Ora Tauturu

Te putapūra’a i te mana’o horuhoru, te hepohepo ’aore rā te ’oto ?

Nā Jessica Zoey Strong

Te mau ve’a a te ’Ēkālesia

Teie te tahi mau mea tā ’outou e nehenehe e rave nō te reira.

Te hi’opo’ara’a o te horuhoru

E aha te huru o tō ’outou mana’o horuhoru ’aore rā ’oto ?

Mai te mea tē ’ite ra ’outou i te ti’aturi ’ore, te mata’u ’aore rā te hepohepo ’aore rā te ahoaho tau roa, ’a ’imi i te tauturu nā roto i te ’āparaura’a i te reira i te hō’ē ta’ata pa’ari ti’aturihia. E nehenehe ato’a ’outou e tāmata i te tahi mau parau a’o i roto i te tuha’a re’are’a (te mau mea tumu iho ā rā !), terā rā, i te tahi taime, e hina’aro ’outou i te tauturu hau atu ā ’e ’aita e fifi.

Mai te mea tē mana’o ra ’outou i te ’ōnohi, ’a tītau ’oi’oi i te tauturu. ’A niuniu atu i tā ’outou rēni tauturu nō te ’ohipa rū, te tuha’a fa’atere nō te mau mūto’i, ’aore rā te fare ma’i.

E tae mai iho ā te mana’o hepohepo, te ’oto ’aore rā te horuhoru i te tahi taime. E mea pinepine teie mau mana’o i te fa’atupuhia mai e te mau tupura’a o te orara’a, e haere atu ’e e ho’i mai ’a taui noa ai te orara’a. ’A tāmata i te tahi mau parau a’o ’o te nehenehe e tauturu ia ’outou !

Te mau tumu

• ’A fāriu atu i ni’a i te Metua i te ao ra. E fa’aro’o ’e e pāhono ’oia i tā ’outou mau pure. E tauturu ’oia ia ’outou i te fa’aruru i te mau tāmatara’a o te tae mai i ni’a i tō ’outou ’ē’a.

• Rōtahi i ni’a ia Iesu Mesia. « Te ’oa’oa o tā tātou e fāri’i nei ’aita ïa e aura’a rahi nō te mau huru o tō tātou orara’a ’e mea faufa’a rā nō ni’a i te fa’atumura’a o tō tātou orara’a ».¹

• ’A tāvini ia vetahi ’ē. « Mai te mea e hōro’a tātou i tō tātou taime ato’a nō te tāvini ia vetahi ’ē, e ’ite ïa tātou i tō tātou iho orara’a ’e tō tātou iho ’oa’oa ».²

• ’Ia vai maita’i noa te ea o tō ’outou vaerua. ’A tai’o i te mau pāpa’ira’a mo’a i te mau mahana ato’a, ’a haere i te hiero mai te mea e nehenehe, ’a rave i te ’ōro’a mo’a, ’a ha’apa’o i tā ’outou mau fafaura’a, ’e ’a tātarahapa i te mau mahana ato’a. ’A ani i te mau ha’amaita’ira’a o te autahu’ara’a mai te mea e hina’aro ’outou i te reira.

• ’Ia vai maita’i noa te ea o tō ’outou tino. ’A ta’oto tano noa, ’a fa’a’eta’eta te tino ’e ’a ha’apa’o i te Parau Pa’ari.

Mai te mea tē ’ite ra ’outou i te hepohepo

• ’A fa’atumu i ni’a i teie iho taime. ’Aita e faufa’a ’ia ha’ape’ape’a nō te ’ananahi ’aore rā ’ia horuhoru nō tei ma’iri. ’O te taime i teienei ana’e ’o tā ’outou e nehenehe mau e taui.

• ’A rave i te taime nō te tāmarū ia ’outou. « ’Aita ho’i i tītauhia i te hō’ē ta’ata ’ia horo ’oi’oi atu i tei au i tōna ra pūai » (Mosia 4:27).

• ’A feruri pōtiti noa. E nehenehe te mau putapūra’a ’aipa e fa’atupuhia e te mau ferurira’a ’aipa [negatif]. Te ferurira’a pōtiti [positif] e nehenehe e tauturu ia ’outou ’ia ’ite iti mai i te ri’ari’a ’aore rā i te hepohepo.

Mai te mea tē ’ite ra ’outou i te ’oto

• ’Ia ’ite mai ’outou e tuha’a te mau tāmatara’a nō te fa’anahora’a. ’Aita te orara’a i te mau tupura’a fifi i te aura’a ē, tē rave ra ’outou i te hō’ē ’ohipa hape. ’A ti’aturi e ha’apūai mai te Metua i te ao ra ia ’outou ’e tō ’outou mau tāmatara’a nō tō ’outou ïa maita’i (Te Ha’api’ira’a Tumu ’e te mau Fafaura’a 90:24 ; hi’o ato’a Roma 8:28 ; Te Ha’api’ira’a Tumu ’e te mau Fafaura’a 122:5–9).

• Rōtahi i ni’a i te ’ā’au mehara. ’A pāpa’i i te mau mahana ato’a i te mau mea tā ’outou e māuruuru nei, ’e ’ia pāpū ia ’outou i te ha’amāuruuru i te Metua i te ao ra (hi’o Te Ha’api’ira’a Tumu ’e te mau Fafaura’a 98:1).

• ’A rave i te mau mea tā ’outou e ’oa’oa nei. ’A haere nā muri i tō ’outou mau hoa ’e tō ’outou ’utuāfare, ’a tāmata i te hō’ē ’ohipa ’āpī, ’a fa’aro’o i te pehe e fa’ateitei, ’aore rā ’a fa’anaho i te hō’ē ’ohipari’i ’ārearea.

Mai te mea tē ’ite ra ’outou e ’ere ’outou i te mea maita’i roa

• ’Ia ’ite mai ’outou ē, ’aita e tītauhia ’ia maita’i roa ’outou. « I roto i te tāhuti nei, tei roto noa ā ra te maita’i-roa-ra’a i te ‘tīa’ira’a’ ».³ ’Eiaha e fa’aau ia ’outou i ni’a ia vetahi ’ē, i roto i te orara’a mau ’aore rā, i ni’a i te mau rāve’a tūreiara’a tōtiare.

• ’A paraparau ia ’outou iho ma te maita’i. ’A hāmani maita’i ia ’outou iho, mai tā ’outou e nā reira i te hō’ē hoa. E paraparau ato’a mai te Vārua Maita’i ia ’outou ma te marū ’e e’ita roa atu ’oia e fa’ao’ō’o ’aore rā e tāhitohito ia ’outou.

• ’Ia ’ite mai ’outou ē, e fa’ahope te Fa’aora i te ta’a-’ē-ra’a. ’Ua pohe Iesu Mesia nō tā tātou mau hara ’e ’ua rave i ni’a iho iāna tō tātou mau māuiui, mau ma’i ’e mau pohe (hi’o Alama 7:11–12). Mai te peu e mea ha’eha’a tātou, ’ua fafau mai ’oia ’ia « fa’ariro i te mau mea paruparu ’ei mea pūai » (Etera 12:27). E’ita paha tātou e nava’i roa i te maita’i ia tātou ana’e, e nehenehe rā tātou e nava’i i te maita’i a’e ’e ōna.

Pū’ohura’a

E tītau paha ’outou e rave rahi mahana, i reira ’outou e ’ite ai i te ti’aturira’a ’e te ineine nō te fa’aruru i te mau tāmatara’a o te orara’a. Noa atu te huru e ’ite ai ’outou te mana’o maita’i, ’ia pāpū ia ’outou i te tāmau noa i te rave i te mau mea tumu.

’A pure i te Metua i te ao ra—noa atu e mea ’ōhie te orara’a. ’A fa’atumu i ni’a i te mea tā te Fa’aora i rave nō ’outou ’e i ni’a i tōna orara’a ’e tāna mau ha’api’ira’a—noa atu te tere maita’i ra te mau mea. I reira, ’ia fārerei ana’e ’outou i te mau mana’o fifi, ’ua ineine maitai a’e ïa ’outou nō te ārai i te reira.

’Ua fa’atanohia teie parau pāpa’i i te Fa’atanora’a i ni’a i te orara’a misiōnare, e roa’a i ni’a i te ChurchofJesusChrist.org ’e i ni’a i te fa’anahora’a Vaira’a buka ’evanelia.

Fa’ata’ara’a

1. Russell M. Nelson, ’Āmuira’a rahi nō ’Atōpa 2016 (Ensign ’aore rā Liahona, Novema 2016, 41).

2. Dieter F. Uchtdorf, « Te ’oa’oa, tā ’outou faufa’a ’āi’a, ’āmuira’a rahi nō ’Ātopa 2008 (Ensign ’aore rā Liahona, Novema 2008, 20).

3. Jeffrey R. Holland, ’Āmuira’a rahi nō ’Ātopa 2017 (Ensign ’aore rā Liahona, Novema 2017, 116).