« Mai te mau ’episetole ē tae atu i te mau ha’apurorora’a ti’a », Nō te pūai o te feiā ’āpī, ’Ātete 2023.

Fa’aineinera’a nō te ’āmuira’a rahi

Mai te mau ’episetole ē tae atu i te mau ha’apurorora’a ti’a

Nā David A. Edwards

Ve’a a te ’Ēkālesia

E mea maoro te ’āparaura’a a te feiā fa’atere o te ’Ēkālesia, hō’ē ā rā mau ’ōpuara’a.

Hōho’a

Paulo e pāpa’i ra i te ʼepisetole

Fātata e 2 000 matahiti i teienei

’A ora ai ’oia i ni’a i te fenua nei, ’ua fa’anaho Iesu Mesia i tāna ’Ēkālesia. I muri a’e i tō te Fa’aora ti’afa’ahoura’a mai ’e tōna haerera’a i te ra’i, ’ua arata’i tāna mau ’āpōsetolo i te ’Ēkālesia nā roto i te mana, te heheura’a ’e te fa’aurura’a tāna i hōro’a ia rātou.

I taua mau mahana ra, pinepine te feiā fa’atere o te ’Ēkālesia i te paraparau i te mau melo o te ’Ēkālesia, i te mau vāhi rau nā roto i te mau ’episetole (mau rata).

Tei roto i te Faufa’a ’Āpī te mau ’episetole tei pāpa’ihia e Paulo, Petero, Ioane, Iakobo ’e Iuda. ’Ua pāpa’i-rima-hia teie mau rata, ’ua hōro’a-rima-hia, ’ua pia-rima-hia, ’e ’ua tai’ohia ma te pūai.

Pinepine e hō’ē ā ’ōpuara’a tā teie feiā fa’atere o te ’Ēkālesia, i te pāpa’ira’a i teie mau rata. ’Ua ’imi rātou ’ia :

Fa’a’ite i te ’itera’a pāpū ’e ’ia ha’api’i i te ’Evanelia a Iesu Mesia.
Fa’aitoito, ’ia fa’auru ’e ’ia fa’ateitei.
Fa’aha’amana’o i te mau fa’auera’a ’e te mau fafaura’a.
Pāhono i te mau fifi e vai nei.
Fa’aara nō ni’a i te mau fifi.
Fa’atītī’aifaro i te mau hape ato’a e tomo mai nei i roto i te ’Ēkālesia.
Tāhō’ē i te ’Ēkālesia

Hōho’a

Russell M. Nelson

Teie mahana

Fātata e 2 000 matahiti i muri mai ’e e ’ite ’outou ē, e rave rahi mea tei taui, tera rā tē vai noa ra te tahi mau mea.

’Ua fa’aho’i fa’ahou mai Iesu Mesia i tāna ’Ēkālesia i ni’a i te fenua nei, ’e tē vai fa’ahou ra te mau peropheta ’e te mau ’āpōsetolo nō te arata’i i te reira. Mai te tau rā o te mau ’episetole, ’ua ha’amata te rāve’a ’āpī nō te tūreiara’a—mai te nene’ira’a i te rātio ’e tae atu i te ’āfata teata i ni’a i te natirara.

I teienei, e nehenehe te feiā fa’atere o te ’Ēkālesia e hōro’a i te mau poro’i i te hō’ē taime i roto i te hō’ē ’āmuira’a rahi a te ’Ēkālesia. E hāpono-ato’a-hia te reira nā roto i te rāve’a pe’e’utari ’e te ha’apurorora’a ti’a i ni’a i te natirara, nā roto e rave rahi reo i te hō’ē ā taime. Tau mahana i muri mai, ’ua piahia te pāpa’ira’a i ni’a i te itenati nā roto e rave rahi reo, ’e ’ua hāponohia te hō’ē buka nene’ihia nā te ao ato’a nei.

’A fa’aineine ai ’outou nō te ’āmuira’a rahi i muri nei, e nehenehe ’outou e feruri i teie mau ’episetole nō te Faufa’a ’Āpī. E mea ta’a ’ē te reira mau taime ’e e mea ta’a ’ē te mau rāve’a ’āpī. Terā rā, e fa’atupu te mau parau poro’i o te ’āmuira’a i te hō’ē ā mau ’ōpuara’a faufa’a rahi. ’A ’ite ai ’outou i te mau a’ora’a o te ’āmuira’a, e nehenehe ’outou e feruri e nāhea te reira ’ia :

Fa’a’ite i te ’itera’a pāpū ’e ’ia ha’api’i i te ’evanelia a Iesu Mesia.
Fa’aitoito, ’ia fa’auru ’e ’ia fa’ateitei.
Fa’aha’amana’o i te mau fa’auera’a ’e te mau fafaura’a.
Pāhono i te mau fifi e vai nei.
Fa’aara nō ni’a i te mau fifi.
Fa’atītī’aifaro i te mau hape ato’a e tomo mai i roto i te ’Ēkālesia.
Tāhō’ēra’a i te ’Ēkālesia