.

I te sābati i muri iho, i roto i te piha ha’api’ira’a a te Feiā ’Āpī Tamāhine, ’ua māta’ita’i mātou i te hō’ē video, tei fa’aauhia i te fa’aeara’a i ni’a i te mau rēni tū’aro, nō te ha’apa’o i te mau fa’auera’a.¹ I te roara’a o te ha’api’ira’a, ’ua pārahi noa vau i reira ma te riri i te ha’amana’ora’a ē, ’aita vau i manuia.

I te po’ipo’i a’e ’a horo ai au nā ni’a i te tahua, ’ua hi’o vau i raro ’e ’ua ’ite au ē, tē horo ra vau i ni’a noa i te rēni i roto. ’E i te tahi mau taime, e tomo vau i roto, mai tā te ti’a fa’atere i parau. ’Ua fa’aea ’oi’oi au i te horo, ma te ha’eha’a. ’Ua au maita’i roa vau i te vāhi tā’u e horo ra, ’aita vau i ’ite fa’ahou i te mau fifi i roto i te reira.

’Aua’e rā, ’ua hōro’ahia mai iā’u te piti o te fāna’ora’a tau hepetoma i muri mai. ’Ua fa’aātea ri’i au iā’u i te rēni rōpū ’e ’ua tūpa’i au i te tai’o uati a te fare ha’api’ira’a, i teienei ma te fa’aeara’a i roto i te mau ’ōti’a.

Nā teie ’ohipa i tupu i ha’aferuri iā’u, ’ua piri roa atu vau i te rēni tā’u i horo ’e te tahi o te mau fa’auera’a. Maoti rā Iesu Mesia ’e tāna tāra’ehara, ’ua hōro’ahia iā’u te tahi atu rāve’a ’ia tātarahapa vau.

Nō ni’a i te mau fa’auera’a, e ti’a ia tātou ’ia fa’aātea ia tātou i te rēni ’e ’ia rave ma tō tātou maita’i a’e nō te fa’aea noa i roto i te mau ’ōti’a. Tē māuruuru nei rā vau ē, ’ia rave ana’e tātou i te mau hape, e fa’ati’a te Fa’aora ia tātou ’ia tātarahapa ’e ’ia tāmata fa’ahou.

Raygan P., Utah, Marite